ដោយ : សុខ ភក្តី
ថ្ងៃទី 15 វិច្ឆិកា 2011
CEN
សម្តេចក្រុមព្រះ នរោត្តម រណឫទ្ធិ ពេល ផ្តល់ បទសម្ភាសន៍ ដល់ អ្នកកាសែត The Cambodia Herald កាសែត អន ឡា ញ CEN និង កាសែត រស្មី កម្ពុជា កាលពី ព្រឹក ថ្ងៃទី ១៥ វិច្ឆិកា ឆ្នាំ ២០១១ នៅ ទីស្នាក់ការ គណបក្ស នរោត្តម រណឫទ្ធិ ៕ (រូបថត ៖ ស៊ីវ ចាន់ណា)
ភ្នំពេញ: គណបក្ស នរោត្តម រណឫទ្ធិ បានបង្កើតឡើង កាលពីថ្ងៃទី១៦វិច្ឆិកា ឆ្នាំ២០០៦ តាមរយៈការប្តូរឈ្មោះពីគណបក្សរណសិរ្សជនជាតិខ្មែរ របស់លោក ស៊ុត ឌីណា និងកញ្ញា ស៊ុន សុគន្ធមាលា ដោយជ្រើសតាំងសម្តេចក្រុមព្រះ នរោត្តម រណឫទ្ធិ ជាព្រះប្រធាន។ មកដល់ថ្ងៃទី១៦វិច្ឆិកា ឆ្នាំ២០១១ គឺរយៈពេល ៥ ឆ្នាំគត់។ ក្នុងខួបគម្រប់ ៥ ឆ្នាំ សម្តេចក្រុមព្រះ នរោត្តម រណឫទ្ធិ បានផ្តល់បទសម្ភាសន៍ផ្តាច់មុខ ដល់កាសែតអនឡាញ The Cambodia Herald និង CEN ព្រមទាំងកាសែតរស្មីកម្ពុជា កាលពីព្រឹកថ្ងៃទី១៥វិច្ឆិកា ឆ្នាំ២០១១។
សម្តេចក្រុមព្រះ នរោត្តម រណឫទ្ធិ ពេល ផ្តល់ បទសម្ភាសន៍ ដល់ អ្នកកាសែត The Cambodia Herald កាសែត អន ឡា ញ CEN និង កាសែត រស្មី កម្ពុជា កាលពី ព្រឹក ថ្ងៃទី ១៥ វិច្ឆិកា ឆ្នាំ ២០១១ នៅ ទីស្នាក់ការ គណបក្ស នរោត្តម រណឫទ្ធិ ៕ (រូបថត ៖ ស៊ីវ ចាន់ណា)
សម្តេចក្រុមព្រះ នរោត្តម រណឫទ្ធិ បានមានព្រះបន្ទូលថា ក្រោយពីចូលប្រឡូកឡើងវិញ ក្នុងឆាកនយោបាយ រយៈពេលជិតមួយឆ្នាំ ចាប់ពីថ្ងៃទី១១ធ្នូ ឆ្នាំ២០១០ សម្តេចក្រុមព្រះ នរោត្តម រណឫទ្ធិ បានដាក់ចេញនូវគោលនយោបាយថ្មីមួយ ដែលជានយោបាយកណ្តាល ប្រមែប្រមូលឲ្យមានការរួមគ្នា ដោះស្រាយបញ្ហាជាតិ នៅក្រោមដំបូលរាជបល្ល័ង្គ។ ជារួម បេសកកម្មនយោបាយ សន្តិវិធីរបស់សម្តេចក្រុមព្រះ នរោត្តម រណឫទ្ធិ នៅពេលនេះ គឺប្រមូលអ្នករាជានិយម និងអ្នកជាតិនិយម ហើយមិនប៉ះពាល់គណបក្សប្រឆាំង ជាពិសេសមិនប៉ះពាល់ដល់គណបក្សប្រជាជនកម្ពុជាឡើយ។
សំណួរ៖ ក្នុងរយៈពេល ៥ ឆ្នាំ ដែលគណបក្សនរោត្តម រណឫទ្ធិ បានបង្កើតឡើង រហូតដល់ពេលនេះ តើមានការវិវឌ្ឍរីកចំរើន និងឧបស័គ្គអ្វីខ្លះ?
សម្តេចក្រុមព្រះ នរោត្តម រណឫទ្ធិ៖ មុននឹងធ្វើការបកស្រាយលើសំណួរនេះ ខ្ញុំសូមជម្រាបជូនយ៉ាងខ្លី ពីមូលហេតុនៃការបង្កើតគណបក្ស នរោត្តម រណឫទ្ធិ គឺមកពីការធ្វើបក្សប្រហារពីសំណាក់លោក ញឹក ប៊ុនឆៃ និងក្រុមរបស់លោក ដោយរំលោភលើបទបញ្ជាផ្ទៃក្នុង និងលក្ខន្តិកៈរបស់គណបក្សហ្វ៊ុនស៊ិនប៉ិច។ ការបង្កើតគណបក្សនរោត្តមរណឫទ្ធិ ក្នុងរយៈពេល ៥ ឆ្នាំនេះ គឺជាការចាំបាច់ណាស់ មិនមែនជាការចាំបាច់ ក្នុងន័យសងសឹកទេ។ ខ្ញុំមិនចេះទេ ហើយមិនមានប្រយោជន៍។ តែជាការចាំបាច់ក្នុងបំណងថែរក្សានូវអ្នករាជានិយម អ្នកសីហនុនិយម ដែលពេលនោះ មួយចំនួន មិនទៅតាមលោក ញឹក ប៊ុនឆៃ និងលោក កែវ ពុទ្ធរស្មី ទេ។ ដូច្នេះខ្ញុំគ្មានជម្រើសអ្វី ក្រៅតែពីការបង្កើតគណបក្សនរោត្តមរណឫទ្ធិ ដើម្បីថែរក្សា ប្រមែប្រមូល ដើម្បីកុំឲ្យវាបាត់បង់នូវកេរ្តិ៍តំណែងពីសម្តេចព្រះ នរោត្តម សីហនុ ដែលខ្ញុំបានទទួលនៅឆ្នាំ១៩៩១ ក្នុងក្របខណ្ឌហ្វ៊ុនស៊ិនប៉ិច។ ម្យ៉ាងទៀត ខ្ញុំមើលឃើញថា កម្លាំងរាជានិយម និងសីហនុនិយម នៅរស់រានមានជីវិត ហើយយើងក៏មានបញ្ហាជាតិ ដែលត្រូវដោះស្រាយ។
សម្តេចក្រុមព្រះ នរោត្តម រណឫទ្ធិ ពេល ផ្តល់ បទសម្ភាសន៍ ដល់ អ្នកកាសែត The Cambodia Herald កាសែត អន ឡា ញ CEN និង កាសែត រស្មី កម្ពុជា កាលពី ព្រឹក ថ្ងៃទី ១៥ វិច្ឆិកា ឆ្នាំ ២០១១ នៅ ទីស្នាក់ការ គណបក្ស នរោត្តម រណឫទ្ធិ ៕ (រូបថត ៖ ស៊ីវ ចាន់ណា)
ដូច្នេះ ខ្ញុំក៏ត្រឡប់មកធ្វើនយោបាយវិញ ដើម្បីប្រមែប្រមូលកម្លាំងរាជានិយម ដែលនៅរប៉ាត់រប៉ាយ ដើម្បីក្លាយជាកម្លាំងជាតិដ៏ធំមួយ។ បក្សប្រឆាំងនៅកម្ពុជាយើង ពុំទាន់មានវប្បធម៌ទេ។ ដូច្នេះខ្ញុំនៅតែយល់ថា ដូចសម្តេចតាសម្តេចតាទូត បានមានព្រះរាជឱង្ការ កាលពីថ្ងៃទី៥វិច្ឆិកា ឆ្នាំ២០០៣ ក្នុងការបង្រួបបង្រួម ក្រោយការបោះឆ្នោត។ តែលោកសមរង្ស៊ី មិនព្រមចូលរួមក្នុងរដ្ឋាភិបាលចម្រុះនោះ។
តែឥឡូវយើងប្រមែប្រមូល ខ្ញុំកម្លាំងជាតិអ្នករាជានិយម និងអ្នកសីហនុនិយម បូកនឹងកម្លាំងជាតិមួយទៀត គឺគណបក្សប្រជាជនកម្ពុជា ដើម្បីបម្រើប្រទេសជាតិមាតុភូមិ ហើយទាំងអស់នេះ ក៏ដូចជា ស៊ីចង្វាក់នឹងព្រះរាជឱង្ការរបស់ព្រះករុណា នៅថ្ងៃទី៣០តុលា ឆ្នាំ២០១១ ដែលថា ខ្មែររួបរួមគ្នា ដើម្បីដោះស្រាយបញ្ហាជាតិ។
ក្នុងរយៈពេលជិតមួយឆ្នាំ ក្រោយពីខ្ញុំវិលចូលមកក្នុងឆាកនយោបាយឡើងវិញ (កាលពីថ្ងៃទី១៦វិច្ឆិកា ឆ្នាំ២០១០) គឺខ្ញុំយល់ថា ខ្ញុំដូចជាទទួលបានជោគជ័យមធ្យមក្នុងការប្រមែប្រមូលសម្លេងដែលបែកបាក់ សម្លេងដែលអស់សង្ឃឹម គឺអ្នកសីហនុនិយម អ្នករាជានិយម និងអ្នកស្នេហាជាតិមួយចំនួន នៅក្នុងក្របខណ្ឌគណបក្សនរោត្តម រណឫទ្ធិ។
អំពីឧបស័គធំបំផុត គឺបងប្អូន ដែលចេញពីគណបក្ស ដោយសារអវត្តមានរបស់ខ្ញុំ និងដោយសារតែអវត្តមាននៃគណបក្សរាជានិយមពិតប្រាកដផង លោកក៏ទៅចូលរួមក្នុងគណបក្សសមរង្ស៊ី និងគណបក្សកឹមសុខា ព្រមទាំងគណបក្សមួយចំនួនទៀត។ ដូច្នេះនេះជាឧបស័គ្គរបស់ខ្ញុំ ក្នុងការប្រមែប្រមូលអ្នករាជានិយម និងអ្នកសីហនុនិយម ឲ្យបាននៅក្នុងក្របខណ្ឌតែមួយ គឺគណបក្សនរោត្តម រណឫទ្ធិ។
សំណួរ៖ សម្រាប់ការបោះឆ្នោតឃុំសង្កាត់ នៅឆ្នាំ២០១២ និងការបោះឆ្នោតនៅឆ្នាំ២០១៣ តើព្រះអង្គ បានត្រៀមជាយុទ្ធសាស្ត្រផ្នែកនយោបាយ និងផែនការផ្សេងៗ ដើម្បីយកជ័យជម្នះលើការបោះឆ្នោតនេះ យ៉ាងដូចម្តេច, ក្រាបទូល?
សម្តេចក្រុមព្រះ នរោត្តម រណឫទ្ធិ៖ អ្វីដែលខ្ញុំចាប់ស្ថាបនា អនុវត្តឡើងវិញ គឺការបង្រួបបង្រួមកម្លាំងជាតិ ដែលតំណាងដោយអ្នកសីហនុនិយម អ្នករាជានិយម និងអ្នកស្នេហាជាតិ មិនទាន់បានអនុវត្ត ១០០% ទេ មកដល់ពេលនេះ។ ដូច្នេះយើងត្រូវបន្ត ជាមួយនឹងគោលជំហរច្បាស់។ ទី១-គោលនយោបាយ ដែលយើងបានធ្វើហើយ តែគោលនយោបាយនោះ មានប្រសិទ្ធភាព វាអាស្រ័យលើការអនុវត្ត។ ដូច្នេះខ្ញុំយល់ថា យើងខ្ញុំមានគោលនយោបាយច្បាស់លាស់។ ដូច្នេះខ្ញុំនៅបន្តអាហ្នឹង ដើម្បីចូលរួមការបោះឆ្នោតឃុំសង្កាត់នៅឆ្នាំ២០១២ និងការបោះឆ្នោតជាតិនៅឆ្នាំ២០១៣។ ទី២-រៀបចំរចនាសម្ព័ន្ធ ដោយសារតែយើងនៅខ្វះមធ្យោបាយ គឺយើងមិនអាចរៀបចំរចនាសម្ព័ន្ធឲ្យបាននៅគ្រប់ភូមិនៅឡើយទេ ពីព្រោះយើងត្រូវប្រមែប្រមូលកម្លាំងអស់ទាំងហ្នឹង ដើម្បីចូលរួមការបោះឆ្នោតក្រុមប្រឹក្សាឃុំសង្កាត់។ ទី៣-មធ្យោបាយ គឺយើងនៅខ្វះខាត។
សម្រាប់ការបោះឆ្នោតសកល នៅឆ្នាំ២០១៣ ខ្ញុំមានជំនឿថា ខ្ញុំនឹងប្រមែប្រមូលបាន អ្នករាជានិយម អ្នកសីហនុនិយម និងអ្នកស្នេហាជាតិ ហើយខ្ញុំអត់ទៅយកសម្លេងពីសមរង្ស៊ី និងសម្លេងកឹមសុខាទេ ខ្ញុំគ្រាន់តែសុំសម្លេងរាជានិយម សម្លេងសីហនុនិយម និងសម្លេងអ្នកស្នេហាជាតិ ដែលបានចូលទៅ ដោយសារតែអវត្តមានរបស់ខ្ញុំ និងដោយសារមូលហេតុផ្សេងៗ ចូលទៅនៅគណបក្សទាំងពីរនោះ សុំឲ្យអញ្ជើញត្រឡប់មករួមរស់នៅក្នុងក្របខណ្ឌនៃគណបក្សនរោត្តមរណឫទ្ធិវិញ។ ដូច្នេះគណបក្សរបស់ខ្ញុំ អត់មានទៅយករបស់នរណាទេ។ គណបក្សប្រជាជន រឹតតែលែងប៉ះទៀតហើយ។ សមរង្ស៊ី ក៏មិនប៉ះ។ កឹមសុខា ក៏មិនប៉ះ គ្រាន់តែសុំឲ្យសម្លេងអ្នករាជានិយម អ្នកសីហនុនិយម និងអ្នកស្នេហាជាតិ វិលត្រឡប់មកក្នុងគណបក្សនរោត្តម រណឫទ្ធិវិញ ឲ្យក្លាយទៅជាកម្លាំងជាតិ ដើម្បីបូកជាមួយកម្លាំងជាតិ ( គណបក្សប្រជាជនកម្ពុជា )។ យើងបូកគ្នា ដូចដែលធ្លាប់ធ្វើពីមុន តាមព្រះរាជឱវាទរបស់ព្រះករុណា ខ្ញុំយល់ថា យើងនឹងដោះស្រាយបញ្ហាជាតិបាន។ ដូច្នេះយើងដើរផ្លូវនេះ ដែលជាផ្លូវកណ្តាល គឺយើងមិនទៅគណបក្សប្រជាជនកម្ពុជាទេ ក៏ប៉ុន្តែក៏យើងមិនប្រឆាំងនឹងគណបក្សប្រជាជនដែរ។ ខ្ញុំយល់ថា ផ្លូវប្រឆាំងនឹងគណបក្សប្រជាជន គ្មានប្រសិទ្ធភាព បានត្រឹមតែពិរោះ តែវាពុំមានលទ្ធភាពនឹងដោះស្រាយបញ្ហាជាតិបានទេ។
និយាយសរុបទៅ បើយើងធ្វើតាមព្រះរាជឱវាទរបស់ព្រះករុណាជាអង្គម្ចាស់ កម្លាំងជាតិ បូកនឹងកម្លាំងជាតិ ដើម្បីបម្រើជាតិ និងដោះស្រាយបញ្ហាជាតិ ដូច្នេះខ្ញុំថា នយោបាយកណ្តាលនេះ ប្រហែលជាមានអ្នកគាំទ្រច្រើន ហើយអ្នកខ្លះថា គណបក្សប្រជាជនកម្ពុជា គេមិនត្រូវការយើងទេ តែខ្ញុំមិនយល់អីចឹងទេ ពីព្រោះនៅក្នុងក្របខណ្ឌគណបក្សប្រជាជនកម្ពុជា ក៏មានអ្នកស្នេហាជាតិដែរ។ ប្រសិនបើបូកកម្លាំងទាំងពីរនេះ បញ្ហាដីធ្លី បញ្ហាព្រំដែន បញ្ហាពុករលួយ និងបញ្ហាសង្គម គឺយើងប្រហែលជាអាចដោះស្រាយបញ្ហាទាំងនេះបាន។
ខ្ញុំយល់ថា ខ្ញុំធ្លាប់ធ្វើការជាមួយសម្តេចនាយករដ្ឋមន្ត្រី ហ៊ុនសែន ច្រើនឆ្នាំណាស់ហើយ។ ការជួបគ្នានៅថ្ងៃ៣០តុលា ឆ្នាំ២០១១ អោបថើបគ្នា មិនមែនដើម្បីតែល្អមើលទេ។ ខ្ញុំសូមតែបម្រើជាតិ នៅក្នុងអាយុចុងក្រោយរបស់ខ្ញុំ ពេលនេះ។ ខ្ញុំមិនទៅជាមួយសមរង្ស៊ី និងកឹមសុខាទេ មានតែទៅបូកជាមួយគណបក្សប្រជាជនកម្ពុជាប៉ុណ្ណោះ។ ដូច្នេះមានតែផ្សះផ្សា រួបរួម ក្នុងដំបូលតែមួយ គឺរាជានិយម ដែលខ្ញុំបាននាំមកនៅឆ្នាំ១៩៩៣ ដើម្បីឈានទៅដោះស្រាយបញ្ហារបស់ជាតិ។
សំណួរ៖ ចំពោះការអោបថើប និងទំនាក់ទំនងរវាងសម្តេចនាយករដ្ឋមន្ត្រី និងព្រះអង្គ មកដល់ពេលនេះ តើមានសភាពបែបណាដែរ, ក្រាបទូល?
សម្តេចក្រុមព្រះ នរោត្តម រណឫទ្ធិ៖ នៅពេលជួបនៅក្នុងព្រះរាជពិធី នៅមុខព្រះបរមរាជវាំង មិនបានលើកឡើងពីបញ្ហាជាតិអ្វីទេ ដោយសារតែពេលខ្លី។ តែនៅក្នុងពេលយើងមានបញ្ហាព្រំដែនព្រះវិហារ ជាមួយថៃ គឺសម្តេចនាយករដ្ឋមន្ត្រី បានទូរស័ព្ទមកខ្ញុំ រយៈពេល ១ ម៉ោង ដើម្បីលើកឡើងពីអ្វីដែលសម្តេចបានធ្វើ ដើម្បីដោះស្រាយបញ្ហាព្រះវិហារ ផ្លូវយោធា ផ្លូវទូតផង និងផ្លូវច្បាប់ផង។ ដូច្នេះខ្ញុំយល់ថា បើសិនជាសម្តេចនាយក លោកមិនឯកភាពនូវអ្វីមួយដែលខ្ញុំកំពុងតែធ្វើ ក្នុងការប្រមែប្រមូលកម្លាំងរាជានិយម និងជាតិនិយមនោះ គឺសម្តេចមិនទូរស័ព្ទមកខ្ញុំទេ។ គណបក្សនរោត្តមរណឫទ្ធិ បានចេញសេចក្តីថ្លែងការណ៍គាំទ្រសម្តេចក្នុងការដោះស្រាយបញ្ហាព្រំដែនជាមួយថៃ។ សម្តេចក៏បានឆ្លងឆ្លើយលិខិត ដែលមានទាំងសរសេរផ្ទាល់ដៃ មកខ្ញុំផងដែរ។ លោក កឹមសុខា ថា ឥឡូវគេបញ្ចេញអ្នកនយោបាយកញ្ចាស់មួយមក ដើម្បីបំបែកសម្លេងអ្នកប្រជាធិបតេយ្យរបស់យើង។ តែខ្ញុំសូមជម្រាបថា អ្នកនយោបាយនេះ ជើងចាស់មែន ព្រោះ ៦៧ , ៦៨ ហើយ។ តែខ្ញុំយល់ថា សម្តេចហ៊ុនសែន ដែលជាអ្នកនយោបាយជើងចាស់ដែរនោះ បើតាមសម្តេចឳ… ខ្ញុំប្រមែប្រមូលសម្លេង ដែលរប៉ាប់រប៉ាយ ដើម្បីទៅដោះស្រាយបញ្ហាជាតិ។ ដូច្នេះខ្ញុំយល់ថា សម្តេចឳ ព្រះករុណា និងសម្តេចនាយករដ្ឋមន្ត្រី ហ៊ុនសែន លោកយល់ថា បើយើងមានឱកាស ក្នុងការបង្រួបបង្រួមជាតិ កម្លាំងលោក កម្លាំងអ្នករាជានិយម នៅក្នុងដំបូលរាជបល្ល័ង្គ ខ្ញុំថានេះជាឱកាសផ្តល់ឲ្យខ្មែរ ដោះស្រាយបញ្ហាខ្មែរ។ កំហុសរបស់លោកសមរង្ស៊ី ដែលជាទម្លាប់អាក្រក់របស់គាត់ គឺស្អីឡើង គាត់ពឹងបរទេស។ តែខ្ញុំមិនដែលឃើញបរទេសណា មកជួយខ្មែរទេ។ មានតែខ្មែរទេ ជួយខ្មែរ។ ម្លោះហើយ ខ្ញុំយល់ថា សម្តេចនាយករដ្ឋមន្ត្រី ហ៊ុនសែន និងគណបក្សប្រជាជនកម្ពុជា បើចង់ឲ្យកម្ពុជាមានរស្មីឡើងវិញ ទាល់តែធ្វើតាមព្រះរាជឱង្ការរបស់ព្រះករុណា ក្នុងការរួបរួមគ្នា បូកកម្លាំងជាតិ នៅក្រោមដំបូលរាជបល្ល័ង្គ។ មិនមែនក្បត់ជាតិ មិនមែនជានយោបាយបំបែកបំបាក់ មិនមែនជានយោបាយធ្វើឲ្យជាតិវេទនា បង្ហូរឈាមទេ។
សំណួរ៖ ចំពោះការប្រមែប្រមូលអ្នករាជានិយម និងអ្នកជាតិនិយម មកដល់ពេលនេះ តើមានកម្រិតបែបណាហើយ, ក្រាបទូល?
សម្តេចក្រុមព្រះ នរោត្តម រណឫទ្ធិ៖ អ្នករាជានិយម និងអ្នកជាតិនិយម បើសិនជាប្រមែប្រមូលបាន គឺជាកម្លាំងទី២ នៅកម្ពុជា។ អាសនៈ នៅក្របខណ្ឌក្រុមប្រឹក្សាឃុំសង្កាត់ មានអាសនៈតិចបំផុត នាពេលខាង អាចកើនដល់យ៉ាងគុណនឹង៣ នៃចំនួនអាសនៈរបស់គណបក្សនរោត្តម រណឫទ្ធិ ដែលមានសព្វថ្ងៃ ៤២៥នាក់។ ចំណែកការបោះឆ្នោតជាតិឆ្នាំ២០១៣ គឺគណបក្សនរោត្តមរណឫទ្ធិ ដែលជាសម្លេងអ្នករាជានិយម និងអ្នកសីហនុនិយម នឹងក្លាយជាកម្លាំងជាតិទី២។
សំណួរ៖ អ្វីដែលចង់យកពិសោធន៍នៅពិភពអារ៉ាប់ ដែលគេប្រើជាបដិវត្តផ្កាម្លឹះ ដើម្បីផ្តួលរំលំរដ្ឋាភិបាលផ្តាច់ការនោះ តើព្រះអង្គមានព្រះតម្រិះបែបណា សម្រាប់កម្ពុជា ក្នុងបរិបទពេលនេះ?
សម្តេចក្រុមព្រះ នរោត្តម រណឫទ្ធិ៖ កុំកុំកុំ…! ពួកនោះ គេធ្វើបាន ព្រោះគេមិនដែលស្គាល់អាប៉ុលពត វេទនាយ៉ាងម៉េចផង? ខ្មែរវេទនា។ ចង់ឲ្យវេទនាជាងនេះទៀត? នៅខ្មែរបើហ៊ានធ្វើបដិវត្តនោះ នឹងកើតសង្គ្រាម វេទនាជាមិនខាន។ តើយើងទៅធ្វើរបៀបអារ៉ាប់ យ៉ាងម៉េច ឲ្យវេទនាទៀត? យើងត្រូវដោះស្រាយបញ្ហាជាតិ តាមការផ្សះផ្សាបង្រួបបង្រួមជាតិ កម្លាំងជាតិពីរ ( គណបក្សនរោត្តមរណឫទ្ធិ និងប្រជាជនកម្ពុជា ) ហើយបើសម្តេចនាយករដ្ឋមន្ត្រីថា សមរង្ស៊ី និងកឹមសុខា អញ្ជើញចូលមក ប្រហែលជាឪយើងស្វាគមន៍ដែរ។ ប៉ុន្តែចាប់ផ្តើមឡើង កម្លាំងជាតិដែលធំជាងគេ ដែលត្រូវតែប្រមែប្រមូល ត្រូវតែបាន ហើយឲ្យទាល់តែបាន គឺកម្លាំងអ្នករាជានិយម និងកម្លាំងជាតិដែលគេកំពុងដឹកនាំជាតិ។
បដិវត្តផ្កាម្លិះនៅអារ៉ាប់ ទុយណេហ្ស៊ី អេស៊ីប លីប៊ី ស្លាប់ច្រើន និងនាំឲ្យអស្ថេរភាពសង្គម និងមិនអាចដោះស្រាយបញ្ហាបានទេ។ តែយើងដោះស្រាយដោយផ្លូវសន្តិភាព សន្តិសុខ ហើយបើបាន ក្នុងផ្លូវផ្សះផ្សាជាតិរឹតតែល្អណាស់។
សំណួរ៖ អីចឹងតើព្រះអង្គមានព្រះទ័យបែបណា ចំពោះអ្នកណា ដែលមាននយោបាយ ចង់ឲ្យមានបដិវត្ត នៅកម្ពុជា?
សម្តេចក្រុមព្រះ នរោត្តម រណឫទ្ធិ៖ ខ្ញុំមិនគាំទ្រជាដាច់ខាត។
សំណួរ៖ សម្រាប់ការបោះឆ្នោតឃុំសង្កាត់ នៅឆ្នាំ២០១២ និងការបោះឆ្នោតជាតិឆ្នាំ២០១៣ គណបក្សព្រះអង្គ បានត្រៀមខ្លួនរួចហើយ។ តែសម្រាប់ការបោះឆ្នោតព្រឹទ្ធសភា នៅដើមឆ្នាំ២០១២ វិញ តើយ៉ាងដូចម្តេចដែរ ក្រាបទូល?
សម្តេចក្រុមព្រះ៖ គ្មានទេៗ។ ជម្រាបត្រង់ថា យើងខ្ញុំគ្មានបេក្ខជន ពីព្រោះដាក់ទៅធ្វើអី បើសម្លេងមិនគ្រប់គ្រាន់ផង។
សំណួរ៖ ចំពោះគណបក្សសមរង្ស៊ី ដែលចង់ធ្វើពហិការ មិនចូលរួមប្រជុំរដ្ឋសភា ដើម្បីរារាំងដល់កិច្ចប្រជុំរដ្ឋសភា ចំពោះការអនុម័តសេចក្តីព្រាងច្បាប់ថវិកាជាតិ ឆ្នាំ២០១២ តើព្រះអង្គ ក្នុងនាមជាអតីតប្រធានរដ្ឋសភា មានព្រះតម្រិះបែបណា ថាតើលើទិដ្ឋភាពច្បាប់ គាត់មានសិទ្ធិធ្វើដូច្នោះឬទេ, ក្រាបទូល?
សម្តេចក្រុមព្រះ នរោត្តម រណឫទ្ធិ៖ នេះជាទម្លាប់របស់គណបក្សគាត់ កាលពីក្នុងឋានៈខ្ញុំជាប្រធានរដ្ឋសភា បាន២អាណត្តិដែរនោះ គឺខ្ញុំអ្នកផ្តល់នូវភាពប្រជាធិបតេយ្យពិតប្រាកដ បើកឲ្យមានប្រសាសន៍តាមចិត្ត នៅក្នុងកិច្ចប្រជុំរដ្ឋសភា។ ប៉ុន្តែខាងលោកសមរង្ស៊ី បានរិះគន់រដ្ឋសភា ទិតៀនស្ថាប័នជាតិ ហើយខ្ញុំឲ្យគាត់និយាយប៉ុណ្ណឹងហើយ គាត់ឲ្យតែអ្វីដែលមិនពេញចិត្ត គាត់ដើរចេញ។ ឥឡូវគាត់ធ្វើអីចឹងទៀត។ ដូច្នេះជាទម្លាប់របស់គាត់។ តែតាមការបកស្រាយរបស់ក្រុមប្រឹក្សាធម្មនុញ្ញរួចហើយ គឺគាត់ទៅចុះ បើគាត់ដើរចេញទៅ។ ចំពោះការកំណត់ក្នុងរដ្ឋធម្មនុញ្ញថា ឲ្យមានសមាជិករដ្ឋសភា ១២០ រូប គឺចំនួនសមាជិករដ្ឋសភា ១២០ រូប ពេលដែលរដ្ឋសភាបើកកិច្ចប្រជុំលើកទី១។ តែក្រោយមកមិនគិតទេ។ ម្យ៉ាងទៀត បើគាត់លាលែងនោះ នឹងមានការយកអាសនៈរបស់គណបក្សសមរង្ស៊ី ទៅចែកដល់គណបក្សផ្សេងហើយ។ ចំពោះការលើកឡើងរបស់លោកសមរង្ស៊ី ឲ្យអន្តរជាតិគាបសង្កត់ ពិសេសលោកអូប៉ាម៉ា ដាក់ការគាបសង្កត់លើកម្ពុជានោះ គឺមិនមានប្រសិទ្ធភាពទេ គឺគេរវល់បញ្ហាធំៗរបស់គេច្រើនណាស់។ ដូច្នេះខ្ញុំយល់ថា បើគាត់ដើរចេញពីរដ្ឋសភា នោះជាទម្លាប់របស់គាត់ ហើយគាត់មិនគោរពរដ្ឋធម្មនុញ្ញ ដែលជាប់ឆ្នោត ជាតំណាងរាស្ត្រ។ ដូច្នេះខ្ញុំសូមជម្រាប អារឿងបដិវត្តផ្កាម្លិះ គឺខ្ញុំមិនគាំទ្រ។ ចំណែករឿងដើរចេញពីរដ្ឋសភា ខ្ញុំយល់ថា មិនត្រូវ ក៏ប៉ុន្តែនេះជារឿងរបស់គាត់។
សំណួរ៖ ការវិលត្រឡប់របស់ព្រះអង្គ ចូលក្នុងឆាកនយោបាយឡើងវិញពេលនេះ ដោយសារថា ព្រះអង្គមានឈាមជ័រជាអ្នកនយោបាយ ដោយសារបន្តពីសម្តេចឪ ហើយឈាមជ័រនោះ នៅតែជាប់នៅព្រះកាយព្រះអង្គ តើព្រះអង្គនឹងអាចដកថយវិញទេ នៅពេលនេះ?
សម្តេចក្រុមព្រះ នរោត្តម រណឫទ្ធិ៖ ទី១-ខ្ញុំយល់ថា កើតមកជាស្តេច មិនមែនមានតែសំណាងទេ តែមានតួនាទី ករណីកិច្ច និងកាតព្វកិច្ចជាពិសេសបម្រើរាស្ត្រ ក្នុងផ្លូវណាធ្វើបាន ខ្ញុំធ្វើ។ ទី២-ចំណែកខ្លួនខ្ញុំ ឈាមជ័រ ដោយសារស្តេច ហើយឈាមជ័រទី២ ចំកូនសម្តេចឪទៅទៀត ដែលធ្លាប់តែបម្រើជាតិ។ ដូច្នេះរហូតមកដល់ពេលនេះ ជាពេលចុងក្រោយរបស់ខ្ញុំ ខ្ញុំយល់ថា ខ្ញុំត្រូវបំពេញតួនាទីនេះ ដង្ហែឪ ទាល់តែដល់ចុងក្រោយ។ ព្រះរាជឱង្ការរបស់ព្រះអង្គ ដូចជាការផ្តាំផ្ញើនយោបាយ កាលពីថ្ងៃទី៣០តុលា ឆ្នាំ២០១១។ ខ្ញុំយល់ថា ចុងក្រោយបង្អស់ ខ្ញុំធ្លាប់តែបម្រើជាតិ ដូច្នេះពេលណា ដែលខ្ញុំឃើញថា កម្លាំងរាជានិយម អ្នកសីហនុនិយមពិតប្រាកដ ជាកម្លាំងជាតិ។ ស្រុកគេមានតែបក្សប្រឆាំង និងកាន់អំណាច។ តែយើងមានផ្លូវកណ្តាល ដើម្បីបូកជាមួយកម្លាំងជាតិមួយទៀត។ ជាចុងក្រោយខ្ញុំយល់ថា កើតមកជាព្រះរាជបុត្រ ដែលធ្លាប់តែបម្រើព្រះអង្គ។ អ្នករាជានិយម ក្នុងការបម្រើជាតិរបស់ខ្ញុំ មិនច្បាំង និងបង្ហូរឈាមអ្វីទេ៕
..