ថ្ងៃព្រហស្បតិ៍, 15 ខែកញ្ញា 2011
ដោយ គង់ សុឋានរិទ្ធ
វីអូអេ ខ្មែរ | ភ្នំពេញ
លោក ស្រី ខារ៉ូល រ៉ដលី (Carol Rodley) ឯកអគ្គរដ្ឋទូត សហរដ្ឋ អាមេរិក (ឆ្វេង) និង លោក ស្តត់ ម៉ាស្យែល (Scot Marciel) ឧបការី រង រដ្ឋមន្ត្រី ក្រសួង ការ បរទេស សហរដ្ឋ អាមេរិក (ស្តាំ) នៅ ក្នុង ជំនួប មួយ ជាមួយ លោក ហោ ណាំហុង រដ្ឋមន្ត្រី ការ បរទេស កម្ពុជា នៅ ក្រុង ភ្នំពេញ។ (រូបថត៖ AP)
ឯកអគ្គរដ្ឋទូតសហរដ្ឋអាមេរិក លោកស្រី ខារ៉ូល រ៉ដលី (Carol Rodley) បានរំឭកនៅថ្ងៃ ព្រហស្បតិ៍នេះថា អំពើពុករលួយធ្វើឲ្យកម្ពុជាខកខានក្នុងការសម្រេចសក្តានុពលរបស់ខ្លួនឲ្យបានពេញលេញ និងធ្វើឲ្យក្រុមអ្នកវិនិយោគមានការភ័យខ្លាច។
ការកត់សម្គាល់របស់មន្ដ្រីការទូតសហរដ្ឋអាមេរិកធ្វើឡើងក្នុងសេចក្ដីថ្លែងការណ៍របស់លោកស្រីក្នុងពិធីបើកសន្និសីទថ្នាក់ជាតិមួយស្ដីពីការចូលរួមរបស់អង្គការសង្គមស៊ីវិលក្នុងសកម្មភាពប្រឆាំងនឹងអំពើពុករលួយក្នុងទីក្រុង ភ្នំពេញ។
លោកស្រី រ៉ដលី បានបញ្ជាក់ថាអំពើពុករលួយបានរារាំងការអភិវឌ្ឍនិងធ្វើឲ្យប្រទេសជាតិទន់ខ្សោយ។ លើសពីនោះទៀត វាក៏បំផ្លាញការទុកចិត្តរបស់ប្រជាពលរដ្ឋផងដែរ។
«អំពើពុករលួយរារាំងប្រទេសនានា ដូចជាប្រទេសកម្ពុជាជាដើមមិនឲ្យសម្រេចនូវសក្កានុពលពេញលេញរបស់ខ្លួន។ អំពើពុករលួយទាញយកផលចំណូលសាធារណៈទៅឲ្យជនមួយក្ដាប់តូច។ អំពើពុករលួយជាមូលហេតុដែលអ្នកវិនិយោគគិនអន្ដរជាតិរារែកក្នុងការធ្វើការវិនិយោគ។ អំពើពុករលួយបំផ្លាញសេចក្ដីទុកចិត្តរបស់ប្រជាពលរដ្ឋចំពោះរដ្ឋាភិបាលនិងនីតិរដ្ឋ»
កម្ពុជាបានទទួលរងការរិះគន់ជាច្រើនទាក់ទងនឹងអំពើពុករលួយ ខណៈដែលប្រទេសនេះ ត្រូវការពឹងពាក់ជំនួយបរទេសប្រមាណជា១.០០០ លានដុល្លាក្នុងមួយឆ្នាំ។ ភ្នាក់ងារសហរដ្ឋអាមេរិកសម្រាប់ការអភិវឌ្ឍអន្ដរជាតិ (USAID) ធ្លាប់បានបញ្ចេញរបាយការណ៍ដែលបង្ហាញថា កម្ពុជាបាត់បង់ចំណូលថវិការរដ្ឋចន្លោះពី៣០០ ទៅ៥០០ លានដុល្លាអាមេរិកក្នុងមួយឆ្នាំៗ។
លោក កែវ រ៉េមី អ្នកនាំពាក្យអង្គភាពប្រឆាំងអំពើពុករលួយរបស់រដ្ឋាភិបាលមានប្រសាសន៍ថា កម្ពុជាកំពុងធ្វើការផ្សព្វផ្សាយអំពីការប្រឆាំងនឹងអំពើពុករលួយ ហើយកម្ពុជាកំពុងធ្វើការជំរុញការទប់ស្កាត់បញ្ហានេះបន្ដទៀត។
«រាជរដ្ឋាភិបាលកម្ពុជាដឹងបញ្ហានេះហើយ។ ដូច្នេះហើយទើបយើងធ្វើកិច្ចការបានច្រើនក្នុងរយៈពេលខ្លី។ ហើយវាទាមទារការអប់រំ វិធានការទប់ស្កាត់តាមរយៈការប្រកាសទ្រព្យសម្បតិ្ត។ ហើយការប្រកាសទ្រព្យសម្បតិ្តយើងនៅបន្ដរាល់ថ្ងៃ»។
ច្បាប់ប្រឆាំងអំពើពុករលួយរបស់កម្ពុជា បានចូលជាធរមានកាលពីឆ្នាំ ២០១០។ ច្បាប់នេះបានស៊ីពេលជាងដប់ឆ្នាំសម្រាប់ការរៀបចំតាក់តែង និងជាច្បាប់ដែលបានទទួលរងសម្ពាធពីសហគមន៍ និងប្រទេសផ្ដល់ជំនួយចំពោះភាពយឺតយ៉ាវក្នុងការអនុម័តសម្រាប់យកមកប្រើប្រាស់។
មានជនសង្ស័យមួយចំនួនតូចប៉ុណ្ណោះត្រូវចាប់ខ្លួន និងចោទប្រកាន់ពីបទពាក់ព័ន្ធនឹងអំពើខុសច្បាប់ខាងលើនេះ។ ក្រុមអង្គការសង្គមស៊ីវិលដែលបានចូលរួមក្នុងសន្និសីទនៅថ្ងៃនេះមានតំណាងអង្គការតម្លាភាពអន្ដរជាតិមកពីប្រទេសបង់ក្លាដេស និងការិយាល័យអង្គការសហប្រជាជាតិប្រឆាំងគ្រឿងញៀន និងឧក្រិដ្ឋកម្មផងដែរ។ អ្នកតំណាងនីមួយៗបានបង្ហាញបទពិសោធន៍ និងតួនាទីក្នុងការប្រឆាំងអំពើពុករលួយ។
លោក ហង្ស ឆាយា នាយកប្រតិបត្តិនៃវិទ្យស្ថានខ្មែរដើម្បីលទ្ធិប្រជាធិបតេយ្យ និងជាអនុប្រធានក្រុមប្រឹក្សាភិបាលនៃអង្គការតម្លាភាពកម្ពុជា បញ្ជាក់ក្រោយពីសន្និសីទនៅថ្ងៃនេះថា ក្រុមសង្គមស៊ីវិល ចង់ឃើញការកាត់បន្ថយអំពើពុករលួយដើម្បីចៀសវាងការរារាំងដល់កិច្ចអភិវឌ្ឍនៅកម្ពុជា។
«ចង់ឃើញការអភិវឌ្ឍប្រកបដោយតម្លាភាព កាត់បន្ថយអំពើពុករលួយ គួបផ្សំនឹងអ្វីដែលរដ្ឋាភិបាលដាក់ចុះនូវគោលនយោបាយប្រឆាំងអំពើពុករលួយ ដូច្នេះយើងចង់ឃើញមានសន្ទុះរីកចំរើនផ្នែកនេះ»។
លោកស្រី ផេនី រីឆាតស៍ (Penny Rechards) ឯកអគ្គរដ្ឋទូតប្រទេសអូស្ដ្រាលីរំពឹងថា ក្រុមអង្គការសង្គមស៊ីវិលនឹងអាចបង្កើតសម្ព័ន្ធដ៏រឹងមាំមួយប្រឆាំងនឹងអំពើពុលរលួយនៅកម្ពុជា។ លោកកែវ រ៉េមី អ្នកនាំពាក្យអង្គភាពប្រឆាំងអំពើពុករលួយមានប្រសាសន៍ថា រដ្ឋាភិបាលបើកចំហឲ្យមានកិច្ចសហការពីគ្រប់មជ្ឈដ្ឋានសម្រាប់ការប្រយុទ្ធនឹងអំពើពុករលួយនេះ៕
បណ្តាញទាក់ទងគ្នា
ការជំរុញប្រឆាំងអំពើពុករលួយរបស់កម្ពុជាធ្វើឲ្យក្រុមហ៊ុនបស្ចិមប្រទេសឈឺក្បាល.
រដ្ឋសភាកម្ពុជាកែសម្រួលច្បាប់ប្រឆាំងអំពើពុករលួយឲ្យប្រសើរឡើង .
រដ្ឋសភាកម្ពុជាកែសម្រួលច្បាប់ប្រឆាំងអំពើពុករលួយឲ្យប្រសើរឡើង .
ខែកញ្ញា 16, 2011 
Camnews 