ថ្ងៃអង្គារ, 20 ខែកញ្ញា 2011
ដោយ ហេង រស្មី
វីអូអេ ខ្មែរ | ភ្នំពេញ
ស្តាប់ព័ត៌មាន៖ រាយការណ៍ដោយ ហេង រស្មី ថ្ងៃទី២០ ខែកញ្ញា ឆ្នាំ២០១១
MP3 | Windows Media
សាលាឧទ្ធរណ៍នៅថ្ងៃអង្គារនេះ បានបើកសវនាការជំនុំជម្រះរឿងក្តីលោក សម រង្ស៊ី មេដឹកនាំគណបក្សប្រឆាំង ដែលកំពុងនិរទេសខ្លួននៅឯក្រៅប្រទេស ពីបទក្លែងផែនទី ព្រមទាំងផ្សព្វផ្សាយព័ត៌មានផ្ទុយពីការណ៍ពិត។
លោក សម រង្ស៊ី មេដឹកនាំ គណបក្ស ប្រឆាំង (រូបថត៖ វីអូអេ ខ្មែរ)
សវនាការត្រូវបានធ្វើឡើងតែប៉ុន្មានម៉ោងប៉ុណ្ណោះ ដោយគ្មានវត្តមានលោក សម រង្ស៊ី និងមេធាវីការពារក្តីទេ។ ក៏ប៉ុន្តែគណៈមេធាវីកម្ពុជាបានតែងតាំងលោករាជ ហុកសេង ឲ្យមកការពារក្តីនេះ។ លោក ឈុន លាងម៉េង ប្រធានចៅក្រមជំនុំជម្រះ បានប្រកាសថា ដោយយោងតាមច្បាប់ក្រមព្រហ្មទណ្ឌថ្មី លោក សម រង្ស៊ី ត្រូវបានកាត់ទោសឲ្យជាប់ពន្ធនាគារចំនួនប្រាំពីរឆ្នាំ និងពិន័យជាប្រាក់ចំនួន៣លានរៀល ប៉ុន្តែបានរក្សាទុកសំណងខូចខាតចំនួន៦០លានរៀលឲ្យនៅដដែល។
លោក រាជ ហុកសេង មេធាវីការពារក្តីឲ្យលោក សម រង្ស៊ី ដែលបានតែងតាំងពីគណៈមេធាវី មិនបានធ្វើអត្ថាធិប្បាយទេ។
លោក គី តិច មេធាវីការពារក្តីរដ្ឋាភិបាលបាននិយាយថា សេចក្តីសម្រេចរបស់សាលាឧទ្ធរណ៍ អាចទទួលយកបាន ហើយបានផ្តល់យុត្តិធម៌ដល់រដ្ឋាភិបាល។
«ព្រោះការសម្រេចនេះ ខ្ញុំយល់ថា សាសាឧទ្ធរណ៍បានសម្រេចត្រឹមត្រូវផ្អែកទៅលើច្បាប់សុទ្ធសាធតែម្តង។ ហើយខ្ញុំជឿជាក់ថា រដ្ឋាភិបាលអាចនឹងទទួលយកបាន»។
លោក យឹម សុវណ្ណ អ្នកតំណាងរាស្រ្ត និងជាអ្នកនាំពាក្យគណបក្សសម រង្ស៊ី បាននិយាយថា លោកមិនយល់ចំពោះតុលាការកម្ពុជាថាតើតុលាការបានផ្អែកទៅលើច្បាប់អ្វីយកមកកាត់ទោសអ្នកស្នេហាជាតិដូចជាលោក សម រង្ស៊ី។
លោក យឹម សុវណ្ណ បានបញ្ជាក់ថា គណបក្សសម រង្ស៊ី មិនចាប់អារម្មណ៍ចំពោះសវនការនេះទេ ហើយយើង ក៏គ្មានបំណងដាក់ពាក្យទៅតុលាការកំពូល ដើម្បីប្រឆាំងជំទាស់ទៅនឹងសាលក្រមនោះទេ។
«យើងមិនសូវជាយកចិត្តទុកដាក់ចំពោះសាលក្រមតុលាការហ្នឹងប៉ុន្មានទេ។ ឥឡូវ យើងប្រមូលផ្តុំពេលវេលារបស់យើងគិតទៅលើការដោះស្រាយនយោបាយ។ យើងប្រើប្រាស់មធ្យោបាយយើងមានតាមរយៈការទូត តាមរយៈមធ្យោបាយផ្សេងៗដែលអាចធ្វើទៅបានដើម្បីដោះស្រាយបញ្ហាហ្នឹង ឲ្យទាល់តែរួចរាល់។ យ៉ាងហោចណាស់ក៏មានការបោះឆ្នោតខាងមុននេះ»។
តុលាការក្រុងភ្នំពេញ កាលពីថ្ងៃទី២៣ ខែកញ្ញា ឆ្នាំ២០១០ បានកាត់ទោសកំបាំងមុខលោក សម រង្ស៊ី មេដឹកនាំគណបក្សប្រឆាំងឲ្យជាប់ពន្ធនាគាររយៈពេលដប់ឆ្នាំ និងពិន័យជាប្រាក់៥លានរៀលពីបទក្លែងផែនទី នឹងផ្សព្វផ្សាយព័ត៌មានមិនពិត។ ក៏ប៉ុន្តែទោសកំហុសរបស់លោក សម រង្ស៊ី បានបន្ថយទោសពី១០ឆ្នាំមកនៅត្រឹមប្រាំពីរឆ្នាំវិញ។ ចំណែកឯការពិន័យជាប្រាក់បានបន្ថយពីប្រាំលានរៀល មកនៅត្រឹមបីលានរៀលវិញទៅតាមច្បាប់ក្រមព្រហ្មទណ្ឌថ្មី។
កាលពីថ្ងៃទី៧ ខែមករា ឆ្នាំ២០០៩ លោកសម រង្ស៊ី ត្រូវបានតុលាការខេត្តស្វាយរៀងកាត់ទោសឲ្យជាប់ពន្ធនាគាររយៈពេលពីរឆ្នាំ និងពិន័យជាប្រាក់ចំនួន៦៥លានរៀល ពីបទដកតម្រុយបង្គោលព្រំដែនលេខ១៨៥ នៅស្រុកចន្ទ្រា ខេត្តស្វាយរៀង តាមព្រំដែនកម្ពុជា និងវៀតណាមនឹងញុះញង់ឲ្យមានការរើសអើងជាតិសាសន៍៕
បណ្តាញទាក់ទងគ្នា
តុលាការកោះហៅគណបក្សសម រង្ស៊ីពីរឿងរបាយការណ៍ហិរញ្ញវត្ថុ.
លោក ហ៊ុន សែន តាំងចិត្តខ្ពស់ដោះស្រាយជម្លោះរវាងខ្មែរនិងខ្មែរ.
ក្រុមអ្នកវិភាគនិយាយថាគណបក្សកាន់អំណាចវាយប្រហារលើគណបក្សប្រឆាំងមុនការបោះឆ្នោតឆ្នាំ២០១២.
ខែកញ្ញា 21, 2011 
Camnews 