ដោយ លាង ដឺលុច
ថ្ងៃ ពុធ 07 កញ្ញា 2011
RFI
ស្តាប់សេចក្តីរាយការណ៍របស់ លាង ដឺលុច ពីទីក្រុងភ្នំពេញ (01:55)
ក្រោយពីមានហេតុការណ៍ដួលសន្លប់នៃកម្មកររោងចក្រជាបន្តបន្ទាប់ ក្រុមហ៊ុនសម្លៀកបំពាក់ម៉ាកល្បីៗជាច្រើនដែលជាអ្នកបញ្ជាទិញ សម្លៀកបំពាក់ផលិតនៅកម្ពុជាបានសន្យាថា ពួកគេនឹងបើកការស៊ើបអង្កេតលើបញ្ហានេះ។ ស្របពេលជាមួយគ្នានេះ ក្រុមគណៈកម្មការអន្តរក្រសួងរបស់រដ្ឋាភិបាលកម្ពុជាក៏កំពុងបន្ត ស្រាវជ្រាវអំពីហេតុការណ៍នេះដែរ។
ក្រុមហ៊ុនសម្លៀកបំពាក់ម៉ាកល្បីៗជាង២០ បានសន្យាថាពួកគេនឹងបញ្ជូនក្រុមអ្នកជំនាញដើម្បីតាមដានស្វែងរកអោយឃើញមូលហេតុដែលធ្វើអោយកម្មករដួលសន្លប់នៅក្នុងរោងចក្រពេលពួកគេកំពុងធ្វើការនោះ។ នេះបើតាមការបញ្ជាក់របស់តំណាងអង្គការពលកម្មអន្តរជាតិ។
ការសន្យារបស់តំណាងក្រុមហ៊ុនសំលៀកបំពាក់ម៉ាកល្បីៗទាំងនោះដែលរួមមាន Gap, H&M Walmart និង Target ត្រូវបានធ្វើឡើងនៅក្នុងកិច្ចប្រជុំមួយកាលពីថ្ងៃអង្គារម្សិលមិញ រវាងរដ្ឋាភិបាលដែលតំណាងដោយរដ្ឋមន្ត្រីពាណិជ្ជកម្មលោក ចម ប្រសិទ្ធ តំណាងអង្គការពលកម្មអន្តរជាតិ តំណាងថៅកែរោងចក្រ តំណាងសហជីពកម្មករ និង ក្រុមហ៊ុនអ្នកបញ្ជាទិញ។
តំណាងអង្គការពលកម្មអន្តរជាតិបានអត្ថាធិប្បាយប្រាប់ទីភ្នាក់ងារព័ត៌មានបារាំងAFPថា គេត្រូវប្រញាប់បើកការស៊ើបអង្កេតជាបន្ទាន់ដើម្បីរកអោយឃើញមូលហេតុដែលនាំអោយកម្មករដួលសន្លប់ និងកាត់បន្ថយមូលហេតុចាស់ៗពីមុនដែលគេបានដឹងហើយ ដូចជាសុវត្ថិភាពនៅកន្លែងធ្វើការងារ បញ្ហាសុខភាពកម្មករ និងការបរិភោគមិនគ្រប់គ្រាន់។
ស្របពេលដែលក្រុមហ៊ុនអ្នកបញ្ជាទិញសន្យាបើកការស៊ើបអង្កេតលើបញ្ហានៃការដួលសន្លប់នៃកម្មករនេះ នៅថ្ងៃពុធទី៧កញ្ញានេះ មន្ត្រីរដ្ឋាភិបាលមកពីក្រសួងចំនួន៦ដែលពាក់ព័ន្ធបានជួបប្រជុំគ្នានៅក្នុងក្រសួងការងារដើម្បីពិភាក្សារកវិធានការទប់ទល់មិនអោយមានហេតុការណ៍ដួលសន្លប់នេះទៀត។
របាយការណ៍របស់គណៈកម្មការសិក្សាស្រាវជ្រាវ ទប់ស្កាត់ករណីសន្លប់ និង បង្ការគ្រោះថ្នាក់ការងារនៃក្រសួងការងារបង្ហាញថា ក្នុងឆ្នាំនេះរហូតដល់ពេលនេះ មានកម្មករ-កម្មការិនីចំនួន១៥៧៨នាក់បានដួលសន្លប់។ ការដួលសន្លប់ដែលក្រុមការងារជំនាញនេះបញ្ជាក់ថា បណ្តាលមកពីមូលហេតុចំបងៗមួយចំនួនដូចជា៖ ការធ្វើការលើសម៉ោងរបស់ក្រុមកម្មករ ការពុលដោយការបាញ់ថ្នាំសម្លាប់សត្វល្អិតនៅក្នុងរោងចក្រ ការបញ្ចេញផ្សែងចំហាយ ឬអគ្គិសនីនៅក្នុងរោងចក្រ សីតុណ្ហភាពនិងការបញ្ចេញបញ្ចូលខ្យល់នៅក្នុងរោងចក្រមិនគ្រប់គ្រាន់ជាដើម៕