ខែវិច្ឆិកា 11, 2011 
ដោយ : រតនា
ថ្ងៃទី 11 វិច្ឆិកា 2011
CEN
ភ្នំពេញ: នៅថ្ងៃទី១១ វិច្ឆិកា ឆ្នាំ២០១១ លោកវរសេនីយ៍ត្រី មាន សំណាង អធិការនគរបាលស្រុកអង្គស្នួល ខេត្តកណ្តាល បានបំភ្លឺពីការចោទប្រកាន់របស់លោក ព្រហ្ម ម៉ាញ កាលពីថ្ងៃទី៩ វិច្ឆិកា ឆ្នាំ២០១១ តាមរយៈទូរទស្សន៍អាស៊ីអាគ្នេយ៍ ដែលលោក ព្រហ្ម ម៉ាញ ថា អធិការនគរបាល ស្រុកអង្គស្នួល ទារលុយពីគាត់ ៥០០ ដុល្លារ ជាមួយអ្នកកាសែតនោះ គឺពុំមានការពិតទេ ហើយចំពោះឡាន ដែលបុកនោះ ក៏រូបលោក ពុំបាននិយាយថា ជាឡានរបស់លោក ព្រហ្ម ម៉ាញ ដែរ។
លោក មាន សំណាង បានឲ្យដឹងថា ការដោះស្រាយរវាងភាគីទាំងសងខាង គឺខាងលោក ពុំបានដោះស្រាយទេ ពីព្រោះសំណុំរឿងទាំងអស់ បានបញ្ជូនទៅការិយាល័យជំនាញ នៃស្នងការដ្ឋាននគរបាលខេត្តកណ្ដាល។
លោកអធិការបន្តថា នៅពេល ដែលភាគីខាងរថយន្ដ មកយករថយន្ដនោះ លោក ព្រហ្ម ម៉ាញ បានឲ្យលុយ ២០ ដុល្លារ មកផ្នែកជំនាញចរាចរណ៍ស្រុកអង្គស្នួល ដោយគាត់និយាយថា “ឃើញបងៗ សមត្ថកិច្ចចរាចរណ៍ មានការនឿយហត់”។
លោកអធិការបានបន្ថែមថា “នៅថ្ងៃទី១៧ ខែតុលា ឆ្នាំ២០១១ វេលាម៉ោងប្រហែល ៩ព្រឹក លោក ព្រហ្ម ម៉ាញ បានមកជួបរូបខ្ញុំបាទមែន ( អធិការ ) ដោយគាត់និយាយថា ឲ្យជួយរកវិធីដោះស្រាយរឿងគ្រោះថ្នាក់ចរាចរណ៍នោះផង។ ឯការទារលុយពីគាត់ ៥០០ ដុល្លារ ដែលចែកជាមួយអ្នកកាសែតនោះ ខ្ញុំពុំបានទារទេ ក្នុងនាមនគរបាលស្រុកអង្គស្នួល សូមបដិសេធន៍”។
របាយការណ៍គ្រោះថ្នាក់ចរាចរណ៍ នៃស្នងការដ្ឋាននគរបាលខេត្តកណ្ដាល បានបញ្ជាក់ថា កាលពីថ្ងៃទី១៦ ខែតុលា ឆ្នាំ២០១១ វេលាម៉ោង ១៨ និង ២០នាទី លើផ្លូវជាតិលេខ៤ ចំណុចមុខភូមិត្រពាំងឈើនាង ឃុំពើក ស្រុកអង្គស្នួល ខេត្តកណ្ដាល មានរថយន្ដ ១គ្រឿង បានបើកបរមកពីទិសខាងលិច ឆ្ពោះទៅទិសខាងកើត លុះមកដល់ចំណុចកើតហេតុខាងលើ បានបុកជាមួយម៉ូតូ ១គ្រឿង ម៉ាក វីវ៉ា ពណ៌ខ្មៅ ពាក់ស្លាកលេខ ភ្នំពេញ 1N 3800 បើកបរដោយឈ្មោះ ម៉ៅ មីនា ភេទប្រុស អាយុ ២៣ឆ្នាំ មានទីលំនៅស្រុកបរិបូរណ៍ ខេត្តកំពង់ឆ្នាំង ដែលបើកបរ មកពីកើតទៅលិច បណ្ដាលឲ្យរបួសបាក់ជើងម្នាក់ និងស្រាលម្នាក់។
ក្រោយពេលកើតហេតុរថយន្ដនោះ បានបើករត់ឆ្ពោះទៅទិសខាងកើតបាត់ទៅ បន្ទាប់មកអធិការដ្ឋាននគរបាលស្រុកអង្គស្នួល បានទទួលព័ត៌មាន តាមអាយឌី របស់កម្លាំង PM ក្រុងភ្នំពេញ និងទទួលព័ត៌មាន បានពីនគរបាលចរាចរណ៍ក្រុងភ្នំពេញ ( ចំណុចស្ពានអាកាស មន្ទីរពេទ្យលោកសង្ឃ ) បានឃាត់រថយន្ដម៉ាក CHEVROLET ពណ៌ខ្មៅ ពាក់ស្លាកលេខបណ្ដោះអាសន្ន ១៥៩១។
ពេលនោះផ្នែកជំនាញចរាចរណ៍អធិការដ្ឋាននគរបាលស្រុកអង្គស្នួល បានទៅទទួលយករថយន្ដ ពីនគរបាលចរាចរណ៍ក្រុងភ្នំពេញ។
តាមការបំភ្លឺរបស់ឈ្មោះ រ៉ាត់ នគរបាលចរាចរណ៍ក្រុង តាមទូរស័ព្ទ ពេលនោះបានឃើញ លោក ព្រហ្ម ម៉ាញ ចេញពីរថយន្ដ បានឡើងជិះម៉ូតូឌុបចេញបាត់ទៅ។
តាមការបំភ្លឺរបស់លោក ព្រាប សុផា នាយផ្នែកចរាចរណ៍ ពេលនោះ ពុំបាននិយាយគ្នាដោះស្រាយអ្វីទេ គ្រាន់តែលោកនាយកផ្នែក និយាយថា មានអ្នកកាសែតអង្គុយនៅខាងក្រៅ។ លោកព្រហ្ម ម៉ាញ បាននិយាយថា លោកមិនចង់ជួបពួកអស់ហ្នឹងទេ ក្រោយមកលោក ព្រហ្ម ម៉ាញ បានចេញពីអធិការដ្ឋាននគរបាលស្រុក បាត់ទៅ។ លុះមកដល់ម៉ោងប្រហែល ១១ ថ្ងៃត្រង់ មានឈ្មោះ ឈុំ ឆុំ ក្រុមប្រឹក្សាស្រុកអង្គស្នួល បានប្រាប់លោក ព្រាប សុផា ថា មានលុយ ២០០ដុល្លារ សម្រាប់ដោះស្រាយរឿងនេះ តែលោកអធិការឆ្លើយថា លោកមិនហ៊ានទេ។
ក្រោយមកលោកអធិការ បានបញ្ជូនសំណុំរឿងទៅជំនាញចរាចរណ៍ខេត្តកណ្ដាល។ ឯការដោះស្រាយគ្នានោះ ខាងអធិការដ្ឋាននគរបាលស្រុកអង្គស្នួល ពុំបានដោះស្រាយទេ។ លុះដល់ម៉ោង ១៥ ទៅម៉ោង ១៦រសៀល ក៏ឃើញភាគីខាងរថយន្ដ កាន់ចំណារលោកនាយការិយាល័យចរាចរណ៍ខេត្តកណ្ដាល ឲ្យយករថយន្ដបង្កហេតុចេញ។ ពេលនោះភាគីខាងរថយន្ដ បានយកលុយចំនួន ២០ ដុល្លារ មកឲ្យផ្នែកជំនាញចរាចរណ៍ស្រុកអង្គស្នួល ដោយនិយាយថា “ឃើញបងៗ ហត់ពេក” ៕
Camnews 
No comments yet... Be the first to leave a reply!