លោក ព្រហ្ម ម៉ាញ រត់ឡើងជិះ​ ម៉ូតូឌុបគេចខ្លួន ខណះសមត្ថកិច្ច ចាប់ឃាត់រថយន្ត បន្ទាប់ពីបង្ក គ្រោះថ្នាក់ចរាចរ

Friday, 11 November 2011
ដោយៈ លឹម ជាវុត្ថា
DAP NEWS

កណ្តាល៖ លោក មាន សំណាង អធិការ​ស្រុក អង្គស្នួល បាននិយាយដោយ អះអាងតាម សមត្ថកិច្ច ចរាចររាជធានី ភ្នំពេញមួយរូប បានប្រាប់ លោកថា លោក ព្រហ្ម ម៉ាញ បានរត់ឡើង ជិះម៉ូតូឌុប ចេញពីរថយន្ត នៅពេលសមត្ថកិច្ច​ រាជធានីភ្នំពេញ ចាប់ ឃាត់រថយន្ត របស់លោក នៅចំណុច ក្បែរស្ពានអាកាស ស្តុប មន្ទីរពេទ្យ លោកសង្ឃ បន្ទាប់ពីរថយន្ត របស់លោក បានបុកអ្នកជិះម៉ូតូ ពីរនាក់​ឲ្យ របួសធ្ងន់ នៅតាមបណ្តោយ ផ្លូវជាតិលេខ៤ ភូមិត្រពាំងរនោច ឃុំពើក ស្រុកអង្គស្នួល ខេត្តកណ្តាល ខណៈ ដែលរថយន្ត កំពុងធ្វើដំណើរ ពីខេត្តព្រះសីហនុ មកភ្នំពេញ លុះមួយសន្ទុះ ក្រោយមក ទើបមានគេ មកនិយាយថា លោក ព្រហ្ម ម៉ាញ មិនបានរួមដំណើរ នៅក្នុងរថយន្ត នោះទេ ។

លោកឧត្តម សេនីយ៌ត្រី អ៊ាវ ចំរើន ស្នងការនគរបាល ខេត្តកណ្តាល និងជា ជំនួយការ សម្តេចតេជោ ហ៊ុន សែន បាននិយាយប្រាប់​ ដើមអម្ពិល ពាក់ព័ន្ធនឹង រឿងចោទ ប្រកាន់ ពីសំណាក់ តារាកំប្លែង ព្រហ្ម ម៉ាញ ទៅលើ លោកអធិការ ស្រុកអង្គស្នួល បាន ទារលុយ ៥០០ដុល្លារនោះ លោកសូម អះអាងថា មន្រ្តីនគរបាល របស់លោក ពិតប្រាកដជា មិនបានប្រព្រឹត្ត ដូចការចោទ ប្រកាន់នេះឡើយ ។

លោកស្នងការបានបន្តថា ផ្ទុយទៅវិញ លោកបាន ជួយសម្រួល ដល់ការដោះស្រាយ គ្រោះថ្នាក់នេះ ដោយឡែក ចំណុចថា លោក ព្រហ្ម ម៉ាញ បុកគេហើយ ព្យាយាម បើករត់គេចនោះ តើខុសរឺត្រូវ? បុកគេពីចំណុច ស្រុកអង្គស្នួល បើករត់រហូត មកដល់ ចំណុច ក្បែរមន្ទីរពេទ្យ លោកសង្ឃ ទើបត្រូវបាន សមត្ថកិច្ច រាជធានីភ្នំពេញ ចាប់បាន ហើយប្រគល់ ទៅអោយ អធិការស្រុក អង្គស្នួលវិញ ។

លោកបានបញ្ជាក់ថា ត្រង់ចំណុចនេះ សួរថាតើលោក ព្រហ្ម ម៉ាញ ត្រូវច្បាប់ រឺ ខុសច្បាប់ លើបញ្ហាបុកគេហើយ បើករត់គេចនោះ ចុះបើគេចខ្លួនបាត់នោះ ជនរងគ្រោះទាំងនោះ នឹងទៅជា យ៉ាងណា? ចំណែក ៥០០ដុល្លារ ដែលថា លោកអធិការ ស្រុកអង្គ ស្នួល ទាមទារ ពីលោកព្រហ្ម ម៉ាញ នោះ លោកបានបញ្ជាក់ ជាថ្មីថា ”ខ្ញុំហ៊ានទទួល ខុសត្រូវចំពោះ មុខច្បាប់ ប្រសិនបើមន្រ្តី នគរបាល របស់លោក បានធ្វើបែបនោះ” ។

អធិការនគរបាល ស្រុកអង្គស្នួល លោក មាន សំណាង ហៅ ចក្រី បានច្រានចោល ទាំងស្រុង នូវការចោទប្រកាន់ ផ្ដេសផ្ដាសរបស់តារា ចម្រៀងអាយ៉ៃ ព្រហ្ម ម៉ាញ ដែលនិយាយថា អធិការនគរបាល ស្រុកអង្គស្នួល បានទារលុយគាត់ ចំនួន ៥០០ដុល្លារ ទាក់ទិនទៅនឹង គ្រោះថ្នាក់ចរាចរណ៍ ដែលបង្កឡើង ដោយរថយន្ដ របស់លោក កាលពីថ្ងៃទី១៦ ខែតុលា កន្លងទៅ ។

អធិការនគរបាល ស្រុករូបនេះ បានបញ្ជាក់ទៀតថា ក្រោយពីបញ្ជូន សំណុំរឿងទៅខេត្ដ លោកព្រហ្មម៉ាញ បានមកទទួលរថយន្ដ នៅអធិការដ្ឋាន នគរបាល ស្រុកអង្គស្នួល ហើយពេលនោះ លោកបានផ្ដល់ ថវិកាចំនួន ២០ដុល្លារ ជូនដល់ កម្លាំងសមត្ថ កិច្ច នៅស្រុកអង្គស្នួល ក្នុងពេលបំពេញ ភារកិច្ចថា មានភាពនឿយហត់ ។

ការចេញមក បដិសេធពី សំណាក់ អធិការនគរបាល ស្រុកអង្គស្នួលរូបនេះ បានធ្វើឡើង បន្ទាប់ពីតារា ចម្រៀងអាយ៉ៃ និងកំប្លែងរូបនេះ បានរិះគន់ ជាសាធារណៈនៅ តាមកញ្ចក់ ទូរទស្សន៍ អាស៊ីអាគ្នេយ៍ កាលយប់ថ្ងៃទី ០៩ វិច្ឆិកា ថា អធិការនគរបាល ស្រុកអង្គស្នួល បានទារលុយពីរូប លោក ចំនួន ៥០០ដុល្លារ ជុំវិញករណី គ្រោះថ្នាក់ចរាចរណ៍ កាលពីថ្ងៃទី១៦ ខែតុលា ។

សូមជំរាបថា  សមត្ថកិច្ចរាជធានី ភ្នំពេញ បានឃាត់រថយន្ត ដ៏ទំនើប របស់លោក ព្រហ្ម ម៉ាញ នៅម្តុំស្តុបពេទ្យ លោកសង្ឃ កាលពីរសៀល ថ្ងៃអាទិត្យ ទី១៦ ខែតុលា បន្ទាប់ពីរថយន្ត របស់គាត់ បានបុកអ្នកជិះម៉ូតូ ពីរនាក់ឲ្យ របួសធ្ងន់ នៅតាមបណ្តោយ ផ្លូវជាតិលេខ៤ ភូមិត្រពាំងរនោច ឃុំពើក ស្រុកអង្គស្នួល ខេត្តកណ្តាល ខណៈដែល រថយន្តនេះ កំពុងធ្វើដំណើរ ពីខេត្តព្រះសីហនុ មកភ្នំពេញ ហើយក៏បានពើប ប្រទះនឹងម៉ូតូ ដែលកំពុងធ្វើ ដំណើរបញ្រ្ចាស់ទិស ។

មន្រ្តីនគរបាល ស្រុកអង្គស្នួល បានឲ្យដឹងថា គ្រោះថ្នាក់ ចរាចរណ៍នោះ បណ្តាលឲ្យលោក ម៉ៅ មិនា អាយុ២៣ឆ្នាំ ជាសិស្សនាយ ទាហានសកម្ម ត្មាតពង រងរបួស បាក់ជើងស្តាំ រីឯជនរងគ្រោះ ម្នាក់ទៀត មិនស្គាល់ អត្តសញ្ញាណ នោះទេ តែមានស្រុក កំណើតនៅ ខេត្តបាត់ដំបង ។

ប្រភពព័ត៌មានពី សមត្ថកិច្ច បានឲ្យដឹងថា មុនពេលឧប្បត្តិហេតុ គ្រោះថ្នាក់ចរាចរណ៍ បានកើតឡើង រថយន្តរបស់លោក ព្រហ្ម ម៉ាញ បានបើកបរ តាមបណ្តោយ ផ្លូវជាតិលេខ៤ ពីកើតមកលិច លុះដល់ចំណុច កើតហេតុ ម៉ូតូម៉ាកវីវ៉ា បានបើកបញ្រ្ចាស់ ទិស រថយន្ត ក្នុងល្បឿនលឿន ឌុបអ្នកជិះម្នាក់ ពេលនោះម៉ូតូ បើកវ៉ារថយន្ត មួយគ្រឿង ផ្សេងទៀត នៅពីខាងមុខ ហើយក៏ជ្រុលចង្កូត ចូលចំណែក ផ្លូវម្ខាងទៀត ដែលរថយន្ត របស់លោក ព្រហ្ម ម៉ាញ ម៉ាក CHEVROLET ពណ៌ខ្មៅ ពាក់ស្លាកលេខ បណ្ដោះ អាសន្ន ១៥៩១ កំពុងបោះពួយ យ៉ាងលឿន បណ្តាលឲ្យបុកគ្នា ហើយអ្នកជិះម៉ូតូ ទាំងពីរនាក់ រងរបួសធ្ងន់ ត្រូវបានបញ្ជូន ទៅមន្ទីរពេទ្យ ។

សមត្ថកិច្ចបានឲ្យដឹងថា គ្រោះថ្នាក់ចរាចរណ៍ ដែលបានកើតឡើង នៅស្រុកអង្គស្នួល ខេត្តកណ្តាល មិនបានធ្វើឲ្យរថយន្តរបស់លោក ព្រហ្ម ម៉ាញ ឈប់ស្ងៀមទេ តែក៏បានបោះពួយយ៉ាងលឿន សំដៅមករាជធានីភ្នំពេញ តែត្រូវបានមន្រ្តី នគរបាលស្ទាក់ ចាប់បាន នៅភ្លើងស្តុបពេទ្យលោកសង្ឃ៕