ដោយ ទីន ហ្សាការីយ៉ា
2011-10-15
វិទ្យុអាស៊ីសេរី
អគ្គលេខាធិការរងនៃអង្គការសហប្រជាជាតិ (អ.ស.ប.) ទទួលបន្ទុកផ្នែកច្បាប់ គ្រោងនឹងមកប្រទេសកម្ពុជា ដើម្បីជួបពិភាក្សាជាមួយមន្ត្រីនានានៃអង្គជំនុំជម្រះវិសាមញ្ញក្នុងតុលាការកម្ពុជា ឬហៅថា សាលាក្ដីខ្មែរក្រហមនៅសប្ដាហ៍ក្រោយ ទាក់ទងនឹងការលាលែងរបស់សហចៅក្រមស៊ើបអង្កេតអន្តរជាតិ។
អ្នក កាសែត ដើរ នៅ ខាង មុខ សាល សវនាការ នៃ សាលាក្ដី ខ្មែរ ក្រហម កាល ពី ថ្ងៃ ទី ២៣ ខែ មិថុនា ឆ្នាំ ២០១១។ (RFA/Leng Maly)
http://flash-mp3-player.net/medias/player_mp3_maxi.swf
លោក នេត្រ ភត្រា ជាអ្នកនាំពាក្យនៃសាលាក្ដីខ្មែរក្រហម។ លោកមានប្រសាសន៍នៅថ្ងៃទី១៥ តុលា ថា លោកបានទទួលដំណឹងអំពីការអញ្ជើញមកកម្ពុជា របស់អ្នកស្រី ប៉ាទ្រីកស្យា អូប្រៃអិន (Partricia O’Brien) ជាអគ្គលេខាធិការរងនៃអង្គការសហប្រជាជាតិនោះហើយ ប៉ុន្តែលោកមិនទាន់ដឹងអំពីរបៀបវារៈនៃកិច្ចប្រជុំនោះឡើយទេ។
សេចក្ដីប្រកាសព័ត៌មានរបស់អង្គការសហប្រជាជាតិនៅទីក្រុងញូវយ៉ក (New York) កាលពីថ្ងៃទី១៤ តុលា ថា អគ្គលេខាធិការរងនៃអង្គការសហប្រជាជាតិសរសេរថា អ្នកស្រី ប៉ាទ្រីកស្យា អូប្រៃអិន បានតាមដានលើករណីលាលែងរបស់សហចៅក្រមស៊ើបអង្កេតអន្តរជាតិ គឺលោក ស៊ីកហ្រី្វដ ប៊្លុង (Siegfried Blunk) កាលពីថ្ងៃទី៩ តុលា ពីសាលាក្ដីខ្មែរក្រហម។ អង្គការសហប្រជាជាតិនៅតែអះអាងជានិច្ចមកថា សាលាក្ដីខ្មែរក្រហមត្រូវតែដំណើរការងាររបស់ខ្លួនដោយគ្មានការជ្រៀតជ្រែកពីអង្គភាពណាមួយនោះឡើយ រួមទាំងរដ្ឋាភិបាលកម្ពុជាដែរ។
ទាក់ទងទៅនឹងបញ្ហានេះ លោក ឆំាង យុ ជានាយកមជ្ឈមណ្ឌលឯកសារកម្ពុជា។ លោកបានសម្ដែងសុទិដ្ឋិនិយមថា វាជារឿងចាំបាច់ដែលអង្គការសហប្រជាជាតិត្រូវធ្វើការស៊ើបអង្កេតលើស្ថាប័នសាលាក្ដីខ្មែរក្រហមជារួម ដើម្បីស្ដារកេរ្តិ៍ឈ្មោះតុលាការនេះឡើងវិញ។
នៅក្នុងសេចក្ដីប្រកាសព័ត៌មានដដែលនោះ គេបានស្រង់សម្ដីអ្នកនាំពាក្យអង្គការសហប្រជាជាតិ លោក ម៉ាទីន ណាសៀរគី (Martin Nasirky) ថា អ្នកស្រី ប៉ាទ្រីកស្យា អូប្រៃអិន នឹងជួបប្រជុំជាមួយមន្ត្រីរដ្ឋាភិបាល និងមន្ត្រីដទៃទៀត ដែលទាក់ទងនឹងសាលាក្ដីខ្មែរក្រហម។
លោក ម៉ាទីន ណាសៀរគី បញ្ជាក់ថា បន្ថែមលើការព្រួយបារម្ភលើបញ្ហាជ្រៀតជ្រែករបស់រដ្ឋាភិបាល ការព្រួយបារម្ភដទៃទៀតក៏នឹងត្រូវលើកឡើងដែរ ទាក់ទងនឹងការងាររបស់សាលាក្ដី ដែលនឹងត្រូវដោះស្រាយនៅក្នុងអំឡុងពេលទស្សនកិច្ចនៅកម្ពុជារបស់អ្នកស្រី។ លោកបន្តថា វាសំខាន់ណាស់ដែលអង្គការសហប្រជាជាតិត្រូវពិភាក្សាជាមួយមន្ត្រីជាន់ខ្ពស់នៃសាលាក្ដីខ្មែរក្រហម និងមន្ត្រីផ្សេងទៀត ដើម្បីបង្កើនការយល់ដឹងអំពីបញ្ហាទាំងនេះ។
ស្របពេលជាមួយគ្នានេះដែរ មន្ត្រីនាំពាក្យនៃសាលាក្ដីខ្មែរក្រហម លោក នេត្រ ភត្រា បានឲ្យដឹងថា សហរដ្ឋអាមេរិកនឹងផ្ដល់ថវិកាចំនួន ១លាន៦សែន៥ម៉ឺនដុល្លារទៀត ដល់សាលាក្ដីខ្មែរក្រហម ខណៈដែលតុលាការនេះកំពុងរៀបចំដំណើរការរបស់ខ្លួនក្នុងការបើកសវនាការសំណុំរឿង ០០២ នៅពេលខាងមុខឆាប់ៗនេះ។
គម្រោងថវិកាសម្រាប់ឆ្នាំ២០១១ រាប់ទាំងភាគីកម្ពុជា និងភាគីអង្គការសហប្រជាជាតិសាលាក្ដីខ្មែរក្រហមនៅខ្វះថវិកាប្រមាណជាង ១០លានដុល្លារទៀត សម្រាប់ដំណើរការការងាររបស់ខ្លួន។
រហូតមកទល់ពេលនេះ មិនទាន់មានចៅក្រមថ្មីចូលកាន់តំណែងជំនួសលោក ប៊្លុង នៅឡើយទេ បើទោះបីជាអង្គការសហប្រជាជាតិបានប្រកាសថា គេនឹងបញ្ជូនសហចៅក្រមថ្មីជនជាតិស្វីស មកក៏ដោយ៕
ខែតុលា 15, 2011 
Camnews 