ដោយ : រតនា
ថ្ងៃទី 11 វិច្ឆិកា 2011
CEN
ភ្នំពេញ: លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប កាលពីថ្ងៃទី៤ ខែវិច្ឆិកា ឆ្នាំ២០១១ បានផ្ញើរបាយការណ៍លម្អិតជូនសម្តេចតេជោ ហ៊ុន សែន នាយករដ្ឋមន្ត្រី ដោយបានសរសេររៀបរាប់ពីរឿងពុករលួយ ក្នុងការដេញថ្លៃឡូត៍នេសាទ គិតចាប់តាំងពីថ្ងៃទី២៥ ខែតុលា ឆ្នាំ២០១១។
របាយការណ៍ ដែលអ្នកកាសែតទទួលបាននូវថ្ងៃទី១១វិច្ឆិកា ឆ្នាំ២០១១ បង្ហាញថា អាជ្ញាធរទន្លេសាប បានចូលរួមដេញថ្លៃឡូត៍នេសាទ ទាំងឡូត៍ធ្វើអាជីវកម្ម និងទាំងឡូត៍វិនិយោគ បានចំនួន ៤លើក។ ក្នុងនោះ នៅរាជធានីភ្នំពេញ មានចំនួន ២លើក ផ្នែកឡូត៍អាជីវកម្ម ខេត្តកណ្តាលចំនួន ១លើក ជាឡូត៍អាជីវកម្ម និងនៅក្រសួងកសិកម្ម ចំនួន ១ លើក ជាឡូត៍វិនិយោគ។
លោក លឹម គានហោ បានជំរាបជូនសម្តេច ហ៊ុន សែន ថា ការដេញថ្លៃឡូត៍នេសាទទាំង ៤លើកនោះ អាចនិយាយបានថា ជាមោទនភាពរបស់អាជ្ញាធរទន្លេសាប ដែលបានចូលរួមដេញថ្លៃជាលើកដំបូង ហើយដែលជាលទ្ធផល គឺកំណើនថវិកាជាតិ ទទួលបានយ៉ាងច្រើន ពីជា៤ ទៅ ៥ ដង ដែលមិនធ្លាប់មានពីមុន។
ប៉ុន្តែទន្ទឹមនឹងលទ្ធផលជាវិជ្ជមាននេះ អាជ្ញាធរទន្លេសាបបានកត់សំគាល់ពីភាពមិនប្រក្រតីរបស់គណៈកម្មការដេញថ្លៃ ដែលចាំបាច់ត្រូវតែធ្វើការកែសម្រួលជាបន្ទាន់ បើពុំនោះទេ ចំណូលរដ្ឋនៅតែបាត់បង់ ឯបញ្ហានានា ដូចការចោទប្រកាន់អំពីអំពើពុករលួយ នៅក្នុងការដេញថ្លៃ បានលេចឮឡើងបន្ទាប់ពីការដេញថ្លៃរួចម្តងៗ។
លោក លឹម គានហោ បានលើកឡើងបញ្ជាក់អំពីនីតិវិធីនៃការដេញថ្លៃឡូត៍ ដែលមានភាពមិនប្រក្រតី ដោយបញ្ជាក់ជូនសម្តេចហ៊ុនសែន ថា មាននីតិវិធីជាច្រើន បានចន្លោះប្រហោង និងបានបើកចំហរ។ ប្រសិនបើនីតិវិធីបើកចំហររបៀបនេះ ចាំបាច់ ចូលដេញថ្លៃធ្វើអី្វ? តើអ្នកណានឹងចូលដេញថ្លៃ? គឺរង់ចាំការចរចាថ្លៃវិញ វាស្រួលជាង ហើយចំណេញទាំងសងខាង។
នៅក្នុងបញ្ហានេះ អាជ្ញាធរទន្លេសាប ដែលបានចូលរួមនៅក្នុងការដេញថ្លៃឡូត៍ជាលើកដំបូង បានស្នើឲ្យគណៈកម្មការបដិសេធចោលទាំងស្រុងនូវនីតិវិធីនេះ ហើយបើតម្លៃព្យួរ ដែលបានកំណត់ ដែលគ្មានអ្នកចូលរួមដេញថ្លៃទេ សូមឲ្យរក្សាទុក ជាសម្បត្តិរដ្ឋ ដូច ឡូត៍ទាំង ៣៥ នៅជំវិញបឹងទន្លេសាបដែរ។
ក្នុងរបាយការណ៍ដដែលនោះ លោក លឹម គានហោ ក៏បានលើកឡើងអំពីនីតិវិធីនៃការដេញថ្លៃឡូត៍នេសាទអាជីវកម្ម និងឡូត៍វិនិយោគ ដោយបានបញ្ជាក់ថា បើទោះបីជាការដេញថ្លៃឡូត៍វិនិយោគពេលនេះ ចំណូលកើនឡើង ៥ដង លើសពីចំណូលមុនក៏ដោយ ប៉ុន្តែអាជីវករមួយចំនួន នៅតែមិនអស់ចិត្ត និងធ្វើការចោទប្រកាន់មកលើគណៈកម្មការថា មានការឃុបឃិតគ្នា និងមានការរៀបចំទុកជាមុន ជាដើម។ ឧទាហរណ៍ឡូត៍លេខ ២ នៅកំពង់ចាម អាជីវករខ្លះ បានលើកឡើងថា គាត់ហ៊ានដេញថ្លៃដល់ទៅ ៣៣០ លានរៀល ហេតុអ្វីមិនបាន បែរជាបានទៅអ្នកហ៊ានថ្លៃត្រឹមតែ ៣១៥ លានរៀល ទៅវិញ?
ករណីនេះ ត្រូវបានលោក លឹម គានហោ លើកឡើងអំពីនីតិវិធី ដំណោះស្រាយថា ដើម្បីឲ្យការដេញថ្លៃឡូត៍នេសាទគ្រប់ប្រភេទ អាចរកចំណូលចូលរដ្ឋ សមស្របទៅតាមស្ថានភាព គឺរដ្ឋបាលជលផល ត្រូវតែរៀបចំផែនការវិនិយោគទុន ឲ្យបានច្បាស់លាស់ រួមទាំងទុនត្រូវចំណាយមុន និងយកឡូត៍វិនិយោគ ដាក់ដេញថ្លៃ។
លោក លឹម គានហោ បានបញ្ជាក់ជូនសម្តេចតេជោ ហ៊ុន សែន ទៀតថា ចំពោះការដេញថ្លៃបំប៉ោង ពុំគួរគណៈកម្មការ មានការព្រួយបារម្ភទេ ព្រោះថា មុននឹងចូលដេញថ្លៃ ពាក្យសុំចូលដេញថ្លៃ បានតម្រូវឲ្យអាជីវករតម្កល់ប្រាក់ ៣០% នៃតំលៃព្យួររួចទៅហើយ ហើយប្រាក់កក់នោះទៀតសោត នឹងត្រូវរឹបអូស ទុកជាសម្បត្តិរដ្ឋ ប្រសិនបើអាជីវករដេញបានហើយ បែរជាមិនព្រមអនុវត្តន៍ការងារទៅវិញ។
របាយការណ៍ បានលើកឡើងថា វាពិបាកនឹងជឿណាស់ថា អាជីវករសុខចិត្តចំណាយថវិកាចោល ៣០% ដើម្បីធ្វើឲ្យខូចផែនការវិនិយោគ។ ប៉ុន្តែបើមានមនុស្សខូចបែបនេះ ទៅចុះឈ្មោះ ក៏យើងនៅមានមធ្យោបាយទប់ទល់ដែរ នោះគឺតម្លើងប្រាក់កក់ឲ្យខ្ពស់មានន័យថា ប្រាក់កក់អាចតម្លើងរហូតដល់ ៧០% ឬ ១០០% នៃតម្លៃព្យួរតែម្តង។
លោក លឹម គានហោ បានស្នើដល់សម្តេចតេជោ ហ៊ុន សែន តម្រូវឲ្យមានការអនុវត្ត តាមសៀវភៅបន្ទុក ឲ្យបានត្រឹមត្រូវ និងអនុវត្តទៅតាមច្បាប់។
បន្ទាប់ពីទទួលបានរបាយការណ៍ខាងលើនេះ សម្តេច ហ៊ុន សែន បានចារផ្ទាល់ដៃលើរបាយការណ៍ កាលពីថ្ងៃទី៧ ខែវិច្ឆិកា ឆ្នាំ២០១១ ដោយបញ្ជាឲ្យលោកឧបនាយករដ្ឋមន្ត្រី ប៊ិន ឈិន ដែលទទួលបន្ទុក កិច្ចការឡូត៍នេសាទ ពិនិត្យដើម្បីកែសម្រួលចំពោះអនុក្រឹត្យ ពាក់ព័ន្ធនឹងការដេញថ្លៃឡូត៍នេសាទ៕
No comments yet... Be the first to leave a reply!