ដោយ : ច័ន្ទ ពន្លឹក
ថ្ងៃទី 5 កញ្ញា 2011
CEN
ប្រាសាទព្រះវិហារ: នៅព្រឹកថ្ងៃទី៥ ខែកញ្ញា ឆ្នាំ២០១១ កងទ័ពកម្ពុជា នៅកងវរសេនាតូចលេខ៤០៨ របស់តំបន់ប្រតិបត្តិការសឹករងខេត្តសៀមរាប ត្រូវបានកែសំរួល ដកចេញពីខ្សែព្រំដែនកម្ពុជា-ថៃ ចំណុចចំបក់កោង និងព្រលានដូនពោធិ ខាងលិចប្រាសាទព្រះវិហារ ចម្ងាយប្រមាណ ៣២ គ.ម។
ពិធីនោះ បានប្រារព្ធឡើងក្រោមអធិបតីភាពលោកនាយឧត្តមសេនីយ៍ គន់ គីម អគ្គមេបញ្ជាការរងនាយសេនាធិការចម្រុះ គណៈបញ្ជាការឯកភាពសមរភូមិមុខព្រំដែនកម្ពុជា-ថៃ លោកនាយឧត្តមសេនីយ៍ ជា តារា អគ្គមេបញ្ជាការរង និងជាប្រធានគណៈបញ្ជាការសមរភូមិមុខទិសយោធភូមិភាគទី៤ និងមានការចូលរួមជូនដំណើរពីលោកឧកញ៉ា សៀង ណាំ សមាជិកសភាមណ្ឌលសៀមរាប ព្រមទាំងអាជីវករខេត្តសៀមរាប ជាច្រើនរូបផងដែរ។
ក្នុងសេចក្ដីរាយការណ៍របស់ឧត្ដមសេនីយ៍ត្រី ឃឹម ប៊ុនសុង មេបញ្ជាការតំបន់ប្រតិបត្តិការសឹករងសៀមរាបបានឱ្យដឹងថា ក្នុងរយៈពេលដែលកងទ័ពរបស់ខ្លួន បានមកប្រចាំការនៅទីនេះ បានបំពេញតួនាទីយ៉ាងហ្មត់ចត់ត្រឹមត្រូវ តាមការកំណត់គណៈបញ្ជាការឯកភាពសមរភូមិក្នុងភារកិច្ចជាកម្លាំងត្រៀមប្រយុទ្ធ ក៏ដូចជា ការពង្រឹងប្រព័ន្ធការពារទីតាំងឈរជើងបានយ៉ាងរឹងមាំ ជួយដល់កម្លាំងតំបន់ប្រតិបត្តិការសឹករងឧត្តរមានជ័យ ការពារតំបន់ចំបក់កោងនិងព្រលានដូនពោធិ ជាស្លាបយ៉ាងរឹងមាំការពារតំបន់ប្រាសាទព្រះវិហារ។
លោកមេបញ្ជាការបានប្តេជ្ញាចិត្តដាច់ខាត គោរពនូវបទបញ្ជារបស់គណៈបញ្ជាការសមរភូមិមុខ ដោយសន្យាថា នឹងអនុវត្តបទបញ្ជាទាន់ពេលវេលាក្នុងគ្រប់កាលៈទេសៈ ដែលប្រទេសជាតិត្រូវការ ។
មានប្រសាសន៍សំណេះសំណាលទៅកាន់នាយទាហានពលទាហាននាឱកាសនោះ លោកនាយឧត្ដមសេនីយ៍ គន់ គីម បាននាំការសួរសុខទុក្ខប្រកបដោយសេចក្ដីនឹករលឹកពីសម្តេចនាយករដ្ឋមន្ត្រី ហ៊ុន សែន ផ្ញើជូនចំពោះនាយទាហាន ពលទាហានទាំងអស់របស់វរសេនាតូច៤០៨ នៃតំបន់ប្រតិបត្តិការសឹករងសៀមរាប ដែលបានអនុវត្ដក្នុងពេលបំពេញភារកិច្ចបានយ៉ាងល្អ ព្រមទាំងការគោរពបទបញ្ជារបស់ប្រមុខរដ្ឋាភិបាល បានយ៉ាងម៉ឺងម៉ាត់ដែលប្រការនេះបានបន្សល់ទុកនូវគំរូដ៏ល្អ។
លោកនាយឧត្ដមសេនីយ៍ បានផ្ដាំផ្ញើដល់កងកម្លាំងទាំងអស់ ពេលវិលត្រឡប់ទៅអង្គភាពដើមវិញ ត្រូវយកចិត្ដទុកដាក់ដល់ការហ្វឹកហ្វឺនរៀនសូត្រ ដើម្បីបង្កើនចំណេះដឹងឱ្យមានសមត្ថភាពពេញលេញព្រមទាំងការងារជួយបង្កបង្កើតផលដល់ក្រុមគ្រួសាររបស់ខ្លួន សំដៅបង្កើនជីវភាពប្រចាំថ្ងៃឱ្យកាន់តែប្រសើរឡើង ពិសេសមេបញ្ជាការត្រូវរៀបចំឲ្យកងទ័ពទាំងនេះ បានចូលពិនិត្យសុខភាពគ្រប់ៗគ្នា សំខាន់ជំងឺគ្រុនចាញ់ ដើម្បីពិនិត្យព្យាបាលឲ្យបានទាន់ពេលវេលា ។
ចំណែកលោកនាយឧត្តមសេនីយ៍ ជា តារា ក៏បានលើកឡើងថា នេះជាការកែសំរួលកងទ័ពកម្ពុជា លើកទី៧ហើយ ទៅកាន់ទីតាំងអង្គភាពដើមវិញ គឺមួយកងវរសេនាធំរបស់យោធភូមិភាគទី១ ពីមុំបី ថ្ងៃទី២៦ ខែកក្កដា ឆ្នាំ២០១១, មួយកងវរសេនាតូចរបស់សឹករងកំពង់ធំពីជាំតែថ្ងៃទី៨សីហា, មួយកងពលតូចលេខ២១ របស់យោធភូមិភាគ២ កាលពីថ្ងៃទី១៥សីហា, មួយកងពលតូចអន្តរាគមន៍លេខ៩ កាលពីថ្ងៃទី២១ ខែសីហា ឆ្នាំ២០១១, កែសំរួលដកកងពលតូច៤១ ទិសប្រាសាទតាក្របីកាលពីថ្ងៃទី១៨ ខែសីហា និងមួយកងពលតូច អន្តរាគមន៍លេខ៥ ពីទិសប្រាសាទតាមាន់ថ្ងៃទី៣១ ខែសីហា ឆ្នាំ២០១១ ទៅកាន់អង្គភាពដើមវិញ។
ការកែសម្រួល ដកកងទ័ពទាំងនោះ ជាការខិតខំរបស់សម្តេចតេជោ ហ៊ុន សែន ក្នុងការធ្វើឲ្យព្រំដែនមានសន្តិភាព មានកិច្ចសហប្រតិបត្តិការល្អរវាងប្រទេសទាំងពីរ ដើម្បីផលប្រយោជន៍ប្រជាជន រស់នៅតាមតំបន់ព្រំដែននៃប្រទេសទាំងពីរកម្ពុជា-ថៃ បានរស់នៅក្នុងសន្តិភាព និងសុខដុមរម្យនា។ នេះបើតាមការបញ្ជាក់លោកឧត្តមសេនីយ៍។
ក្នុងឱកាសនោះដែរកងឯកភាពវរសេនាតូច៤០៨ ទទួលបាននូវកិត្តិយសដោយព្រះមហាក្សត្រ និង រាជរដ្ឋាភិបាលផ្តល់មេដាយការពារជាតិ នៃព្រះរាជាណាចក្រកម្ពុជា បំពាក់ជូនជាការលើកទឹកចិត្ត ក្នុងភារកិច្ចការពារជាតិអនុវត្តសិទ្ធស្វ័យការពារទឹកដីបានរឹងមាំក្នុងរយៈពេលកន្លងមក។
ក្នុងការជូនដំណើរកងទ័ពវិលត្រឡប់ទៅកាន់អង្គភាពដើមវិញ ក្នុងឱកាសនោះ លោកអ្នកឧកញ៉ាសៀង ណាំ សមាជិកសភាមណ្ឌលសៀមរាប និងដោយមានការចូលរួមពីក្រុមអាជីវករខេត្តសៀមរាបមួយចំនួនផង បានផ្តល់ជូននូវថវិកាដោយផ្ទាល់ជូនដល់ដៃកងទ័ពក្នុងមួយនាក់ៗ ៥ ម៉ឺនរៀល ទឹកបរិសុទ្ធ មីយើង និងក្រមា ចែកជូនដល់កងទ័ពក្នុងពេលធ្វើដំណើរ ដែលបានធ្វើឲ្យបងប្អូនកងទ័ព មានក្តីរំភើបសប្បាយរីករាយគ្រប់ៗគ្នា៕
———–
No comments yet... Be the first to leave a reply!