Written by ភ្នំពេញដេលីញូវ
Monday, 14 November 2011
ពេលនេះ អ្នកចម្រៀង ឆោម ប៊ុនយ៉ុង កំពុងត្រៀមខ្លួន ចូលរោងការ ជាមួយនារីម្នាក់ ដែលជាសែ ស្រឡាយរាជវង្ស ហើយប៉ុន្តែ ពុំទាន់កំណត់ ពេលវេលា ច្បាស់ថា ពេលណាទេ គ្រាន់តែដឹង ថា នៅក្នុងឆ្នាំរោង ២០១២ ហេតុនេះ ទើបប្រឹង រកប្រាក់ ទុក សម្រាប់ ការរៀប អាពាហ៍ពិពាហ៍ នោះ ។
ឆោម ប៊ុនយ៉ុង បានទទួល ស្គាល់ថា ស្នេហាគាត់ ពិតជាលឿនមែន ព្រោះគ្រាន់តែ ស្គាល់គ្នាបាន ត្រឹមបួនខែ ក៏ចូលស្តីដណ្តឹង តាមប្រពៃណីខ្មែរ ភ្លាមដែរ តែមិនទាន់បាន មើលថ្ងៃខែឆ្នាំ ត្រូវ ចូលរោងការ ពេលណា ឱ្យល្អនៅឡើយទេ ។ ទោះយ៉ាងណា ក៏ លោកអះអាងថា នេះទើបគឺជាគូអនាគតយ៉ាងពិតប្រាកដ ។
ខាងក្រោមនេះ ជាបទសម្ភាស ជាមួយលោក ឆោម ប៊ុនយ៉ុង តាមទូរស័ព្ទ កាលពីរសៀល ថ្ងៃទី ២០ ខែតុលា ឆ្នាំ ២០១១ ជុំវិញការបាន ជួបស្គាល់ និង ឈានដល់ ការស្រឡាញ់ ព្រមទទួល យកនារី ដែលជា អនាគតភរិយា ។
* មានព័ត៌មានថា លោករកឃើញ គូអនាគត ជាសែស្រឡាយ រាជវង្ស និង ត្រៀមតែថ្ងៃ ចូលរោងការ ប៉ុណ្ណោះ ?
– បាទ ! គឺជាការពិតហើយ នារីម្នាក់នោះ ជាសែស្រឡាយ រាជវង្សមែន ។ យើងខ្ញុំបានធ្វើពិធី ភ្ជាប់ពាក្យ នៅផ្ទះខាងស្រី ម្តុំបុរីភ្នំពេញ កាលពីថ្ងៃទី ១៨ ខែសីហា ឆ្នាំ ២០១១ កន្លងទៅ រួចហើយ នៅតែខំប្រឹង រកប្រាក់ មករៀបចំ ពិធីមង្គលការ ប៉ុណ្ណោះ ។
* តើអាចរំឭក ឱ្យដឹងពី មូលហេតុ បានជួបស្គាល់ និង ស្រឡាញ់គ្នា បានដែរឬទេ ?
– រឿងស្នេហាខ្ញុំ បើនិយាយទៅ ហាក់ដូច ចៃដន្យ និង ដូចរឿង ប្រលោមលោក ព្រោះតាមខ្ញុំ ចាំកាល ជួបគ្នាដំបូង ថ្ងៃទី៣១ ខែឧសភា ឆ្នាំ២០១១ លុះដល់ថ្ងៃទី ១៨ ខែសីហា ក៏បានភ្ជាប់ពាក្យ ។ ដំបូងគឺខ្ញុំ បានជួបគាត់នៅ ក្នុងក្លឹបឌីស្កូ សាំងត្រូប៉េ ដោយ កាលនោះ បន្ទាប់ពី ច្រៀងនៅ មហាសាល រួចមក ខ្ញុំក៏បានទៅ ក្លឹបនោះ មានគ្នាបីនាក់ ។ ពេលនោះ ពួកគាត់ដែលមាន គ្នាបួន ទៅប្រាំនាក់ អង្គុយនៅតុផ្សេង ពេលឃើញខ្ញុំ ដោយក្នុងចំណោម ពួកគាត់មាន អ្នកស្គាល់ខ្ញុំច្បាស់ ក៏បានហៅ និងណែនាំ ឱ្យខ្ញុំ ស្គាល់គាត់ ថាជាម្ចាស់ក្សត្រី និង ប្រាប់គាត់វិញថា ខ្ញុំជា អ្នក ចម្រៀងម្នាក់ ខ្ញុំក៏បានគោរពគាត់តាមរបៀប ជួបគាត់ជាសែស្រឡាយស្តេច ប៉ុន្តែកាលនោះមិន បាននិយាយគ្នាច្រើនទេ គ្រាន់តែបានប្រើកែវភ្នែក ផ្តោតសម្លឹងមើលគ្នាទៅវិញទៅមក និងបង្កប់ ដោយអត្ថន័យជ្រាលជ្រៅ ។ ជាមួយគ្នានោះម្ចាស់ ក្សត្រីក៏បានឆ្លៀតសរសើរថា ខ្ញុំដៃម្ខាងកាន់កាំ ភ្លើងដៃម្ខាងកាន់ក្បាលមីក្រូហ្វូន ខ្ញុំស្នេហាជាតិ ស្មោះនឹងរាជបល្ល័ង្ក ។ លុះរំលងក្រោយ ពី នោះមួយខែពួកយើងមិនបានទំនាក់ទំនងគ្នា ឬ ជួបអ្នកអង្គម្ចាស់ សោះ ។ នៅយប់មួយពេលខ្ញុំ ច្រៀងនៅមហាសាលអ្នកអង្គម្ចាស់បានហៅឱ្យខ្ញុំចូលអង្គុយរួមតុជាមួយ និង និយាយលេងពី នេះពីនោះរហូតបានស្គាល់ចិត្តថ្លើមគ្នាទៅវិញទៅ មក និង កាន់តែជិតស្និទ្ធគ្នាព្រមទាំងបានច្រៀង ជាមួយគ្នានូវ ចម្រៀងមួយបទ ដែលជាព្រះរាជនិពន្ធ របស់ព្រះករុណាព្រះមហាវីរក្សត្រនរោត្តម សី-ហនុ គឺបទ “រាត្រីជួបភក្ត្រ” ។ តាំងពីនោះមក ខ្ញុំបានព្យា យាមសាកសួរចិត្ត អ្នកអង្គម្ចាស់ថា បើខ្ញុំឱ្យចាស់ទុំ ចូលស្តីដណ្តឹង តើព្រមឬទេ ? ដោយឃើញ អ្នកអង្គម្ចាស់ នៅស្ងៀមប្រកែក ក៏មិនប្រកែកទើបខ្ញុំបានប្រាប់ឱ្យចាស់ទុំ និង ញ្ញាតិមិត្តចូលស្តី ដណ្តឹងទៅតាម ប្រពៃណីខ្មែរ ក្រោយពីស្គាល់គ្នា បានបួនខែតែ ប៉ុណ្ណោះ ។
* បើភ្ជាប់ពាក្យរួចហើយ តើត្រូវចូលរោងការ ពេលណាដែរ ?
– គ្រាន់តែគិតថា រៀបការក្នុងឆ្នាំរោង ប្រហែលជាខែឧសភា ឆ្នាំ ២០១២ ខាងមុខ ព្រោះមង្គលការនេះត្រូវរង់ចាំខាង រាជវាំងគន់គូរមើល ពេលាណាល្អ ឱ្យច្បាស់លាស់សិន ។ សំខាន់ គឺត្រូវប្រឹងរកប្រាក់ ទុកសម្រាប់រៀបកា រនាពេល ខាងមុខ ។
* តើអាចឱ្យដឹងបានទេថា អនាគតភរិយានោះ មានប្រវត្តិយ៉ាងណា ?
– គាត់ជាអ្នកអង្គម្ចាស់ក្សត្រីព្រះនាម ស៊ី-សុវត្ថិ កែវសោមា ករិថរិកា ប្រសូតឆ្នាំ ១៩៧៥ ត្រូវជាបុត្រីច្បងរបស់ព្រះអង្គម្ចាស់ ស៊ីសុវត្ថិដួងសារាវ័ន ជាព្រះបិតា និង ព្រះមាតាព្រះនាម នរោត្តម រង្សី ច័ន្ទតារា ។
* លោកគិតថា នេះគឺជាគូអនាគតពិតប្រាកដ ហើយឬយ៉ាងណា ?
– បាទ ! គឺពិតជាគូអនាគតរបស់ខ្ញុំហើយ បានន័យថា ខ្ញុំសម្រេចចិត្តចូលនឹមហើយ ។ ខ្ញុំ យល់ថា ពេលនេះបានជួប គូស្នេហ៍ពិតហើយគឺទេវតាលោកបានប្រទានដល់ខ្ញុំហើយ ។
* តើមានចំណុចពិសេសអ្វីខ្លះដែលនាំដល់ការ ស្រឡាញ់ពេញចិត្តគ្នាយ៉ាងដូច្នេះ ?
– ចំណុចពិសេសដែលនាំឱ្យខ្ញុំស្រឡាញ់ គ្នាដោយសារឃើញគាត់មានចំណេះខ្ពង់ខ្ពស់ និង មិនចេះប្រកាន់វណ្ណៈ ឋានៈ ទោះជាសែស្រឡាយ រាជវង្សក្តីក៏សុខចិត្តស្រឡាញ់ខ្ញុំដែលជារាស្ត្រ សាមញ ។
* លោកអាចរំឭកឱ្យដឹងបានទេថា ធ្លាប់ជួប រឿងស្នេហ៍ជូរចត់ទេមុនជួបស្នេហ៍ពេលនេះ ?
– ខ្ញុំមិនចង់រំឭក ឡើងវិញរឿង ស្នេហាអតីតកាលទេ និងចាត់ទុកថា នោះជាកម្មពៀ របស់ខ្ញុំទៅចុះ ។ ខ្ញុំក៏សូម អភ័យទោស ចំពោះការដែល មិនបានជួបអ្នក ដែលបាន ស្រឡាញ់ខ្ញុំ ដោយមិនចង់ឱ្យ ខ្លួនមានប្រវត្តិ ស្នេហ៍ច្រើន ព្រោះជា ការមិនល្អ សម្រាប់ ខ្ញុំជា កូនខ្មែរម្នាក់ដែរ ។ ខ្ញុំសុំទោស ជាសាធារណៈ ចំពោះនារីណា ដែលស្រឡាញ់ខ្ញុំ ហើយមិនបាន ជួបគ្នា គឺចាត់ទុកជា កម្មពៀរយើង ពីជាតិមុនមក ។ ដូច្នេះគឺមានតែ នារីណា ដែលបាន ក្រាបក្បាលដល់ កន្ទេលជាមួយខ្ញុំ ឪពុក ម្តាយទាំងសង ខាង បាន ដឹងឮ ទើបខ្ញុំ កំណត់ថា ជាភរិយាខ្ញុំ ពេញច្បាប់ ។
* គេឆ្ងល់ចំពោះ ពាក្យសម្តីរបស់ លោកដែលបាន និយាយថា សន្លប់ជាង ៧ ឆ្នាំ តើចង់សំដៅលើអ្វី រឿងស្នេហា ឬ ក្នុងសិល្បៈ ?
– (សើច) ការដែលខ្ញុំ និយាយនោះ គឺចង់ និយាយថា សន្លប់នៅក្នុង ពិភពសិល្បៈ ប៉ុណ្ណោះ ព្រោះមិនបាន ឡើងច្រៀង បង្ហាញមុខជា សាធារណៈ យូរឆ្នាំមកហើយ ។
ឆោម ប៊ុនយ៉ុង ជាប្អូនប្រុស របស់អ្នកចម្រៀង ជើងចាស់ ឆោម ឆវិន ហើយក៏ត្រូវជា បងប្រុសរបស់ អ្នកចម្រៀង ឆោម និមល ដែរ ។ ជាអ្នកចម្រៀង រូបសង្ហា ហើយធ្លាប់មាន ប្រវត្តិស្នេហ៍ បាក់បែក ជាបន្តបន្ទាប់ រហូតមកដល់ ពេលនេះ ទើបមានភរិយា មិនទាន់ រៀបការ ៕
ខែវិច្ឆិកា 12, 2011 
Download: MP3 | Windows Media
Camnews 