ខែសីហា 15, 2011 
ដោយ ឱ ភារិទ្ធ
2011-08-15
វិទ្យុអាស៊ីសេរី
កុមារីម្នាក់បានរងគ្រោះដល់ស្លាប់ដោយសារលង់ទឹកទន្លេមេគង្គ និងបុរសម្នាក់ទៀត ត្រូវពស់ចឹកក្នុងពេលស្រង់យកឈើអណ្ដែតតាមទន្លេ នៅស្រុកក្រូចឆ្មារ ខេត្តកំពង់ចាម ក្នុងពេលទឹកឡើង។
១៤-សីហា-២០១១ ៖ កុមារ ទាំង នេះ កំពុង លេង នៅ មាត់ ទន្លេ មេគង្គ ដែល កំពុង ជន់ ព្រៀប ច្រាំង នៅ ឃុំ ព្រះ ប្រសប់ ស្រុក ខ្សាច់ កណ្ដាល ខេត្ត កណ្ដាល។ (RFA/Leng Maly)
អនុប្រធានភូមិកោះត្រែង ឃុំកោះពីរ ស្រុកក្រូចឆ្មារ ខេត្តកំពង់ចាម គឺលោក ឈង អាន បានឲ្យដឹងនៅថ្ងៃទី១៥ សីហាថា កុមារីម្នាក់អាយុប្រមាណ ៩ ឆ្នាំ បានស្លាប់ដោយសារទឹកទន្លេហូរកួចយកទៅ។
លោកបន្តថា បន្ទាប់ពីបុរសជាឪពុកបាននាំកូនស្រីនោះរួមទាំងកូនតូចមួយទៀត ទៅមុជទឹកទន្លេ កូនស្រីនោះកាន់ពោះវៀនកង់រថយន្ត ដែលឪពុកឲ្យតោងលេងមកទុកនៅទូកក្បែរច្រាំង ហើយក៏ត្រឡប់មកហៅឪពុកវិញ តែត្រូវទឹកហូរខ្លាំងកួចយកទៅបាត់។
លោក ឈង អាន ៖ «យកកង់ឡានទុកលើទូក រួចហើយវាបកមកវិញ ឪវាទៅលេងឆ្ងាយពីកន្លែងហ្នឹងហើយ។ ពេលវាមកវិញ ទឹកវាហូរ វារអិលជើងទៅ ក្មេងអត់ចេះហែល រួចវាមានខោអាវដៃវែង»។
លោក ខូវ អ៊រ មេឃុំកោះពីរបានបញ្ជាក់រឿងហេតុនេះបន្ថែមថា នៅពេលដឹងថាកុមារីនោះរអិលតាមទឹកហើយបុរសជាឪពុកបានពរកូនតូចយកទៅទុកនៅទូក ហើយតាមរកភ្លាមៗ នៅម៉ោង ៨ និង ៤០ នាទី ព្រឹកថ្ងៃទី១៤ សីហា។ តែប្រមាណជាម៉ោងជាង ៩ ព្រឹក ទើបរកឃើញកូនស្រី ដែលមានឈាមហូរតាមច្រមុះ ត្រចៀក ស្លាប់ទៅហើយ។
នៅព្រឹកថ្ងៃទី១៤ សីហាដដែលនោះដែរ វេលាទាបភ្លឺឆ្លងចូលថ្ងៃទី១៥ សីហា លោកមេឃុំ ខូវ អ៊រ បានឲ្យដឹងថា បុរសម្នាក់វ័យ ៥០ ឆ្នាំឈ្មោះ ហ៊ាង ខា ត្រូវពស់វែកចឹកនៅកណ្ដាលទន្លេពេលទាបភ្លឺ ដោយមូលហេតុចាប់ស្រង់សំណាត់អុសដែលហូររសាត់តាមទឹក៖ «មូលហេតុទៅចាប់អុសកណ្ដាលទន្លេ។ ដល់ទូកវាឡើងទៅលើបឿនអុស បឿនសំរាមវារបូតចង្កូតដល់ចុះដាក់ចង្កូតទូកដៃម្ខាងទាញសំរាមចេញ ដៃម្ខាងដាក់អាពស់ហ្នឹងវា នៅជិតចង្កូតទូកហ្នឹង វាចឹកផសភ្លាមហ្នឹង។ ពស់វែករនាម»។
លោកមេឃុំបន្ថែមថា ក្រុមគ្រួសារបានយកជនរងគ្រោះទៅឱ្យព្រះសង្ឃស្ដោះផ្លុំ ប៉ុន្តែ លោកមានពុទ្ធដីកាថា អ្នករបួសនោះរង្គោះសក់ហើយ លោកមិនហ៊ានមើលទេ ហើយបង្គាប់ឲ្យបញ្ជូនអ្នករបួសទៅមន្ទីរពេទ្យ។
មន្ត្រីមន្ទីរពេទ្យខេត្តកំពង់ចាមបានបញ្ជាក់ថា នៅមន្ទីរពេទ្យមានតែថ្នាំចាក់សម្រន់ការឈឺចាប់ប៉ុណ្ណោះ។ ដូច្នេះ លោកឲ្យបញ្ជូនទៅពេទ្យភ្នំពេញទើបមានថ្នាំព្យាបាល។
លោកមេឃុំ ខូវ អ៊រ បានឲ្យដឹងថា ជនរងគ្រោះនោះ កំពុងសម្រាកព្យាបាលនៅផ្ទះ ដោយអះអាងថា អ្នករបួសអន់ចុកចាប់ហើយ តែនៅពុំទាន់មានកម្លាំងនៅឡើយ។
អាជ្ញាធរមូលដ្ឋានបានឲ្យដឹងបន្ថែមថា ឲ្យតែរដូវទឹកឡើង ប្រជាពលរដ្ឋនៅតាមដងទន្លេមេគង្គ តែងតែនាំគ្នាអុំទូក ឬបរកាណូត ចេញទៅស្រង់ឈើ ដែលរសាត់អណ្ដែតតាមទឹក (សំណាត់) មកទុកធ្វើជាអុសដុត ឬប្រើការជាប្រយោជន៍ផ្សេងទៀត ប្រសិនបើសំណាត់ឈើ ឬឫស្សីមានសាច់នៅរឹងមាំល្អ៕
Camnews 