ខែសីហា 4, 2011 
Thursday, 04 August 2011
ដោយ ៖ ស៊ន សុភក្ដ្រ
DAP NEWS
ភ្នំពេញ ៖ រឿងរ៉ាវទាក់ទិន ទៅនឹងប្រតិបត្ដិការ របស់ក្រុម នគរបាល សេដ្ឋកិច្ច ក្រសួងមហាផ្ទៃ និង ខេត្ដសៀមរាប ដែលធ្វើឱ្យមាន់របស់ ប្រជាពលរដ្ឋ ជាង ១ពាន់ក្បាល បានងាប់ និង ខាតបង់ថវិកា ជាង ១ម៉ឺនដុល្លារ កាលពីវេលាម៉ោង ១និង៣០នាទី យប់ រំលងអធ្រាត្រ ចូលថ្ងៃទី៣ ខែកក្កដា ឆ្នាំ ២០១១ នៅលើកំណាត់ផ្លូវ ជាតិលេខ៦អា ក្នុងស្រុកពួក ខេត្ដសៀមរាប រហូតមកដល់ ពេលនេះ បានធ្លាក់ចូល ទៅដល់ដៃ តុលាការហើយ បន្ទាប់ពីម្ចាស់ កសិដ្ឋាន ចិញ្ចឹមមាន់ មិនសុខចិត្ដ នឹងទង្វើរបស់ក្រុម សមត្ថកិច្ចទាំងនេះ ហើយដាក់ពាក្យបណ្ដឹង ទៅកាន់សាលាដំបូង ខេត្ដសៀមរាប ។
យោងតាមប្រភព ព័ត៌មានពី ម្ចាស់កសិដ្ឋាន ចិញ្ចឹមមាន់ ដែលទទួលរងនូវ ភាពអយុត្ដិធម៌ ពីប្រតិបត្ដិការ របស់ក្រុមនគរបាល សេដ្ឋកិច្ច ក្រសួងមហាផ្ទៃ និងខេត្ដសៀមរាប ដែល ត្រូវបានគេដឹងថា មានបុគ្គល ២នាក់ ជាអ្នក ដឹកនាំ ក្នុងនោះគឺឈ្មោះ យិន ប្រសិទ្ធ និង គូកនម្នាក់ទៀត ឈ្មោះ ងួន បូរ៉ា បានឱ្យដឹងថា តុលាការខេត្ដ សៀមរាប បានកោះហៅ ភាគីទាំងពីរ ទាំង ជនរងគ្រោះ និងចុងចម្លើយ ទៅឆ្លើយបំភ្លឺ ជុំវិញបញ្ហាទាំងអស់នេះ។ ប៉ុន្ដែការសាក សួរពីសំណាក់ សាលាដំបូង ខេត្ដសៀមរាប ដែល ធ្វើឡើង កាលពីថ្ងៃទី៣ ខែសីហា ឆ្នាំ ២០១១ នោះ បុគ្គលិក យិន ប្រសិទ្ធ និងគូ កន ឈ្មោះ ងួន បូរ៉ា មិនបានបង្ហាញ វត្ដមាន នៅមុខតុលាការ នោះឡើយ ដោយបញ្ជូនមេធាវី របស់ខ្លួន ទៅបំភ្លឺជំនួស ។
យោងតាម ប្រភពព័ត៌មាន ខាងលើ បានឱ្យដឹងទៀតថា ការសាកសួរ ជាថ្មីរបស់តុលាការ ខេត្ដសៀមរាប នឹងត្រូវធ្វើឡើងនៅថ្ងៃ ទី៣១ ខែសីហា ឆ្នាំ២០១១ ប៉ុន្ដែគេមិនដឹង ថា តើ យិន ប្រសិទ្ធ និងគូកន ហ៊ានទៅ ប្រឈមមុខ ចំពោះតុលាការ ពីទង្វើរបស់ ខ្លួន យ៉ាងណានោះទេ ។
គួរបញ្ជាក់ថា កាលពីយប់រំលងអធ្រាត្រ ចូលថ្ងៃទី៣ ខែកក្កដា ឆ្នាំ២០១១ ក្រុមនគរ បាលសេដ្ឋកិច្ចក្រសួងមហាផ្ទៃ និងខេត្ដសៀម រាប ដែលដឹកនាំផ្ទាល់ដោយបុគ្គល ងួន បូរ៉ា បានទៅស្ទាក់ចាប់រថយន្ដដឹកមាន់ជាង១ពាន់ ក្បាល ដែលកំពុងធ្វើចរាចរណ៍ លើផ្លូវជាតិ លេខ ៦អា ឆ្ពោះមកចែកចាយនៅរាជធានី ភ្នំពេញ ដែលប្រតិបត្ដិការ ចាប់មាន់ ខាងលើនេះ ពីព្រោះថា ក្រុមសមត្ថកិច្ចបានចោទប្រកាន់ ម្ចាស់កសិដ្ឋានចិញ្ចឹមមាន់ ថាគ្មានច្បាប់ អនុញ្ញាតត្រឹមត្រូវ រាប់ទាំងការដឹកជញ្ជូននេះ ផងដែរ ហើយបន្ដ ស្ទាក់ចាប់រហូតធ្វើឱ្យមាន់ ជាង១ពាន់ក្បាលត្រូវងាប់ ដោយខាតលុយ រាប់ពាន់ម៉ឺនដុល្លារឯណោះ។
ប្រភពព័ត៌មានពីម្ចាស់កសិដ្ឋានបាន បញ្ជាក់ថា បើទោះបីពួកគេបានបង្ហាញឯក សារត្រឹមត្រូវ រួមទាំងមានការចុះហត្ថលេខា ឯកភាពយល់ព្រម ពីការបើកអាជីវកម្មពី សំណាក់រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន ក៏ដោយ ប៉ុន្ដែ ក្រុមនគរបាលសេដ្ឋកិច្ចមួយក្ដាប់តូចនេះ នៅ តែមិនយល់ព្រម ហើយចាត់ ទុក ថា ខុសច្បាប់ ដដែល និងបន្ដអនុវត្ដកាតព្វកិច្ច បំពានរបស់ខ្លួនថែមទៀតផង។ ដើមអម្ពិលមិនអាចសុំបំភ្លឺពី លោក យិន ប្រសិទ្ធ និងគូកនបានទេ នៅថ្ងៃនេះ។
មជ្ឈដ្ឋានមួយចំនួនសង្ឃឹមថា សមត្ថកិច្ច តុលាការនឹងផ្ដល់ភាពយុត្ដិធម៌ដល់ប្រជាពល រដ្ឋដែលរកស៊ី ប៉ុន្ដែត្រូវបានទទួលនូវភាព អយុត្ដិធម៌ ពីក្រុម សមត្ថកិច្ចមួយ ក្ដាប់តូចនេះ ហើយបើមិនមានវិធានការ យ៉ាងណានោះទេ ច្បាស់ជាក្រុមសមត្ថកិច្ចទាំងនេះ ប្រើសិទ្ធិ អំណាចរបស់ខ្លួន ទៅកកូរកកាយការរកស៊ី របស់ប្រជាពលរដ្ឋ ជាក់ជាមិនខាន។
កន្លង ទៅ សមត្ថកិច្ចខ្លះបានប្រើប្រាស់បុណ្យស័ក្ដិ របស់ខ្លួន ទៅគាបសង្កត់អ្នករកស៊ីដើម្បីផល ប្រយោជន៍បុគ្គលតែប៉ុណ្ណោះ ដោយគ្មាន អនុវត្ដការងារឱ្យបាន ប្រសិទ្ធភាពនោះឡើយ ផ្ទុយទៅវិញ មិនត្រឹមតែផ្ដល់សន្ដិសុខនិង ដំណើរការល្អ ចំពោះការរក ស៊ីរបស់ប្រជា ពលរដ្ឋនោះទេ ប៉ុន្ដែបែរជាធ្វើឱ្យពួកគាត់ហូរ ទឹកភ្នែកគ្រប់វិនាទី តួយ៉ាងដូចជាម្ចាស់ កសិដ្ឋានចិញ្ចឹមមាន់ខាងលើនេះ ធ្វើឱ្យខាត បង់ថវិកាជាង ១ម៉ឺនដុល្លារ ។ ដូច្នេះអ្វីៗគ្រប់ បែបយ៉ាង ត្រូវរលាយតាំង ពីវេលាដែលខិត ខំយ៉ាងលំបាកក្នុងការ រកស៊ី ចុងក្រោយទៅ បានត្រឹមតែលើកម្រាមដៃដប់ បន់ស្រន់ដាក់ បណ្ដាសាក្រុមសមត្ថកិច្ចទាំងនេះ សូមឱ្យ មានអាយុត្រឹម សត្វមាន់របស់គាត់ គឺរយៈ ពេល ៤៥ថ្ងៃ ដែលយកទៅដាក់ចោល ហើយ បណ្ដាលឱ្យងាប់ ។
Camnews 