ខែកញ្ញា 4, 2011 
ដោយ ដែន អយុធ្យា
2011-09-03
វិទ្យុអាស៊ីសេរី
មេដឹកនាំគណបក្សសិទ្ធិមនុស្សបានថ្លែងចាត់ទុកការចាប់ឃុំខ្លួនសមាជិករបស់ខ្លួនចំនួនពីរនាក់នៅពេលថ្មីៗ នេះ ថាជាការបំភិតបំភ័យ។
កង កម្លាំង ការពារ ព្រំដែន វៀតណាម រារាំង ក្រុម មន្ត្រី គណបក្ស សម រង្ស៊ី មិន ឲ្យ ចូល ទៅ ពិនិត្យ តម្រុយ បង្គោល ព្រំដែន កម្ពុជា- វៀតណាម ក្នុង ស្រុក មេមត់ ខេត្ត កំពង់ចាម នៅ ថ្ងៃ ទី ១៤ ខែ ធ្នូ ឆ្នាំ ២០១០។ (RFA/Uon Chhin)
លោក កឹម សុខា ប្រធានគណបក្សសិទ្ធិមនុស្ស នៅល្ងាចថ្ងៃសៅរ៍ ទី៣ ខែកញ្ញា បានអំពាវនាវដល់សមាជិក និងអ្នកគាំទ្រតាមមូលដ្ឋានឲ្យមានភាពក្លាហាន និងពុះពារគ្រប់ឧបសគ្គ ដោយមិនត្រូវចាញ់កលល្បិចយុទ្ធសាស្ត្រគណបក្សកំពុងកាន់អំណាចធ្វើទង្វើមកលើគណបក្សសិទ្ធិមនុស្សនោះទេ។
សេចក្ដីអំពាវនាវរបស់លោក កឹម សុខា បែបនេះ បានកើតមានបន្ទាប់ពីសមត្ថកិច្ចនគរបាលខេត្តកំពង់ចាម បានចាប់ខ្លួនសកម្មជនរបស់ខ្លួនចំនួនពីរនាក់ កាលពីល្ងាចថ្ងៃទី១ ខែកញ្ញា បញ្ជូនទៅកាន់តុលាការ ហើយនៅរសៀលថ្ងៃទី២ ខែកញ្ញា ត្រូវបានអយ្យការអមតុលាការខេត្តកំពង់ចាម សម្រេចចោទប្រកាន់លើសកម្មជនរបស់ខ្លួនពីបទញុះញង់ឲ្យមានបទល្មើសឧក្រិដ្ឋ និងឲ្យមានចលាចលក្នុងសង្គមរួចមក។
កាលពីល្ងាចថ្ងៃព្រហស្បតិ៍ ទី១ ខែកញ្ញា ឆ្នាំ២០១១ សកម្មជនគណបក្សសិទ្ធិមនុស្សចំនួន ២នាក់ ត្រូវបាននគរបាលខេត្តកំពង់ចាមចាប់ខ្លួន ដោយសារអ្នកទាំងពីរបានផ្សព្វផ្សាយឯកសារ ដែលជាគោលនយោបាយគណបក្ស ពាក់ព័ន្ធនឹងរឿងវៀតណាមទន្ទ្រានកាន់កាប់ទឹកដីកម្ពុជា។ បច្ចុប្បន្នសកម្មជនបក្សសិទ្ធិមនុស្សទាំងពីររូប ត្រូវបានចៅក្រមស៊ើបអង្កេតតុលាការខេត្តកំពង់ចាម ចេញដីកាឃុំខ្លួនជនទាំងពីរក្នុងពន្ធនាគាររង់ចាំកាត់ទោស។
មន្ត្រីនគរបាលខេត្តកំពង់ចាមមិនបញ្ចេញឈ្មោះម្នាក់ បានឲ្យដឹងថា សកម្មជនទាំងពីរនាក់របស់គណបក្សសិទ្ធិមនុស្ស កំពុងជាប់ឃុំ មានលោក ផាន ផា អាយុ៦៦ឆ្នាំ ជាអនុប្រធានបក្សសិទ្ធិមនុស្ស ប្រចាំឃុំទន្លេបិទ ស្រុកត្បូងឃ្មុំ និងលោក អ៊ុំ យាន អាយុ៦៩ឆ្នាំ ជាសកម្មជនសិទ្ធិមនុស្សប្រចាំភូមិទួលខ្សាច់ មន្ត្រីគណបក្សសិទ្ធិមនុស្សបានអះអាងថា ឈ្មោះ ភូមិ យាន អាយុ៧១ឆ្នាំ រស់នៅឃុំទន្លេបិទ ស្រុកត្បូងឃ្មុំ។
វិទ្យុអាស៊ីសេរីមិនទាន់អាចទាក់ទងលោកស្នងការនគរបាលខេត្តកំពង់ចាម និងមន្ត្រីតុលាការខេត្តកំពង់ចាម ដើម្បីបំភ្លឺជុំវិញការចាប់ខ្លួនសកម្មជនបក្សសិទ្ធិមនុស្ស ដែលមេដឹកនាំគណបក្សនេះចោទថា ធ្វើឡើងដោយគ្មានដីកាតុលាការនេះបានទេ នៅរសៀលថ្ងៃទី៣ ខែកញ្ញា ឆ្នាំ២០១១។
ទោះយ៉ាងណា លោក កឹម សុខា បានចាត់ទុកថា ការចាប់ និងឃុំខ្លួនសកម្មជនគណបក្សសិទ្ធិមនុស្សចំនួនពីររូប នៅខេត្តកំពង់ចាម បានបង្ហាញឲ្យឃើញពីការគំរាមកំហែងផ្នែកនយោបាយ និងជាការរំលោភសិទ្ធិ រំខានដល់ដំណើរការរៀបចំការបោះឆ្នោតនៅកម្ពុជា ឲ្យមានលក្ខណៈសេរី ត្រឹមត្រូវ និងយុត្តិធម៌។
លោកបានអំពាវនាវដល់រាជរដ្ឋាភិបាលឲ្យពិនិត្យនូវទង្វើរបស់អាជ្ញាធរមូលដ្ឋាន ដែលបានរំលោភលើសិទ្ធិនយោបាយរបស់ពលរដ្ឋ និងស្នើឲ្យដោះលែងជាបន្ទាន់នូវសកម្មជនគណបក្សសិទ្ធិមនុស្សទាំងពីររូប ដែលមិនបានប្រព្រឹត្តអ្វីខុសច្បាប់រដ្ឋ ឲ្យមានសេរីភាពឡើងវិញ។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានថ្លែងថា មជ្ឈមណ្ឌលកំពុងបើកការស៊ើបអង្កេតលើករណីចាប់ខ្លួនសមាជិកគណបក្សសិទ្ធិមនុស្ស រកឲ្យឃើញពីមូលហេតុនៃការចាប់ខ្លួននេះ។ លោកថា ការចាប់ខ្លួនសកម្មជនបក្សប្រឆាំងនៅមុនការបោះឆ្នោតចូលមកដល់ អាចជាសញ្ញាបំភិតបំភ័យ ឬជាការគំរាមកំហែងមួយ។
យ៉ាងណាក៏ដោយ លោក ហេង សម្បត្តិ ស្នងការរងនគរបាលខេត្តកំពង់ចាម ដែលកាន់សំណុំរឿងចាប់ខ្លួនសមាជិកបក្សសិទ្ធិមនុស្ស បានឲ្យប្រព័ន្ធផ្សព្វផ្សាយដឹងថា មូលហេតុដែលសមត្ថកិច្ចចាប់ខ្លួនសមាជិកបក្សសិទ្ធិមនុស្សទាំងពីរនាក់ ដោយសារតែនៅលើឯកសារ ដែលអ្នកទាំងពីរអះអាងថា ទទួលបានពីប្រធានគណបក្សសិទ្ធិមនុស្សខេត្តកំពង់ចាម កម្រាស់៩ទំព័រ មានសរសេរញុះញង់ឲ្យពលរដ្ឋយល់ច្រឡំលើរដ្ឋាភិបាលកម្ពុជា ពាក់ព័ន្ធនឹងរឿងកាត់ទឹកដីកម្ពុជាឲ្យប្រទេសវៀតណាម៕
Camnews 