ដោយ : សេសាន
ថ្ងៃទី 12 វិច្ឆិកា 2011
CEN
ក្រចេះ: បន្ទាប់ពីចាប់បានរថយន្តដឹកឈើទាំង ៧ គ្រឿង របស់ក្រុមហ៊ុនដីសម្បទាន សេដ្ឋកិច្ច ហ័ងអាន ម៉ាយ៉ាខេ ដឹកឈើអារពីខេត្តរតនគិរី យកមករក្សាទុកមួយរយៈពេលខ្លីនោះ លោកមេព្រៃខេត្តក្រចេះ បានរកឃើញថា ឈើទាំងនោះ សុទ្ធតែលើសពីលិខិតដឹកជញ្ជូន។ ការរកឃើញនេះ បន្ទាប់ពីសមត្ថកិច្ចចម្រុះ បានឆែកឆេរផ្ទៀងផ្ទាត់ចំនួនឈើក្នុងរថយន្តទាំងនោះ នៅថ្ងៃទី១២វិច្ឆិកា ឆ្នាំ២០១១។
លោក អ៊ឹម សំណាង នាយរងផ្នែកខណ្ឌរដ្ឋបាលព្រៃឈើខេត្តក្រចេះ បានដឹកនាំកម្លាំងសមត្ថកិច្ចធ្វើការឃាត់ទុករថយន្តដឹកឈើធំៗចំនួន ៧ គ្រឿង នៅតាមផ្លូវជាតិលេខ៧ ផ្លូវចូលក្រុមហ៊ុនដីសម្បទានសេដ្ឋកិច្ច ហ្គ្រីន អាយលែន ត្រង់ចំណុចស្រែស្បូវ ឃុំក្បាលដំរី ស្រុកសំបូរ ខេត្តក្រចេះ កាលពីយប់ថ្ងៃទី៩ ខែវិច្ឆិកា ឆ្នាំ២០១១។ សមត្ថកិច្ចបាននាំមកឡានដឹកឈើទាំងនោះ ទៅឆែកឆេរនៅកន្លែងបណ្តុះកូនឈើផ្នែកក្រចេះ នៅភូមិខ្សារ ឃុំដារ ស្រុកចិត្របុរី ខេត្តក្រចេះ។ ក្បូនឡានដឹកឈើធំៗទាំង ៧ គ្រឿងនេះ ចេញពីស្រុកវ៉ឺនសៃ ខេត្តរតនគិរី។
ទោះបីយ៉ាងណាក៏ដោយ មេព្រៃមិនទាន់បញ្ជាក់ពីចំនួនឈើអារ ដែលដឹកលើសពីចំនួនកំណត់នៅឡើយទេ។ ប៉ុន្តែតាមការពិនិត្យជាក់ស្តែងក្នុងរថយន្តនិមួយៗ ដឹកឈើអាចលើសពី ៥ ម៉ែត្រគូប ទៅ ៧ ម៉ែត្រគូប៕
No comments yet... Be the first to leave a reply!