ខែកញ្ញា 19, 2011 
ដោយ : បាយ័ន
ថ្ងៃទី 19 កញ្ញា 2011
CEN
ក្រុង-ខេត្តសៀមរាប: មន្ទីរពេទ្យខេត្តសៀមរាប ក្រោមវត្តមានលោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានយកថ្នាំ ក្លររ៉ាមីនចំនួន ១៥.០០០ គ្រាប់ ចែកជូនប្រជាពលរដ្ឋ ២៣.៧៣០ នាក់ ក្នុងសង្កាត់គោកចក ក្រុងសៀមរាប កាលពីថ្ងៃទី១៦ ខែកញ្ញា ឆ្នាំ២០១១ ។ ការចែកថ្នាំនេះ គឺពុំបានគិតលុយកាក់ ពីប្រជាពលរដ្ឋនោះទេ ហើយថ្នាំក្លររ៉ាមីន សម្រាប់ដាក់ក្នុងទឹក ដើម្បីសម្លាប់មេរោគឆ្លង។
លោក ក្រុស សារ៉ាត់ អនុប្រធានមន្ទីរសុខាភិបាលខេត្តសៀមរាប បានឱ្យដឹងថា ដោយសារតែជំនន់ទឹកភ្លៀង លេចលង់ក្រុងសៀមរាប ហើយក្នុងសង្កាត់គោកចក មានទឹកដក់ត្រាំយូរជាងគេ មេរោគនឹងអាចបង្ករការឆ្លងដល់ប្រជាពលរដ្ឋ។ ដូច្នេះហើយទើបមន្ទីរស្នើសុំទៅក្រសួង ដើម្បីយកថ្នាំចែកជូនពួកគាត់។
លោក ក្រុស សារ៉ាត់ បន្តថា ថ្នាំក្លររ៉ាមីន ១៥.០០០ គ្រាប់ គឺចែកជូនប្រជាពលរដ្ឋ ២៣.៧៣០ នាក់ សម្រាប់តែសង្កាត់ គោកចក តែប៉ុណ្ណោះ។ ក្នុងមួយនាក់ៗ ទទួលបាន ១០០ គ្រាប់ ហើយក្នុងមួយគ្រាប់ គឺអាចដាក់ក្នុងទឹកចំនួន ២០លីត្រ។ ថ្នាំទាំងនេះ គឺជួយការពារជំងឺឆ្លងផ្សេងៗ ដល់ពួកគាត់។
ដោយឡែក លោក ម៉ម ប៊ុនហេង រដ្ឋមន្ត្រីក្រសួងសុខាភិបាល មានប្រសាសន៍ថា ក្នុងនាមសុខាភិបាល ចាំបាច់ត្រូវយកចិត្តទុកដាក់ចំពោះប្រជាពលរដ្ឋ។ ម្យ៉ាងវិញទៀត ក្នុងសង្កាត់គោកចក ក្រុងសៀមរាប ទឹកជំនន់បានដក់ត្រាំយូរជាងគេ ហើយមេរោគឆ្លងនឹងអាចរាតត្បាតដល់ប្រជាពលរដ្ឋ។ ដូច្នេះហើយទើបក្រសួងយកថ្នាំទាំងនេះ ចែកជូនដល់ពួកគាត់ សម្រាប់ដាក់ ក្នុងទឹកសម្លាប់មេរោគ មុនពេលយកទឹកនោះ ទៅប្រើប្រាស់៕
Camnews 