ខែតុលា 13, 2011 
ព្រហស្បតិ៍ 13 តុលា 2011
ទស្សនាវដ្តីសារព័ត៌មានសេរី
តំណាងរាស្រ្តគណបក្សសមរង្ស៊ីកាលពីពេលថ្មីៗនេះ បានផ្ញើលិខិតមួយច្បាប់ទៅលោក ឌិត មុន្ទី ប្រធានតុលាការកំពូល និងជាប្រធានក្រុមប្រឹក្សាវិន័យចៅក្រម នៃឧត្តមក្រុមប្រឹក្សា នៃអង្គចៅក្រម ឲ្យចាត់វិធានការដាក់ពិន័យចំពោះលោក អឿង សៀង ចៅក្រម នៃសាលាដំបូងក្រុងភ្នំពេញ ដែលបានប្រើប្រាស់អំណាចដោយរំលោភច្បាប់មកជ្រៀតជ្រែកការងារនយោបាយ ដែលជាកិច្ចការផ្ទៃក្នុងរបស់គណបក្ស។
លោក ឌិត មុន្ទី ប្រធានក្រុមប្រឹក្សាវិន័យចៅក្រម
លិខិតដែលចុះហត្ថលេខាដោយអ្នកតំណាងរាស្រ្តគណបក្សសមរង្ស៊ីចំនួន១៦រូបបានលើកឡើងថា កាលពីថ្ងៃទី០៧ ខែតុលា ឆ្នាំ២០១១ គណៈកម្មាធិការអចិន្រ្តៃយ៍គណបក្សសមរង្ស៊ី បានសម្រេចលុបឈ្មោះលោក តុ វ៉ាន់ចាន់ ចេញពីបញ្ជីគណបក្សដោយសម្លេងឯកច្ឆ័ន្ទស្របតាមលក្ខន្តិកៈរបស់គណបក្សដែលទទួលស្គាល់ និងតម្កល់ទុកនៅក្រសួងមហាផ្ទៃ។ មាត្រា១៦ នៃច្បាប់ស្តីពីគណបក្សនយោបាយបានចែងថា «សមាជិកគណបក្សនយោបាយ ត្រូវបាត់បង់សមាជិកភាពរបស់ខ្លួន ក្នុងករណីណាមួយ ដូចខាងក្រោម ៖
1.បានលាឈប់ ឬបានបោះបង់សមាជិកភាព នៃគណបក្សនយោបាយ។
2.ត្រូវបានបណ្តេញចេញពីគណបក្សនយោបាយ ស្របតាមលក្ខន្តិកៈរបស់គណបក្សនយោបាយសាមី។
បន្ថែមលើនេះ ក៏គ្មានច្បាប់ណាដែលតម្រូវឲ្យស្ថាប័នរដ្ឋណាមួយ រួមទាំងតុលាការផង មកចូលរួមធ្វើសេចក្តីសម្រេចអំពីសមាជិកភាពរបស់គណបក្សនយោបាយណាមួយឡើយ។
លិខិតរបស់ក្រុមអ្នកតំណាងរាស្រ្តគណបក្សសមរង្ស៊ីបានបន្តថា ការប្រើឆន្ទានុសិទ្ធិក្នុងការចេញដីការក្សាការពារលេខ ១២«ធ» ដែលសម្រេចឲ្យគណបក្សសមរង្ស៊ី «រក្សាឋានៈលោក តុ វ៉ាន់ចាន់ ជាសមាជិកគណបក្សសមរង្ស៊ី ជាបណ្តោះអាសន្ន» កាលពីថ្ងៃទី១០ ខែតុលា ឆ្នាំ២០១១ របស់លោក អឿង សៀង ចៅក្រមសាលាដំបូងក្រុងភ្នំពេញ គឺជាការរំលោភច្បាប់យ៉ាងធ្ងន់ធ្ងរ ហើយមានចេតនាជ្រៀតជ្រែកការងារនយោបាយ ដែលជាកិច្ចការផ្ទៃក្នុងរបស់គណបក្សសមរង្ស៊ី ដែលធ្វើឲ្យប៉ះពាល់កិត្តិយសរបស់ស្ថាប័នតុលាការ ក៏ដូចជាកិត្តិយសរបស់ប្រទេសជាតិ។
ជាមួយគ្នានេះ ក្រុមអ្នកតំណាងរាស្រ្តគណបក្សសមរង្ស៊ីបានស្នើឲ្យលោក ឌិត មន្ទី ប្រធានក្រុមប្រឹក្សាវិន័យចៅក្រម នៃឧត្តមក្រុមប្រឹក្សា នៃអង្គចៅក្រម ឲ្យចាត់វិធានការពិន័យចំពោះលោក អឿង សៀង ចៅក្រម នៃសាលាដំបូងក្រុងភ្នំពេញ ដែលបានប្រើប្រាស់អំណាចតុលាការដោយរំលោភច្បាប់ មកជ្រៀតជ្រែកការងារនយោបាយ ដែលជាកិច្ចការផ្ទៃក្នុងរបស់គណបក្ស ដើម្បីជៀសវាងកុំឲ្យមានករណីបែបនេះកើតមានជាថ្មីទៀតនៅក្នុងប្រទេសកម្ពុជា៕
Camnews 