ដោយ : CEN
ថ្ងៃទី 26 កញ្ញា 2011
ទឹកជំនន់លិចចំការចេក និងដំណាំ ព្រមទាំងផ្ទះរបស់ប្រជាពលរដ្ឋ នៅខេត្តកណ្តាល៕
ភ្នំពេញ:កិច្ចប្រជុំពិសេសរបស់គណៈរដ្ឋមន្ត្រីដឹកនាំដោយសម្តេចនាយករដ្ឋមន្ត្រីហ៊ុនសែន នាព្រឹកថ្ងៃទី២៦កញ្ញា ឆ្នាំ២០១១ បានសម្រេចដាក់ចេញនូវវិធានការ២ គឺវិធានការចំពោះមុខ និងវិធានការក្រោយទឹកស្រក។ កិច្ចប្រជុំពិសេសនៅព្រឹកមិញ សម្តេចហ៊ុនសែន ក៏បានអំពាវនាវឲ្យក្រសួងស្ថាប័ន កាត់បន្ថយចំណាយមិនចាំបាច់ និងប្រឹងប្រែងប្រមូលចំណូលចូលរដ្ឋ។ ក្នុងនោះ មន្ត្រីរដ្ឋាភិបាល ក៏ត្រូវធ្វើជាគំរូ ក្នុងការបង់ពន្ធផ្ទះផងដែរ។
បន្ទាប់ពីកិច្ចប្រជុំអស់ពេលប្រហែល ៤ ម៉ោង នៅវិមានសន្តិភាព កិច្ចប្រជុំពិសេសគណៈរដ្ឋមន្ត្រីពេញអង្គ បានសម្រេចដាក់ចេញនូវវិធានការទប់ទល់នឹងគ្រោះទឹកជំនន់ នូវវិធានការ ២ ចំណុច គឺទី១ វិធានការចំពោះមុខ និងទី២ វិធានការក្រោយពេលទឹកស្រក។ នេះបើតាមការបញ្ជាក់របស់លោក ខៀវ កាញារីទ្ធ អ្នកនាំពាក្យរាជរដ្ឋាភិបាលកម្ពុជា និងជារដ្ឋមន្ត្រីក្រសួងព័ត៌មាន។
លោក ខៀវ កាញារីទ្ធ បានមានប្រសាសន៍ថា វិធានការចំពោះមុខ សំខាន់គឺការដោះស្រាយ ធ្វើយ៉ាងណា ដើម្បីធានាកុំឲ្យមានអ្នកស្លាប់ ដោយអត់បាយ។ ទី២-គឺអភិបាលខេត្តទាំងអស់ ត្រូវនៅនឹងកន្លែង មិនត្រូវចេញទៅក្រៅប្រទេស ឬក៏មកប្រជុំនៅភ្នំពេញទេ។ ទី៣-ឲ្យអាជ្ញាធរខេត្តថ្នាក់មូលដ្ឋាន ត្រូវសហការជាមួយកាកបាទក្រហម ដើម្បីបន្តផ្តល់ជំនួយដល់ប្រជាជនរងគ្រោះ។
លោកខៀវកាញារីទ្ធ បានបន្ថែមថា រដ្ឋាភិបាលបានសម្រេចបញ្ជូនទៅកាន់ខេត្តទាំងអស់ ដែលរងគ្រោះ ដោយទឹកជំនន់ នូវកញ្ចប់ថវិកាចំនួន ២០០ លានរៀល ក្នុងខេត្តនិមួយៗ ដើម្បីចុះទៅជួយសង្គ្រោះភ្លាមៗនៅតាមតំបន់និមួយៗ រួមទាំងអង្ករមួយចំនួនទៀត។
ចំណែកវិធានការក្រោយពេលទឹកស្រក ត្រូវបានលោក ខៀវ កាញារីទ្ធ បញ្ជាក់ថា សំខាន់គឺស្តារដំណាំស្រូវឡើងវិញ ឬកន្លែងណា ដាំស្រូវមិនបាន គឺយើងធ្វើដំណាំផ្សេង និងទី២ ត្រូវពិនិត្យលើសុខភាពប្រជាជន នៅពេលទឹកស្រក និងត្រៀមខ្លួន ដើម្បីស្តារផ្លូវ ដែលខូចខាត។
លោករដ្ឋមន្ត្រី ខៀវ កាញារីទ្ធ ក៏បានលើកយករបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ មកបង្ហាញក្នុងបណ្ថាញទំនាក់ទំនងសង្គម Facebook ដោយលើកឡើងថា មកដល់ពេលនេះ ទឹកជំនន់បានលិចលង់ខេត្តចំនួន ១៤ ក្នុងស្រុកចំនួន ៨៧ និងមានប្រជាជន ៩០.៣០៣ គ្រួសារ ត្រូវរងគ្រោះ។ ក្នុងនោះ មានអ្នកស្លាប់ដោយទឹកជំនន់សរុបចំនួន ៦១ នាក់ ដែលមានកុមារ ៣៤ នាក់។ ចំណែកប្រជាជន ១៣.៤០២ គ្រួសារ ត្រូវបានជម្លៀសទៅកាន់ទីទួលសុវត្ថិភាព។ ផ្ទះប្រជាជនចំនួន ៨៣.០០៧ ខ្នង ត្រូវបានលិចលង់ ហើយផ្ទះចំនួន ២៣៨ ផ្ទះ ត្រូវបានបំផ្លាញ។
នៅក្នុងកិច្ចប្រជុំពិសេសគណៈរដ្ឋមន្ត្រីពេញអង្គ លើការពិនិត្យស្ថានភាពទឹកជំនន់ កាលពីព្រឹកថ្ងៃទី២៦កញ្ញា ឆ្នាំ២០១១ ត្រូវបានលោក ឱម ច័ន្ទតារា ប្រធាននាយកដ្ឋានសារគមនាគមន៍ នៃទីស្តីការគណៈរដ្ឋមន្ត្រី ដែលជាលេខាកត់ត្រា សម្រាប់កិច្ចប្រជុំពិសេស បានថ្លែងប្រាប់អ្នកយកព័ត៌មាន CEN ថា ស្ថាភាពទឹកជំនន់ ត្រូវបានរាយការណ៍ជូនអង្គប្រជុំដោយលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម។ ក្នុងនោះ ក៏មានរបាយការណ៍របស់អភិបាលខេត្តទាំង ១០ ដែលមានផលប៉ះពាល់ដោយសារទឹកជំនន់។
មន្ត្រីដដែល បានបន្ថែមថា ក្រោយពីស្តាប់របាយការណ៍រួច សម្តេចនាយករដ្ឋមន្ត្រី ហ៊ុនសែន បានណែនាំឲ្យអាជ្ញាធរខេត្តនិមួយៗ យកចិត្តទុកដាក់លើសុខភាពរបស់ប្រជាពលរដ្ឋ ហើយធ្វើយ៉ាងណា កុំឲ្យប្រជាពលរដ្ឋ ស្លាប់ដោយអត់បាយ។ អាជ្ញាធរខេត្តស្រុកភូមិនិមួយៗ ក៏ត្រូវសហការជាមួយកាកបាទក្រហម ដើម្បីយកចិត្តទុកដាក់ ជួយសង្គ្រោះដល់ពលរដ្ឋ ដែលលិចលង់ដោយសារទឹកជំនន់ផងដែរ។
លោក ឱម ច័ន្ទតារា បានបន្ថែមថា រាជរដ្ឋាភិបាលកម្ពុជា បានសម្រេចបញ្ជូនអង្ករចំនួន ១៧០០ តោន ដើម្បីឲ្យអាជ្ញាធរខេត្តនិមួយៗ ចាត់ចែង ផ្តល់ឲ្យប្រជាពលរដ្ឋ រងគ្រោះ ដោយទឹកជំនន់។ សម្តេចហ៊ុនសែន ក៏បានបញ្ជាឲ្យក្រសួងសេដ្ឋកិច្ច និងហិរញ្ញវត្ថុ ផ្តល់លុយចំនួន ២០០ លានរៀល ទៅកាន់ខេត្តនិមួយៗ ដើម្បីចាត់ចែង ដោះស្រាយបញ្ហាចំពោះមុខ។ ក្នុងនោះ លោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏ត្រូវដឹកនាំកិច្ចប្រជុំពិសេសមួយ ជាមួយអាជ្ញាធរខេត្តរងគ្រោះដោយទឹកជំនន់ គណៈកម្មាធិការជាតិគ្រប់គ្រងគោះមហន្តរាយ ក្រសួងអភិវឌ្ឍន៍ជនបទ ដើម្បីពិនិត្យលើការខូចខាតផ្លូវស្ពាន ហើយត្រូវសងស្ពានបាឡេ ដោយយកពីក្រុមវិស្វកម្ម របស់ក្រសួងការពារជាតិ ដើម្បីភ្ជាប់ចរាចរណ៍ឡើងវិញ។
មន្ត្រីជាន់ខ្ពស់ដដែល ក៏បានបន្ថែមថា សម្តេចនាយករដ្ឋមន្ត្រី ហ៊ុនសែន ក៏បានលើកឡើងថា នៅតាមសាលារៀន ដែលលិចលង់ដោយគ្រោះទឹកជំនន់ ហើយនៅពេលបើកបវេសនកាល នាថ្ងៃទី១តុលាខាងមុខ មិនអាចធ្វើបានទេ គឺអាជ្ញាធរ ត្រូវរកទីទួលសុវត្ថិភាពណាមួយ ដើម្បីប្រារព្ធពិធី និងរៀនជាបណ្តោះអាសន្ន។
ក្នុងកិច្ចប្រជុំពិសេសគណៈរដ្ឋមន្ត្រី សម្តេចនាយករដ្ឋមន្ត្រី ហ៊ុនសែន ក៏បានអំពាវនាវដល់ស្ថាប័ន និងក្រសួងនានា ត្រូវកាត់បន្ថយការចំណាយមិនចាំបាច់ ហើយស្ថាប័ន ដែលត្រូវប្រមូលពន្ធ ត្រូវខិតខំរកចំណូលឲ្យបានច្រើន ចូលថវិការដ្ឋ ព្រោះថា ពេលនេះរដ្ឋាភិបាល ត្រូវប្រឈមនឹងការចំណាយលើគ្រោះទឹកជំនន់។ ជាមួយគ្នានោះ សម្តេចនាយករដ្ឋមន្ត្រី ហ៊ុនសែន ក៏បានជំរុញឲ្យមន្ត្រីរដ្ឋាភិបាល ត្រូវធ្វើជាគំរូ ក្នុងការបង់ពន្ធផ្ទះ។ សម្តេចបានឈានមុខគេ ដោយផ្ទះរបស់សម្តេច បានបង់ពន្ធរួចរាល់ហើយ៕
ខែកញ្ញា 26, 2011 
Camnews 