ដោយ : សុខ ភក្តី
ថ្ងៃទី 16 វិច្ឆិកា 2011
CEN
ភ្នំពេញ: សមាជិកសភាគណបក្សសមរង្ស៊ី បានប្រកាសក្នុងសន្និសីទកាសែត នាព្រឹកម៉ោង ១០ ថ្ងៃទី១៦វិច្ឆិកា ឆ្នាំ២០១១ ថា នឹងធ្វើពហិការ មិនចូលរួមកិច្ចប្រជុំរដ្ឋសភា នាពេលខាងមុខ ដែលរដ្ឋសភានឹងប្រជុំអនុម័តលើសេចក្តីព្រាងច្បាប់ថវិកាជាតិ ឆ្នាំ២០១២។ សន្និសីទកាសែតនោះ មានភ្ជាប់វិដេអូខនហ្វឺរេន ដែលលោកសមរង្ស៊ី ចូលរួមពីប្រទេសបារាំង មកកាន់ទីស្នាក់ការកណ្តាលគណបក្សសមរង្ស៊ី នៅចាក់អង្រែលើ ក្នុងរាធានីភ្នំពេញ។
សេចក្តីព្រាងច្បាប់ថវិកាជាតិឆ្នាំ២០១២ ត្រូវបានគណបក្សសមរង្ស៊ី យល់ថា ពាក់ព័ន្ធនឹងអំពើពុករលួយរបស់រដ្ឋាភិបាល ដែលកេងយកប្រាក់ចំណូលរដ្ឋ និងបង្កើនប្រាក់កម្ចីពីបរទេស។
សេចក្តីប្រកាសរបស់ខុទ្ទកាល័យគណបក្សសមរង្ស៊ី បង្ហាញថា សន្និសីទកាសែត នាព្រឹកនេះ លោកសមរង្ស៊ី នឹងឆ្លើយតបចំពោះប្រតិកម្មរបស់សម្តេចនាយករដ្ឋមន្ត្រី ហ៊ុនសែន កាលពីថ្ងៃទី១៤វិច្ឆិកា ឆ្នាំ២០១១ ក្នុងរឿងតំណាងរាស្ត្រគណបក្សសមរង្ស៊ី លាលែង ដើម្បីធ្វើឲ្យរដ្ឋសភា មិនពេញលក្ខណៈច្បាប់ ដើម្បីអនុម័តសេចក្តីព្រាងច្បាប់ថវិកាជាតិ ឆ្នាំ២០១២ នាពេលខាងមុខ។
តាមសេចក្តីប្រកាស លោកសមរង្ស៊ី ត្រូវលើកឡើងពីគម្រោងរបស់គណបក្សសមរង្ស៊ី ចំពោះការរារាំងដល់កិច្ចប្រជុំរដ្ឋសភា នាពេលខាងមុខ មិនឲ្យអនុម័តច្បាប់ថវិកាជាតិឆ្នាំ២០១២ ដើម្បីការពារកុំឲ្យមានការខ្ចីបំណុលបរទេសច្រើនពេក និងការប្រៀបធៀបសម្តេចនាយករដ្ឋមន្ត្រី ហ៊ុនសែន ទៅនឹងមេដឹកនាំផ្តាច់ការមួយចំនួន។
សេចក្តីប្រកាសដដែលរបស់គណបក្សសមរង្ស៊ី បានលើកឡើងថា គណបក្សសមរង្ស៊ី នឹងបន្តគម្រោងការរារាំងលើការបោះឆ្នោត ឬការសម្រេចណាមួយ របស់រដ្ឋសភា រហូតដល់រដ្ឋាភិបាល ដែលដឹកនាំដោយគណបក្សប្រជាជនកម្ពុជា ទទួលយកនូវគោលការណ៍២ចំណុច គឺទី១-បញ្ឈប់ការបណ្ថេញចេញ និងការដោះស្រាយបញ្ហាដីធ្លី ដូចអ្វីដែលអង្គការសហប្រជាជាតិបានលើកឡើង និងទី២-ការផ្លាស់ប្តូរ ឬការកែទម្រង់សមាសភាពរបស់គណៈកម្មាធិការជាតិរៀបចំការបោះឆ្នោត គ.ជ.ប. ដូចអនុសាសន៍របស់សហភាពអឺរ៉ុប EU ដែលបានមកសង្កេតការណ៍បោះឆ្នោតនៅឆ្នាំ២០០៨ ដើម្បីឲ្យការបោះឆ្នោតធ្វើឡើងដោយត្រឹមត្រូវ សេរី និងយុត្តិធម៌ សម្រាប់ការបោះឆ្នោតនាពេលខាងមុខ។
សេចក្តីប្រកាសរបស់គណបក្សសមរង្ស៊ី ខាងលើនេះ បានធ្វើឡើង ក្រោយពីសម្តេចនាយករដ្ឋមន្ត្រី ហ៊ុនសែន បានវាយប្រហារខ្លាំងៗ និងថា គណបក្សប្រឆាំងនេះ កំពុងមានជម្លោះផ្ទៃក្នុងធ្ងន់ធ្ងរ ដែលអាចមានការបែកខ្ញែកជា ៥ ក្រុម។
លោក សម រង្ស៊ី បានលើកឡើងថា ការមិនចូលរួមប្រជុំរដ្ឋសភានោះ គឺគណបក្សសមរង្ស៊ី ចង់ធ្វើឲ្យសេចក្តីសម្រេចរបស់រដ្ឋសភា អសុពលភាព នៅពេលចំនួនសមាជិករដ្ឋសភា តិចជាង ១២០ នាក់៕
ការគិតដូចលោកសមរង្សី ដូចជាធូខ្សុយ…. ចូលចិត្តធ្វើនយោបាយថយក្រោយទុកឱកាស់ ឲ្យដៃគូរវៃផ្អឹប។