ដោយ : បាយ័ន
ថ្ងៃទី 7 តុលា 2011
CEN</strong>
សំណង់ អតីត សាលាខេត្ត សៀមរាប ចាស់ ដែល ជា សំណង់ សល់ ពី អ ណា និគម បារាំង បាន ធ្លាក់ ទៅលើ ដៃ ក្រុមហ៊ុន ឯកជន បារាំង វិញ បន្ទាប់ ពី សាលាខេត្ត ថ្មី កសាង នៅ រយៈ ចំងាយ ជាង ២០ គីឡូម៉ែត្រ ពី សាលាខេត្ត ចាស់ ក្នុង ឃុំ អម្ពិល ស្រុក ប្រាសាទបាគង ។ តែ ឥឡូវ ប្តូរ មក ជា សង្កាត់ អម្ពិល ស្ថិត ក្នុង ក្រុង សៀមរាប វិញ ៕
ក្រុង-ខេត្តសៀមរាប: ទីតាំងដី និងសំណង់ របស់អតីតសាលាខេត្តសៀមរាប ដែលកសាងឡើងក្នុងសម័យអណានិគមបារាំង ដែលក្រុមហ៊ុនរបស់ខ្មែរក្នុងស្រុកមួយ ទទួលសិទ្ធផ្ទាច់មុខយកសាលាខេត្ត និងមន្ទីរជុំវិញខេត្ត ជាថ្នូរនឹងការសាងសង់បុរីរដ្ឋបាលសាលាខេត្តថ្មី ដែលប្រមូលផ្តុំ ដោយមន្ទីរជុំវិញខេត្ត តែទីបំផុតដី និងសំណង់អតីតសាលាខេត្តសៀមរាបចាស់នោះ ត្រូវបានធ្លាក់មកដល់ដៃក្រុមហ៊ុនបារាំងមួយ។
ទីតាំងសំណង់សាលាខេត្តចាស់ ដែលស្ថិតនៅកណ្តាលទីក្រុងសៀមរាប បច្ចុប្បន្នត្រូវបានក្រុមហ៊ុនបារាំង ឈ្មោះ CROSSROAD CAPITAL បានហ៊ុមព័ទ្ធរបង ដែលមានកំពស់ខ្ពស់បំផុតមួយ និងមិនអាចឱ្យគេមើលឃើញសំណង់ខាងក្នុងបានឡើយ។
សំណង់ អតីត សាលាខេត្ត សៀមរាប ចាស់ ដែល ជា សំណង់ សល់ ពី អ ណា និគម បារាំង បាន ធ្លាក់ ទៅលើ ដៃ ក្រុមហ៊ុន ឯកជន បារាំង វិញ បន្ទាប់ ពី សាលាខេត្ត ថ្មី កសាង នៅ រយៈ ចំងាយ ជាង ២០ គីឡូម៉ែត្រ ពី សាលាខេត្ត ចាស់ ក្នុង ឃុំ អម្ពិល ស្រុក ប្រាសាទបាគង ។ តែ ឥឡូវ ប្តូរ មក ជា សង្កាត់ អម្ពិល ស្ថិត ក្នុង ក្រុង សៀមរាប វិញ ៕
នៅថ្ងៃទី៧ ខែតុលា ឆ្នាំ២០១១ លោក ប៊ុន ថាឬទ្ធិ អ្នកនាំពាក្យសាលាខេត្ត និងជាអភិបាលរងខេត្តសៀមរាប មិនអាចទាក់ទងសុំបំភ្លឺបានឡើយជុំវិញ ដី និងសំណង់អតីតសាលាខេត្តសៀមរាប ដែលក្រុមហ៊ុនបារាំងហ៊ុមព័ទ្ធរបងនោះ ថាតើគេធ្វើអ្វី?
ដោយឡែក លោក ទេព ប៊ុនឆាយ អភិបាលក្រុងសៀមរាប បានថ្លែងថា សំណង់បុរាណសល់ពីសម័យសង្គមបារាំង គឺសាលាខេត្តសៀមរាបចាស់ ពិតជាក្រុមហ៊ុនបារាំងមួយ ទិញពីក្រុមហ៊ុនខ្មែរក្នុងស្រុក យកពិតប្រាកដមែន។
ទោះបីយ៉ាងណាក៏ដោយ ពាក់ព័ន្ធនឹងក្រុមហ៊ុនបារាំង យកអតីតសាលាខេត្តធ្វើអ្វីនោះ ត្រូវបានលោក ទេព ប៊ុនឆាយ បញ្ជាក់ថា លោកពុំបានដឹងឡើយ។
ជាមួយគ្នានោះ លោកស្រី ទិត្យ មករា តំណាងក្រុមហ៊ុន CROSSROAD CAPITAL បានដឹងតាមទូរស័ព្ទថា ក្រុមហ៊ុនបារាំងនេះ ពិតជាបានទិញសំណង់សាលាខេត្តសៀមរាប មកធ្វើវិនិយោគ។ ប៉ុន្តែត្រង់ការវិនិយោគអ្វីនោះ លោកស្រីឆ្លើយថា មិនបានដឹងឡើយ។
លោកស្រី ទិត្យ មករា បានបញ្ជាក់ទៀតថា គ្រាន់តែលោកស្រីដឹងសំណង់ខាងលើ បានហ៊ុមព័ទ្ធដោយរបង និង រក្សាទុកសំណង់នេះ ដោយមិនបានប៉ះពាល់វាទេ។ ថ្ងៃក្រោយក៏មិនដឹងថា សំណង់នោះ ត្រូវបានម្ចាស់ក្រុមហ៊ុន ជាជនជាតិបារាំង នឹងធ្វើអ្វីទៀតដែរ?
គួរបញ្ជាក់ថា សំណង់សាលាខេត្តសៀមរាបចាស់ ត្រូវបានកសាងឡើងនៅក្នុងសម័យអណានិគមនិយមបារាំង ហើយសំណង់នេះ ត្រូវបានចាត់ទុកថា ជាសំណង់បុរាណប្រវត្តិសាស្ត្រមួយរបស់កម្ពុជា។
រដ្ឋាភិបាលបារាំង បានសាងសង់សំណង់ជំនាន់នោះ ហើយបន្សល់ទុកនាពេលបច្ចុប្បន្ន រាប់ទាំងហេដ្ឋារចនាសម្ព័ន្ធស្ពាន សំណង់រដ្ឋបាលរបស់រដ្ឋ។ រដ្ឋាភិបាលរបស់បារាំង ពុំបានអនុញ្ញាតឱ្យកម្ពុជា វាយសំណង់នោះចោលឡើយ គឺត្រូវរក្សាទុក គ្រាន់តែមានការជួសជុល។
ប្រភពព័ត៌មានបាននិយាយថា សំណង់ដែលបារាំងទិញពីក្រុមហ៊ុនឯកជន គឺសំណង់អតីតសាលាខេត្តសៀមរាបនោះ គឺក្រុមហ៊ុនទិញយកមកទុក ដោយមិនមានការបំផ្លាញចោលឡើយ ព្រោះថា សំណង់បុរាណសល់ពីសម័យសង្គមបារាំង គឺប្រជាជនបារាំងចង់បានខ្លាំងណាស់ ហើយក៏វាស្របទៅតាមការចង់បានរបស់រដ្ឋាភិបាលបារាំង ដែលរក្សាទុកសំណង់ទាំងឡាយ របស់បារាំងនាសម័យនោះ ឱ្យនៅស្ថិតស្ថេរ។
សូមរំលឹកដែរថា អតីតសាលាខេត្តសៀមរាបចាស់ ដែលនៅកណ្តាលទីក្រុងសៀមរាប និងមន្ទីរជុំវិញខេត្តទាំងអស់ ត្រូវបានក្រុមហ៊ុនឯកជនក្នុងស្រុកមួយ ជាអ្នកទទួលយកផ្តាច់មុខ ហើយសាលាខេត្តថ្មី និងមន្ទីរជុំវិញខេត្ត ត្រូវបានក្រុមហ៊ុនក្នុងស្រុកមួយនោះ ទិញដីមួយកន្លែង ធ្វើសាលាខេត្តថ្មី ដែលគេហៅថា បុរីរដ្ឋបាលសាលាខេត្ត នៅក្រៅក្រុងសៀមរាប។ មានន័យថា សាលាខេត្តថ្មី និងមន្ទីរជុំវិញខេត្ត កសាងប្រមូលផ្តុំគ្នានៅតែមួយកន្លែង។
បុរីរដ្ឋបាលសាលាខេត្តថ្មី គឺបច្ចុប្បន្នស្ថិតនៅក្នុងឃុំអម្ពិល ស្រុកប្រាសាទបាគង ដែលមានទីតាំង និងចំងាយ ឆ្ងាយពីអតីតសាលាខេត្តសៀមរាបចាស់ជាង ២០ គីឡូម៉ែត្រ។ បើគិតពីការធ្វើដំណើររបស់មន្ត្រីរាជការមន្ទីរជុំវិញខេត្ត ដើម្បីទៅធ្វើការ ក្នុងមួយថ្ងៃ ទៅ និងមក ចំនួនបួនត្រឡប់ គឺមានប្រវែងជិត ១០០ គីឡូម៉ែត្រ។
ដោយសារតែសាលាខេត្តថ្មី ស្ថិតក្នុងឃុំអម្ពិល ស្រុកប្រាសាទបាគង ទើបខេត្តសៀមរាប រៀបចំកែសំរួលឃុំអម្ពិល មកជា សង្កាត់អម្ពិល ចំណុះឱ្យក្រុងសៀមរាបវិញ។ ដោយឡែកឃុំកណ្តែក ដែលមានព្រំប្រទល់ជាប់នឹងក្រុងសៀមរាប ហើយនៅជិតជាងសង្កាត់អម្ពិល បែរជាស្ថិតនៅក្នុងស្រុកប្រាសាទបាគងទៅវិញ។
ករណីដែលសាលាខេត្តថ្មី មានរយៈចំងាយ ឆ្ងាយពីទីរួមក្រុងសៀមរាប ក៏ត្រូវមន្ត្រីរាជការស្ទើរទាំងអស់ បានរអូររទាំថា សាលាខេត្តថ្មី គឺត្រូវចំណាយថវិកាច្រើនទៅលើសាំងចាក់ម៉ូតូ ឬឡាន ហើយប្រាក់ខែមន្ត្រីរាជការប៉ុណ្ណឹង មិនអាចយកទៅចាក់សាំង ដើម្បីបំរើការងារឱ្យរដ្ឋបាលបានឡើយ គឺមួយខែអាចយកលុយផ្ទះមកបន្ថែម ទើបអាចគ្រប់នឹងការចាក់សាំង ៕
ខែតុលា 7, 2011 
Camnews 