ដោយ : CEN
ថ្ងៃទី 27 កញ្ញា 2011
ក្រុម យុវជនជិះក្របី ចូលរួម ក្នុង ព្រឹត្តិការណ៍ ប្រណាំង ឬ បំបោល ក្របី នៅ វត្ត ព្រះវិហារ សួគ៌ ក្នុង ស្រុក ខ្សាច់កណ្តាល ខេត្ត កណ្តាល នៅ ថ្ងៃ បុណ្យ ភ្ជុំ បិណ្ឌ កាលពី ព្រឹក ថ្ងៃទី ២៧ កញ្ញា ឆ្នាំ ២០១១៕
វត្តព្រះវិហារសួគ៌, ខេត្តកណ្តាល: អ្នករៀបចំការប្រណាំង ឬការបំបោលក្របី និងសេះ នៅវត្តព្រះវិហារសួគ៌ ក្នុងឃុំវិហារសួគ៌ ស្រុកខ្សាច់កណ្តាល ខេត្តកណ្តាល បានឲ្យដឹងថា ដើម្បីសាទរនៅថ្ងៃបុណ្យភ្ជុំបិណ្ឌ ព្រឹកថ្ងៃទី២៧កញ្ញា ឆ្នាំ២០១១នេះ មានក្របីចំនួន ១៦ គូ និងសេះចំនួន ១៧ គូ បានចូលរួមក្នុងព្រឹត្តិការណ៍ប្រចាំឆ្នាំ ដែលជាទំនៀមទម្លាប់របស់អ្នកស្រុកវិហារសួគ៌។
លោក ឆាយ សុភា គណៈកម្មការរៀបចំការប្រណាំង ឬការបំបោលក្របី និងសេះ នៅវត្តព្រះវិហារសួគ៌ បានឲ្យដឹងថា ចំនួនក្របី និងសេះ ដែលបានចូលរួមក្នុងពិធីប្រណាំង ឬបំបោល នៅព្រឹកព្រលឹមថ្ងៃបុណ្យភ្ជុំបិណ្ឌ នាថ្ងៃអង្គារ ទី២៧កញ្ញានេះ មានចំនួនច្រើន លើសឆ្នាំទៅ ប្រហែលជា ៥ គូ។ ឆ្នាំទៅ នៅរដូវភ្ជុំបិណ្ឌ គោក្របីកើតជំងឺអ៊ុតក្តាម ដែលអ្នកស្រុកមិនសូវបានយកមកលេងឡើយ។ តែនៅឆ្នាំនេះ មិនមានជំងឺដង្កាត់ មកបៀតបៀនលើសត្វពាហនៈ គោក្របីសេះ ដូច្នេះអ្នកភូមិមកក្របី និងសេះ មកចូលរួមពិធីច្រើនជាងឆ្នាំមុន។
អ្នករៀបចំការប្រកួត បំបោលក្របីសេះ បានបន្ថែមថា ពិធីជារៀងរាល់ឆ្នាំ នៅព្រឹកថ្ងៃបុណ្យភ្ជុំបិណ្ឌនេះ ជាទំនៀមទម្លាប់ពីបុរាណ តៗគ្នាមក ដោយអ្នកសុំសេចក្តីសុខពីលោកតាម្ចាស់ស្រុក និងបារមីរបស់ព្រះអង្គវត្តវិហារសួគ៌ ដើម្បីសុំឲ្យសេះក្របីគោ និងសត្វពាហនៈផ្សេងៗទៀត បានសុខ កុំឲ្យមានជំងឺអ្វីកើតឡើង។
ក្របី គឺជាសត្វ ដែលអ្នកស្រុកវិហារសួគ៌ ប្រើប្រាស់ ដើម្បីភ្ជួររាស់ ធ្វើស្រូវ។ រីឯសេះ ក៏ត្រូវបានប្រើប្រាស់ ដើម្បីដឹកទំនិញ សម្រាប់រកចំណូលចិញ្ចឹមជីវិតផងដែរ។
យ៉ាងណាក៏ដោយ មិនខុសពីប្រជាកសិករខ្មែរនៅតំបន់ផ្សេងទៀតទេ អ្នកស្រុកវិហារសួគ៌ ក្នុងខេត្តកណ្តាល នៅឆ្នាំនេះ ស្រូវ ត្រូវលិចលង់ រលួយខូចទាំងស្រុង ដោយសារតែទឹកជំនន់ពីរលើកផ្ទួនៗគ្នា។ មកដល់ថ្ងៃទី២៧កញ្ញា ឆ្នាំ២០១១ នៅវិហារសួគ៌ ដែលជន់លិច ដោយសារតែទឹកជំនន់ទន្លេមេគង្គ ទឹកនៅតែឡើងបន្តិចទៀត។
ប៉ុន្តែយ៉ាងណាក៏ដោយ ក្រុមយុវជនពេញកម្លាំងជាច្រើននាក់ ដែលជាអ្នកស្រុកវិហារសួគ៌ នៅតែនាំយកក្របី និងសេះ ចូលរួមពិធីប្រណាំង ឬបំបោល នៅវត្តព្រះវិហារសួគ៌ ដើម្បីបួងសួង សុំឲ្យព្រលឹងលោកតាម្ចាស់ស្រុក និងបារមីព្រះអង្គវិហារសួគ៌ ជួយមើលថែឲ្យអ្នកភូមិ និងសត្វពាហនៈ សុខសប្បាយ តាមទម្លាប់ពីដូនតាតរៀងមក។
ការប្រណាំងក្របី និងសេះ ដែលមិនបានចាប់គូជាក់លាក់ និងធ្វើឡើងបន្តកន្ទុយគ្នា ហើយបំបោលចុះឡើងៗជាច្រើនបក លើកំណាត់ផ្លូវជាង ២០០ ម៉ែត្រនោះ គឺមិនបានកំណត់យកអ្នកឈ្នះចាញ់ ដើម្បីដណ្តើមពានរង្វាន់អ្វីទេ។ ប៉ុន្តែនៅឆ្នាំនេះ ក្រុមប្រឹក្សាឃុំវិហារសួគ៌ បានឧបត្តម្ភដល់អ្នកជិះក្របី និងជិះសេះ ចំនួន ២០.០០០ រៀល ក្នុងម្នាក់ៗ ដើម្បីជាការលើកទឹកចិត្ត។
ក្រៅពីការប្រណាំង ឬបំបោលក្របី និងសេះ នៅវត្តព្រះវិហារសួគ៌ នៅថ្ងៃភ្ជុំបិណ្ឌឆ្នាំនេះ ក៏ដូចជារៀងរាល់ឆ្នាំ គឺមានការប្រកួតបោកចំបាប់ និងគុនដំបង នៅក្នុងបរិវេណវត្តព្រះវិហារសួគ៌។
សូមបញ្ជាក់ថា ជារៀងរាល់ឆ្នាំ ក្រុមយុវជនវ័យក្មេងជាច្រើននាក់ នៅឃុំវិហារសួគ៌ បាននាំយកក្របី និងសេះ របស់ពួកគេ មកជួបជុំ នៅខាងលិចវត្តវិហារសួគ៌ ដោយរៀបចំតុបតែងក្របី និងសេះទាំងនោះ មុននឹងចាប់ផ្តើមពិធីប្រណាំង ឬការបំបោល នៅព្រឹកព្រលឹម ថ្ងៃបុណ្យភ្ជុំបិណ្ឌ។
ការប្រណាំង ឬការបំបោលក្របី និងសេះ ត្រូវធ្វើឡើងក្នុងចម្ងាយផ្លូវប្រមាណជាង ២០០ ម៉ែត្រ តាមផ្លូវដី ខាងលិចវត្តព្រះវិហារសួគ៌ និងឆ្លងកាត់ ខ្លោងទ្វារវត្ត ចូលឆ្ពោះទៅកាន់ព្រះវិហារ។ ទីលាននោះ មិនត្រូវបានរៀបចំអ្វីទេ តែជាផ្លូវលំក្នុងភូមិ និងមានអ្នកមើលឈរអមសង្ខាងផ្លូវ រហូតដល់ក្នុងបរិវេណវត្ត។
មុនចាប់ផ្តើមពិធី ក្រុមអ្នកប្រកួត ជាយុវជនក្នុងភូមិ បានជិះក្របី នាំចូលទៅក្នុងវត្តព្រះវិហារសួគ៌ ដើម្បីអុចធូប បួងសួង បន់ស្រន់ ដល់វិញ្ញាណក្ខន្ធ លោកតាម្ចាស់ស្រុក និងបារមីព្រះអង្គ នៅក្នុងវត្តវិហារសួគ៌ ឲ្យជួយថែរក្សាអ្នកភូមិ និងសត្វពាហនៈ ឲ្យបានសេចក្តីសុខ។
ក្រុមអ្នកចូលរួមជិះក្របី និងសេះ ត្រូវបានគេផ្តល់ឲ្យនូវខោជើងវែងពណ៌ខៀវ និងអាវដៃខ្លី ពណ៌ផ្ទៃមេឃ ព្រមទាំងអាវកាក់ពណ៌ឈាមជ្រូក ជាមួយនឹងកន្សែងឆ្នូតក្បាលពណ៌លឿង។
ក្រុមអ្នកជិះក្របី និងសេះ ជាយុវជនវ័យក្មេងក្នុងភូមិវិហារសួគ៌ ក៏ចូលចិត្តស្លៀកខោខ្លី និងក្រមា ជាមួយអាវយឺត ឬក៏លេងខ្លួនទទេ ជិះលើខ្នងក្របី ព្រមទាំងវាយបំបោល ដើម្បីបំផាយក្របី និងសេះ ក្នុងពិធីប្រចាំឆ្នាំនោះផងដែរ។
រីឯក្របី ត្រូវបានគេតុបតែង ដោយមានរបាំងមុខ រចនាពីក្រណាត់ចម្រុះពណ៌ មានឌិនគ្រាប់អង្កាំ នៅលើក្បាល និងស្រោបស្នែង ដោយស្បង់លោក ទុកតែចន្លោះនៅត្រឹមមាត់ ច្រមុះ និងភ្នែកទាំងពីរតែប៉ុណ្ណោះ។
ការប្រារព្ធពិធីបំបោលក្របីនេះ ធ្វើឡើងជាប្រពៃណីរៀងរាល់ឆ្នាំរបស់អ្នកភូមិវិហារសួគ៌ ដើម្បីបួងសួងសុំឲ្យអ្នកតាម្ចាស់ស្រុក និងបារមីព្រះអង្គវត្តវិហារសួគ៌ ថែរក្សាការពារអ្នកភូមិ និង សត្វពាហនៈពីជម្ងឺដង្កាត់នានា។ ពិធីបំបោលក្របីនេះ ក៏ដើម្បីឧទ្ទិសដល់ដួងវិញ្ញាណក្ខន្ធ លោកតាម្ចាស់ស្រុកដែលមានបារមី នៅក្នុងវត្តវិហារសួគ៌ដ៏សក្តិសិទ្ធិផងដែរ។
ជាទម្លាប់ អ្នកប្រកួតកម្រនឹងបោះបង់ព្រឹត្តិការណ៍ប្រចាំឆ្នាំ ក្នុងពិធីបុណ្យភ្ជំបិណ្ឌនេះណាស់ ដោយសារអ្នកភូមិវិហារសួគ៌ ត្រូវចូលរួមជិះក្របីបំបោល កាលពីឆ្នាំមុនហើយបើមិនបានចូលរួមក្នុងពិធីនៅឆ្នាំនេះវិញ អ្នកភូមិនោះ នឹងជួបគ្រោះភ័យផ្សេងៗ ទៅតាមជំនឿពីបុរាណតៗគ្នា។ ចំណែកអ្នកទើបនឹងទិញក្របីថ្មី មកប្រើប្រាស់ក្នុងរបរធ្វើស្រែស្រូវ ក៏ត្រូវយកក្របីនោះ មកជិះថ្វាយព្រះអង្គវិហារសួគ៌ និងលោកតាម្ចាស់ស្រុក នៅថ្ងៃបុណ្យភ្ជុំបិណ្ឌផងដែរ។
ក្នុងពិធីប្រចាំឆ្នាំនោះ ក៏មានអ្នកភូមិខ្លះ ដែលមានវ័យចំណាស់ ត្រូវជិះក្របី ដើម្បីថ្វាយដល់ដួងព្រលឹងអ្នកតាម្ចាស់ស្រុក និងបារមីព្រះអង្គវិហារសួគ៌ ដើម្បីបង្គ្រប់កិច្ច នៅថ្ងៃបុណ្យភ្ជុំបិណ្ឌផងដែរ៕
ក្រុមយុវជនជិះក្របី ចូលរួមក្នុងព្រឹត្តិការណ៍ប្រណាំង ឬបំបោលក្របី នៅវត្តព្រះវិហារសួគ៌ ក្នុងស្រុកខ្សាច់កណ្តាល ខេត្តកណ្តាល នៅថ្ងៃបុណ្យភ្ជុំបិណ្ឌ កាលពីព្រឹកថ្ងៃទី២៧កញ្ញា ឆ្នាំ២០១១៕
ក្រុមយុវជនជិះក្របី ចូលរួមក្នុងព្រឹត្តិការណ៍ប្រណាំង ឬបំបោលក្របី នៅវត្តព្រះវិហារសួគ៌ ក្នុងស្រុកខ្សាច់កណ្តាល ខេត្តកណ្តាល នៅថ្ងៃបុណ្យភ្ជុំបិណ្ឌ កាលពីព្រឹកថ្ងៃទី២៧កញ្ញា ឆ្នាំ២០១១៕
ក្រុមយុវជនជិះក្របី ចូលរួមក្នុងព្រឹត្តិការណ៍ប្រណាំង ឬបំបោលក្របី នៅវត្តព្រះវិហារសួគ៌ ក្នុងស្រុកខ្សាច់កណ្តាល ខេត្តកណ្តាល នៅថ្ងៃបុណ្យភ្ជុំបិណ្ឌ កាលពីព្រឹកថ្ងៃទី២៧កញ្ញា ឆ្នាំ២០១១៕
ក្រុមយុវជនជិះក្របី ចូលរួមក្នុងព្រឹត្តិការណ៍ប្រណាំង ឬបំបោលក្របី នៅវត្តព្រះវិហារសួគ៌ ក្នុងស្រុកខ្សាច់កណ្តាល ខេត្តកណ្តាល នៅថ្ងៃបុណ្យភ្ជុំបិណ្ឌ កាលពីព្រឹកថ្ងៃទី២៧កញ្ញា ឆ្នាំ២០១១៕
ក្រុមយុវជនជិះក្របី ចូលរួមក្នុងព្រឹត្តិការណ៍ប្រណាំង ឬបំបោលក្របី នៅវត្តព្រះវិហារសួគ៌ ក្នុងស្រុកខ្សាច់កណ្តាល ខេត្តកណ្តាល នៅថ្ងៃបុណ្យភ្ជុំបិណ្ឌ កាលពីព្រឹកថ្ងៃទី២៧កញ្ញា ឆ្នាំ២០១១៕
ក្រុមយុវជនជិះសេះ ចូលរួមក្នុងព្រឹត្តិការណ៍ប្រណាំង ឬបំបោល នៅវត្តព្រះវិហារសួគ៌ ក្នុងស្រុកខ្សាច់កណ្តាល ខេត្តកណ្តាល នៅថ្ងៃបុណ្យភ្ជុំបិណ្ឌ កាលពីព្រឹកថ្ងៃទី២៧កញ្ញា ឆ្នាំ២០១១៕
ខែកញ្ញា 28, 2011 
Camnews 