ដោយ : សុខ ភក្តី
ថ្ងៃទី 27 តុលា 2011
CEN
ភ្នំពេញ: អយ្យការតុលាការសាលាដំបូងរាជធានីភ្នំពេញ បានចាត់ការលើពាក្យបណ្តឹងរបស់សហមេធាវីបរទេសការពារលោក នួនជា ដែលបានប្តឹងថ្នាក់ដឹកនាំជាន់ខ្ពស់រដ្ឋាភិបាលចំនួន ១០ រូប ពីការជ្រៀតជ្រែកលើដំណើរការតុលាការខ្មែរក្រហម។ ព្រះរាជអាជ្ញា បានកោះហៅលោក Michiel Pestman សហមេធាវីបរទេសរបស់លោក នួនជា ចូលបំភ្លឺតុលាការ នៅថ្ងៃទី៣វិច្ឆិកា ឆ្នាំ២០១១។ ចំណែកលោក Andrew Ianuzzi អ្នកប្រឹក្សាច្បាប់ផ្នែកមេធាវីការពារក្តី ដែលបានដាក់ពាក្យបណ្តឹងរួមគ្នានោះ ត្រូវចូលតុលាការ នៅថ្ងៃទី៤វិច្ឆិកា ឆ្នាំ២០១១។
ដីកាកោះ ចុះថ្ងៃទី២៦តុលា ឆ្នាំ២០១១ ចេញដោយលោក សុខ រឿន ព្រះរាជអាជ្ញារង របស់តុលាការសាលាដំបូង បានបង្គាប់ឲ្យលោក មៃឃើល ផេសមែន ( Michiel Pestman ) ចូលទៅកាន់អយ្យការអមសាលាដំបូងរាជធានីភ្នំពេញ នៅថ្ងៃទី៣ ខែវិច្ឆិកា ឆ្នាំ២០១១ នៅវេលាម៉ោង ៨ ព្រឹក ដើម្បីចូលមកបំភ្លឺលើដំណើររឿង លើបណ្តឹងរបស់ខ្លួន ចុះថ្ងៃទី២៤តុលា ឆ្នាំ២០១១។
ចំណែកដីកាមួយទៀត លោក សុខ រឿន បានតម្រូវឲ្យលោក អេឌ្រូ អ៊ានូហ្ស៊ី ( Andrew Ianuzzi ) ចូលទៅកាន់ អយ្យការអមសាលាដំបូងរាជធានីភ្នំពេញ នៅថ្ងៃទី៤ ខែវិច្ឆិកា ឆ្នាំ២០១១ វេលាម៉ោង ៨ ព្រឹក ដើម្បីចូលមកបំភ្លឺ ពីដំណើររឿង លើបណ្តឹងរបស់ខ្លួន ចុះថ្ងៃទី២៤តុលា ឆ្នាំ២០១១។
ជាមួយនឹងដីកាកោះហៅដើមបណ្តឹង ដែលជាសហមេធាវីបរទេសការពារ លោក នួនជា ខាងលើនេះ នៅថ្ងៃទី២៦តុលា ឆ្នាំ២០១១ លោក សុខ រឿន តំណាងអយ្យការអមសាលាដំបូងរាជធានីភ្នំពេញ ក៏បានចេញដីកាបង្គាប់ឲ្យដើមបណ្តឹងទាំងពីរ ដាក់ភស្តុតាង ដែលពាក់ព័ន្ធនឹងពាក្យបណ្តឹង ចុះថ្ងៃទី២៤ ខែតុលា ឆ្នាំ២០១១ នៅក្នុងសំណុំរឿង ចុះថ្ងៃទី២៤តុលា ឆ្នាំ២០១១។
សូមរម្លឹកថា កាលពីព្រឹកថ្ងៃច័ន្ទ ទី២៤តុលា ឆ្នាំ២០១១ សហមេធាវីបរទេសរបស់លោក នួនជា គឺលោកមេធាវី Michiel Pestman និងលោក Andrew Ianuzzi អ្នកប្រឹក្សាច្បាប់ផ្នែកមេធាវីការពារក្តី បានដាក់ពាក្យបណ្តឹងរួមគ្នា ទៅកាន់តុលាការសាលាដំបូងរាជធានីភ្នំពេញ។ ពាក្យបណ្តឹងរបស់អ្នកទាំងពីរ បានប្តឹងមន្ត្រីជាន់ខ្ពស់រដ្ឋាភិបាលកម្ពុជាចំនួន ១០ រូប បូករួមទាំងសម្តេចទាំងបី របស់គណបក្សប្រជាជនកម្ពុជា ថាបានជ្រៀតជ្រែក លើដំណើរការតុលាការខ្មែរក្រហម។
ពាក្យបណ្តឹងនោះ ជាពាក្យបណ្តឹងលើកទី២ របស់សហមេធាវីបរទេសការពារក្តីលោក នួន ជា បន្ទាប់ពីពាក្យបណ្តឹងលើកទី១ កាលពីឆ្នាំ០០៩ ដែលបានប្តឹងចោទប្រកាន់តុលាការខ្មែរក្រហម ពីបទពុករលួយ។ ប៉ុន្តែពាក្យបណ្តឹងកាលណោះ មិនត្រូវបានតុលាការភ្នំពេញ លើកយកចាត់ការឡើយ។
មកដល់រសៀលថ្ងៃទី២៧តុលា ឆ្នាំ២០១១ លោក លោក Andrew Ianuzzi អ្នកប្រឹក្សាច្បាប់ផ្នែកមេធាវីការពារក្តី បានអះអាងថា លោក និងលោកមេធាវីបរទេសរបស់លោក នួនជា បានទទួលដីការបស់តុលាការក្រុងភ្នំពេញហើយ។
ចំណែកលោក នេត្រ ភក្ត្រា អ្នកនាំពាក្យតុលាការខ្មែរក្រហម បានអត្ថាធិប្បាយថា នោះជាសិទ្ធរបស់សហមេធាវីការពារលោកនួនជា ដោយមិនប៉ះពាល់ដល់ដំណើរសាលាក្តីខ្មែរក្រហមទេ។ លើសំណុំរឿង០០២ នឹងត្រូវបើកសវនាការ នៅថ្ងៃទី២១វិច្ឆិកា ឆ្នាំ២០១១៕
No comments yet... Be the first to leave a reply!