ដោយ សួន សុផល មុន្នី
2011-10-17
វិទ្យុអាស៊ីសេរី
គណបក្ស សម រង្ស៊ី បានប្រតិកម្មថា មន្ត្រីគណបក្ស ប្រជាជនកម្ពុជា នៅស្រុករុក្ខគិរី ខេត្តបាត់ដំបង ឆ្លៀតឱកាសកេងចំណេញផលប្រយោជន៍នយោបាយ ដោយមានគម្រោងយកទីស្នាក់ការការគណបក្ស ប្រជាជនកម្ពុជា ធ្វើជាទីកន្លែងសម្រាប់ផ្ដល់អត្តសញ្ញាណប័ណ្ណសញ្ជាតិខ្មែរ ឲ្យប្រជាពលរដ្ឋជាម្ចាស់ឆ្នោតជាង ៥ ពាន់នាក់។
http://flash-mp3-player.net/medias/player_mp3_maxi.swf
លោក យ៉ាន់ ហ៊ត សមាជិកក្រុមប្រឹក្សាស្រុករុក្ខគិរី ខេត្តបាត់ដំបង មកពីគណបក្ស សម រង្ស៊ី។ លោក បានបញ្ជាក់ថា កាលពីថ្ងៃទី១២ ខែតុលា អភិបាលរង ស្រុករុក្ខគិរី បានចែកលិខិតអញ្ជើញដោយប្រាប់ថា នៅថ្ងៃទី១៧ ខែតុលា នឹងមានការចែកអត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋ នៅទីស្នាក់ការគណបក្ស ប្រជាជនកម្ពុជា ក្នុងមូលដ្ឋានស្រុករុក្ខគិរី ខេត្តបាត់ដំបង។
លោក យ៉ាន់ ហ៊ត៖«ខ្ញុំតែងតែបានបញ្ជាក់ប្រាប់គាត់តាំងពីដើមមកដែរ ក្នុងនាមបក្សប្រឆាំងហ្នឹង មិនមែនចេះប្រឆាំងទេ។ អ្វីដែលមិនត្រឹមត្រូវទេ។ ប៉ុន្តែ ចង់ឲ្យគ្រប់គ្នាហ្នឹង ធ្វើឲ្យត្រឹមត្រូវ បានច្បាប់ហើយយកច្បាប់ធ្វើជាអំណាច។ កុំយកអំណាចធ្វើជាច្បាប់ ព្រោះរដ្ឋបាលឯកភាព ដែលយើង ហៅថា រដ្ឋបាលស្តង់ដារហ្នឹង យើងមានក្រុមប្រឹក្សាមួយ ដែលជាអ្នកតំណាងឲ្យប្រជាពលរដ្ឋ។ អ៊ីចឹងមានកិច្ចការអីយើងទាក់ទងគាត់មុន»។
លោកបន្តថា គណបក្ស សម រង្ស៊ី ក្រោយពីបានទទួលលិខិតអញ្ជើញ ក៏បានស្នើសុំទៅលោក ពេជ្រ ម៉ាឡៃ អភិបាលស្រុករុក្ខគិរី ដោយបញ្ជាក់ថា កិច្ចការផ្ដល់អត្តសញ្ញាណប័ណ្ណជូនប្រជាពលរដ្ឋនេះ ជាកិច្ចការសាធារណៈ មិនអាចយកទៅរៀបចំធ្វើនៅកន្លែងស្នាក់ការគណបក្ស ប្រជាជន បានទេ។
លោកបានស្នើសុំឲ្យអាជ្ញាធរស្រុកបង្វែរទីកន្លែងរៀបចំ ទៅទីសាធារណៈផ្សេងវិញ បើសិនជាទីធ្លា សាលាស្រុកមិនអាចធ្វើបាននោះ។
នៅក្នុងលិខិតអញ្ជើញ ចុះថ្ងៃ ១២ ខែតុលា ឆ្នាំ ២០១១ របស់អាជ្ញាធរស្រុករុក្ខគិរី បានបញ្ជាក់ថា ពិធីផ្ដល់អត្តសញ្ញាណប័ណ្ណសញ្ជាតិខ្មែរ ជូនប្រជាពលរដ្ឋក្រោមអធិបតីភាព លោក អ៊ុយ រី អភិបាលរងខេត្តបាត់ដំបង និងត្រូវធ្វើឡើងនៅសាលប្រជុំទីស្នាក់ការគណបក្ស ប្រជាជនកម្ពុជា នៅស្រុករុក្ខគិរី នាព្រឹកថ្ងៃទី ១៧ ខែតុលា ឆ្នាំ ២០១១។
អ្នកស្រី មូ សុខហួរ អ្នកតំណាងរាស្ត្រគណបក្ស សម រង្ស៊ី ប្រតិកម្មថា អត្តសញ្ញាណប័ណ្ណ គឺជាលិខិតសម្គាល់ខ្លួនរបស់ប្រជាពលរដ្ឋ ដែលចេញដោយក្រសួងមហាផ្ទៃ។ មិនអាចមានគណបក្សណា ឬបុគ្គលណា យកទៅដាក់ទានឲ្យប្រជាពលរដ្ឋបាននោះទេ។ អ្នកស្រីបន្តថា គណបក្ស ប្រជាជនកម្ពុជា នៅស្រុករុក្ខគិរី ខេត្តបាត់ដំបង មានបំណងយកទីស្នាក់ការគណបក្ស ប្រជាជន ប្រារព្ធពិធីចែកអត្តសញ្ញាណប័ណ្ណនេះ គឺជាការកេងប្រវ័ញ្ចនយោបាយ និងធ្វើឲ្យប៉ះពាល់យ៉ាងធ្ងន់ធ្ងរសិទ្ធិជាមូលដ្ឋានរបស់ប្រជាពលរដ្ឋខ្មែរ។
អ្នកស្រី មូ សុខហួរ៖ «ថ្មីៗ ប្រជាពលរដ្ឋ លោកត្រូវការអត្តសញ្ញាណប័ណ្ណ ដើម្បីយកទៅប្រើប្រាស់ចុះឈ្មោះបោះឆ្នោត ហើយបើសិនជាអត្តសញ្ញាណប័ណ្ណនៅក្នុងដៃគណបក្ស ប្រជាជនកម្ពុជា នោះ។ គឺគណបក្ស សម រង្ស៊ី យល់ឃើញថា គណបក្ស ប្រជាជនកម្ពុជា បានរំខានរារាំងប៉ះពាល់ដល់សិទ្ធិនយោបាយរបស់ប្រជាពលរដ្ឋ ដែលត្រូវចុះឈ្មោះបោះឆ្នោត ដើម្បីបានបោះឆ្នោតនៅថ្ងៃបោះឆ្នោត»។
លោក ទុយ សំអាន ប្រធានក្រុមប្រឹក្សាស្រុករុក្ខគិរី ខេត្តបាត់ដំបង និងជាមន្ត្រីរបស់គណបក្ស ប្រជាជនកម្ពុជា។ លោកបានបំភ្លឺថា អាជ្ញាធរបានប្រគល់អត្តសញ្ញាណប័ណ្ណសញ្ជាតិខ្មែរ ឲ្យប្រជាពលរដ្ឋចំនួនជាង ១០០ នាក់ នៅពីថ្ងៃទី១៧ ខែតុលា។ ការផ្ដល់អត្តសញ្ញាណប័ណ្ណសញ្ជាតិខ្មែរ មានចំនួនជិត ៦ ពាន់នាក់ (៥.៧៧៧ នាក់) នៅទូទាំងស្រុករុក្ខគិរី។
លោកបន្តថា មុនដំបូងអាជ្ញាធរស្រុកគិតថា នៅបរិវេណសាលាស្រុកមានភ្លៀងជោគជាំពុំអាចយកទីធ្លាប្រើប្រាស់ ធ្វើជាទីតាំងប្រារព្ធពិធីផ្ដល់អត្តសញ្ញាណប័ណ្ណជូនប្រជាពលរដ្ឋបាននោះទេ។ លុះក្រោយមក ទើបលោកអភិបាលស្រុកបានរៀបចំលិខិតស្នើសុំយកទីស្នាក់ការគណបក្ស ប្រជាជន នៅស្រុករុក្ខគិរី ដើម្បីរៀបចំពិធីចែកអត្តសញ្ញាណប័ណ្ណជូនប្រជាពលរដ្ឋ។
លោកបន្ថែមថា តាមការគ្រោងទុក ការផ្ដល់អត្តសញ្ញាណប័ណ្ណនឹងត្រូវធ្វើឡើង តាំងពីថ្ងៃទី១៤ ខែតុលា។ ប៉ុន្តែ ដោយសារនៅថ្ងៃទី១៤ និង ១៥ ខែតុលានោះ មានមេឃភ្លៀង ក៏លើកយកមកធ្វើនៅថ្ងៃទី១៧ ខែតុលា ដោយប្ដូរទីតាំងមកដាក់នៅសាលាស្រុករុក្ខគិរីវិញ។
លោក ទុយ សំអាន៖ «ការយល់ឃើញរបស់គណបក្ស សម រង្ស៊ី ជាការកេងចំណេញនោះ អាហ្នឹងគាត់ថាបាន។ ប៉ុន្តែ អាជ្ញាធរពុំបានគិតដូច្នេះឡើយ។ យើងត្រូវការរកកន្លែងងាយស្រួល កន្លែងសមរម្យ ដើម្បីឲ្យគណៈអធិបតី ប្រជាពលរដ្ឋ ងាយស្រួលក្នុងមកចូលរួម។ ការចោទប្រកាន់កេងចំណេញផ្នែកនយោបាយនោះ អាហ្នឹងជាការយល់ឃើញរបស់គាត់ទេ។ ប៉ុន្តែ មកដល់ពេលនេះ គាត់អត់បានធ្វើអ្វី ទៅតាមដែលគាត់ចោទប្រកាន់ហ្នឹងទេ។ ប៉ុន្តែ ពេលអនុវត្តជាក់ស្ដែង យើងអត់បានធ្វើនៅទីស្នាក់ការគណបក្ស ប្រជាជនកម្ពុជា នោះទេ»។
ការឆ្លើយបំភ្លឺនេះ ត្រូវបានអ្នកស្រី មូ សុខហួរ លើកឡើងថា ទោះបីមានការផ្លាស់ប្ដូរទីកន្លែងចែកអត្តសញ្ញាណប័ណ្ណជូនប្រជាពលរដ្ឋពីទីស្នាក់ការគណបក្ស ប្រជាជន ទៅសាលាស្រុកក៏ដោយ ប៉ុន្តែគោលបំណងដំបូងរបស់គណបក្សប្រជាជនកម្ពុជា គឺធ្វើនៅទីស្នាក់ការគណបក្ស ប្រជាជនកម្ពុជា។
អ្នកស្រី មូ សុខហួរ៖ «គណបក្ស សម រង្ស៊ី និងធ្វើរបាយការណ៍ទៅក្រសួងមហាផ្ទៃ និង គ.ជ.ប ដើម្បីជូនជាព័ត៌មាន ហើយជាការចាត់វិធានការឲ្យបានស្របច្បាប់នោះ ត្រូវតែធ្វើលិខិតមួយ ចាត់វិធានការទៅលើគណបក្ស ប្រជាជនកម្ពុជា»។
លោក យិន ម៉េងលី មន្ត្រីសមាគមការពារសិទ្ធិមនុស្ស អាដហុក បានបញ្ជាក់ថា ការចែក និងការធ្វើការងារអត្តសញ្ញាណប័ណ្ណ ជូនប្រជាពលរដ្ឋ មិនអាចធ្វើឡើងនៅក្នុងនាមគណបក្សនយោបាយណាមួយបានទេ។ គឺត្រូវធ្វើក្នុងនាមរដ្ឋបាល និងក្នុងនាមរាជរដ្ឋាភិបាល។ លោកថា ការឆ្លៀតឱកាស និងយកស្នាក់ការគណបក្សនយោបាយ សម្រាប់ចែកអត្តសញ្ញាណប័ណ្ណជូនប្រជាពលរដ្ឋនោះ គឺអនុវត្តន៍ផ្ទុយពីការងាររដ្ឋបាលរបស់អាជ្ញាធរមូលដ្ឋាន។
លោក យិន ម៉េងលី៖«មិនត្រូវឆ្លៀតឱកាសបញ្ហាហ្នឹងផ្គួបផ្សំជាមួយរឿងនយោបាយទេ។ ឱកាសនៃការឃោសនាបោះឆ្នោតរឿងនយោបាយ មិនទាន់មកដល់ទេ។ អ៊ីចឹងសុំឲ្យអាជ្ញាធរលោកធ្វើយ៉ាងណាឲ្យបានត្រឹមត្រូវ ដើម្បីកុំឲ្យមានការចោទប្រកាន់បង្កឲ្យមានបញ្ហាផ្សេងៗ កើតឡើង»។
ស្រុករុក្ខគិរី បច្ចុប្បន្នមានឃុំចំនួនពីរ គឺឃុំព្រែកជីក និងឃុំព្រៃត្រឡាច មានភូមិចំនួន ២១ ភូមិ។ មានប្រជាពលរដ្ឋចំនួន ៩.០៣៥ គ្រួសារ និងមនុស្សជាង ៤ ម៉ឺននាក់។ រដ្ឋាភិបាលបានប្រកាសបង្កើតឃុំថ្មីបន្ថែមចំនួនបីនៅស្រុករុក្ខគិរី នៅឆ្នាំ ២០១២ ខាងមុខនេះ។ ក្នុងនោះ មានឃុំមុខរា ឃុំស្តុកប្រវឹក ឃុំបំបែកចេញពីឃុំព្រៃត្រឡាច និងឃុំបាសាក់ ដែលបំបែកចេញពីព្រែកជីក។
ទាក់ទិននឹងការផ្ដល់អត្តសញ្ញាណប័ណ្ណជូនដល់ប្រជាពលរដ្ឋនៅក្នុងស្រុករុក្ខគិរីនេះ ក្រុមអាជ្ញាធរបានឲ្យដឹងថា គេមានគម្រោងផ្ដល់អត្តសញ្ញាណប័ណ្ណសញ្ជាតិខ្មែរជាបន្តបន្ទាប់ ដល់ប្រជាពលរដ្ឋចំនួនជាង ៥ នាក់ទៀត នៅពេលខាងមុខនេះ។
ទន្ទឹមគ្នានេះដែរ បក្សប្រឆាំង សម រង្ស៊ី បានប្រកាសថា នឹងធ្វើលិខិតអន្តរាគមន៍ដាក់ទៅក្រសួងមហាផ្ទៃ និងគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប ឲ្យពិនិត្យមើលបញ្ហានេះឡើងវិញ និងទាមទារឲ្យមានការចាត់វិធានការផ្លូវច្បាប់ ទប់ស្កាត់រាល់សកម្មភាពកេងចំណេញនយោបាយរបស់គណបក្ស ប្រជាជនកម្ពុជា៕
ខែតុលា 17, 2011 
.jpg)
.jpg)
.jpg)
.jpg)
.jpg)
.jpg)
.jpg)
Camnews 