ខែកញ្ញា 13, 2011 
ដោយ តាំង សារ៉ាដា
2011-09-13
វិទ្យុអាស៊ីសេរី
ភាពមន្ទិលសង្ស័យរបស់មហាជនទៅនឹងការដឹកនាំរបស់លោក ហ៊ុន សែន ស្របពេលដែលគណបក្សកាន់អំណាចតែងសម្រេចជ្រើសរើសយករូបលោកជាបេក្ខភាពនាយករដ្ឋមន្ត្រី។
២២-កក្កដា-២០១១៖ លោក នាយករដ្ឋមន្ត្រី ហ៊ុន សែន ថ្លែង ក្នុង សន្និសីទ កាសែត នា វិមាន សន្តិភាព រាជធានី ភ្នំពេញ (RFA/Sok Serey)
ក្រុមអ្នកឃ្លាំមើលខ្លះនិយាយថា ការសម្រេចយកលោក ហ៊ុន សែន ជាបេក្ខភាពនាយករដ្ឋមន្ត្រីក្នុងជួរគណបក្សប្រជាជនកម្ពុជានេះ គឺដោយសារក្រុមមន្ត្រីក្នុងជួរបក្សទាំងនោះមិនហ៊ានតតាំង ឬប្រឈមជាមួយលោក ហ៊ុន សែន។ ប៉ុន្តែក្រុមមន្ត្រីគណបក្សកាន់អំណាចនិយាយថា លោក ហ៊ុន សែន ស័ក្ដិសមឈរជាបេក្ខភាពនាយករដ្ឋមន្ត្រី ដោយសារលោកមានបទពិសោធន៍ខ្ពស់ក្នុងការដឹកនាំប្រទេស។
រយៈពេលបួនអាណត្តិមកហើយ ក្រោយពីការបោះឆ្នោតឆ្នាំ១៩៩៣ ក្រុមអ្នកឃ្លាំមើលមួយចំនួននៅតែមានចម្ងល់ថា ហេតុអ្វីបានជាគណបក្សប្រជាជនមានតែលោក ហ៊ុន សែន តែម្នាក់ប៉ុណ្ណោះ តែងជាប់ជាបេក្ខភាពនាយករដ្ឋមន្ត្រី?
អ្នកវិភាគខ្លះបកស្រាយថា ដោយសារលោក ហ៊ុន សែន មានអំណាចលើសពីស្ដេចផែនដី អមទៅដោយកងអង្គរក្សរាប់ពាន់នាក់ បំពាក់សព្វាវុធគ្រប់ធុន អង្រួនគ្រប់ស្ថាប័នកំពូលៗរបស់ជាតិ ទាំងពីរដ្ឋសភា ព្រឹទ្ធសភា ហៀររហូតដល់ប្រព័ន្ធតុលាការ រួមទាំងជួរបក្សរបស់ខ្លួន។
លោក ចិត្ត ជលសា ដែលជាអ្នកវិភាគខាងផ្នែកវិទ្យាសាស្ត្រនយោបាយ មានប្រសាសន៍ថា ការដែលគណបក្សប្រជាជនកម្ពុជា តែងជ្រើសរើសយកលោក ហ៊ុន សែន ជាបេក្ខភាពនាយករដ្ឋមន្ត្រី ដោយសារក្រុមមន្ត្រីនៅក្នុងជួរបក្សនេះទាំងអស់ មិនចង់បែកបាក់ មិនចង់បាត់បង់មុខតំណែង និងអំណាច ព្រមទាំងផលប្រយោជន៍ផ្ទាល់ខ្លួន។
លោកជឿថា មានបញ្ញវន្តជាច្រើនរូបដែលមានគុណសម្បត្តិពោពេញទៅដោយភាពឆ្លាតវៃ និងមានសមត្ថភាពគ្រប់គ្រាន់ក្នុងជួរបក្សប្រជាជនកម្ពុជា ដែលអាចប្រជែងជាបេក្ខភាពនាយករដ្ឋមន្ត្រី ប៉ុន្តែពួកគេត្រូវបានរងនូវការបំភិតបំភ័យ។
អ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា ដើម្បីពង្រឹងរដ្ឋបាលមួយឲ្យក្លាយទៅជារដ្ឋបាលទំនើបបាន លុះត្រាតែមានអ្នកដឹកនាំម្នាក់មានសេចក្ដីក្លាហាន មានបទពិសោធន៍គ្រប់គ្រាន់ ទាំងកិច្ចការកងទ័ព សេដ្ឋកិច្ច ពាណិជ្ជកម្ម និងសង្គមកិច្ចជាដើម។
លោក ផៃ ស៊ីផាន បន្តថា លោក ហ៊ុន សែន គឺជាមេដឹកនាំដ៏ចាំបាច់សម្រាប់គណបក្សប្រជាជនកម្ពុជា។
ដើមកំណើតនៃគណបក្សប្រជាជនកម្ពុជា កើតចេញពីបក្សប្រជាជនបដិវត្តន៍ កម្ពុជាក្នុងទសវត្សឆ្នាំ១៩៥០ ជាដៃគូជាមួយបក្សពលករវៀតណាម និងបក្សប្រទេសឡាវ ក្នុងកំឡុងអាណានិគមបារាំង។
បក្សប្រជាជនបដិវត្តន៍កម្ពុជា បានដូរឈ្មោះទៅជាគណបក្សប្រជាជនកម្ពុជា នៅមុនការបោះឆ្នោតសកល ឆ្នាំ១៩៩៣។ គណបក្សប្រជាជនកម្ពុជា មានសមាជិកគណៈអចិន្ត្រៃយ៍ចំនួន ៣៦រូប ហើយសមាជិកនៃគណៈកម្មាធិការកណ្ដាលមានចំនួន ៥០រូប ដែលមានលោក ជា ស៊ីម ប្រធាន លោក ហ៊ុន សែន ជាអនុប្រធាន និងលោក ហេង សំរិន ជាប្រធានកិត្តិយស។
គណបក្សប្រជាជនកម្ពុជា សព្វថ្ងៃកំពុងគ្រប់គ្រងសំឡេងភាគច្រើនក្នុងរដ្ឋសភានៃអាណត្តិទី៤។ គណបក្សនេះមាន ៩០អាសនៈ ក្នុងចំណោមអាសនៈចំនួន ១២៣ ក្នុងរដ្ឋសភា ខណៈគណបក្ស សម រង្ស៊ី មាន ២៦អាសនៈ គណបក្សហ៊្វុនស៊ិនប៉ិច ដែលធ្លាប់ឈ្នះឆ្នោតឆ្នាំ១៩៩៣ មាន ២អាសនៈ គណបក្សសិទ្ធិមនុស្សមាន ៣អាសនៈ ហើយគណបក្ស នរោត្តម រណឫទ្ធិ មាន ២អាសនៈ។
កាលពីខែសីហា ឆ្នាំ២០០៩ លោកនាយករដ្ឋមន្ត្រី ហ៊ុន សែន ធ្លាប់ប្រកាសជាសាធារណៈថា លោកនឹងធ្វើជានាយករដ្ឋមន្ត្រីរហូតដល់២០២៣។
លោកបណ្ឌិត ឡៅ ម៉ុងហៃ ដែលជាអ្នកវិភាគឯករាជ្យអំពីស្ថានការណ៍នយោបាយនៅកម្ពុជា មានប្រសាសន៍ថា ប្រសិនបើគណបក្សកាន់អំណាចធ្វើការផ្លាស់ប្ដូរបេក្ខភាពនាយករដ្ឋមន្ត្រី វាអាចនាំឲ្យមានសង្គ្រាមផ្ទៃក្នុងបក្ស។
លោក ទេព ងន សមាជិកគណៈកម្មាធិការអចិន្ត្រៃយ៍នៃគណបក្សប្រជាជនកម្ពុជា មានប្រសាសន៍ថា គណបក្សរបស់លោកមិនមានបេក្ខភាពថ្មីណាក្រៅពីលោក ហ៊ុន សែន ឈរឈ្មោះជានាយករដ្ឋមន្ត្រីនោះឡើយ។
អនុប្រធានគណបក្ស សម រង្ស៊ី លោក គង់ គាំ ដែលជាអតីតសមាជិកគណៈកម្មាធិការកណ្ដាលនៃគណបក្សប្រជាជនកម្ពុជា មានប្រសាសន៍ថា ការដែលគណបក្សប្រជាជនកម្ពុជា សម្រេចយកលោក ហ៊ុន សែន ជាបេក្ខភាពនាយករដ្ឋមន្ត្រី ព្រោះលោកមានទំនាក់ទំនងល្អជាមួយរដ្ឋាភិបាលវៀតណាម អាចនិយាយភាសាវៀតណាមបានល្អ ព្រមទាំងមានការជឿទុកចិត្តពីវៀតណាម ថែមទៀត។
លោកនាយករដ្ឋមន្ត្រី ហ៊ុន សែន កើតក្នុងឆ្នាំ១៩៥២។ នៅឆ្នាំ១៩៧០ លោកបានចូលរួមជាមួយកងទ័ពខ្មែរក្រហម បន្ទាប់មកបានភៀសខ្លួនទៅប្រទេសវៀតណាម ក្នុងឆ្នាំ១៩៧៧ និងបង្កជាចលនាតស៊ូនៅទីនោះ ដើម្បីផ្ដួលរំលំរបបខ្មែរក្រហម។ នៅដើមឆ្នាំ១៩៧៩ ក្រោយបានឈ្លានពាន និងគ្រប់គ្រងប្រទេសកម្ពុជា កងទ័ពវៀតណាម បានលើកបន្តុបលោក ហ៊ុន សែន ជាមេដឹកនាំមួយរូប និងបានឡើងកាន់អំណាចដឹកនាំប្រទេសនៅឆ្នាំ១៩៨៥។
រហូតមកទល់ពេលនេះ លោក ហ៊ុន សែន បានកាន់អំណាចនៅកម្ពុជា អស់រយៈពេល ២៦ឆ្នាំ មកហើយ។ លោកគឺជាមេដឹកនាំដែលកាន់អំណាចយូរក្នុងចំណោមប្រទេសមួយចំនួនក្នុងតំបន់អាស៊ី បើប្រៀបធៀបទៅនឹងប្រទេសភូមា និងប្រទេសកូរ៉េខាងជើងនោះ។
ប្រធានគណបក្សសិទ្ធិមនុស្ស លោក កឹម សុខា មានប្រសាសន៍ថា គណបក្សផ្ដាច់ការ និងបក្សកុម្មុយនិស្តក្នុងពិភពលោកភាគច្រើនជ្រើសរើសមេដឹកនាំណាដែលខ្វះគុណធម៌ និងចិត្តដាច់។ បើគិតត្រឹមតែក្រោយការបោះឆ្នោតសកលឆ្នាំ១៩៩៣ ក្រៅតែពីលោក ហ៊ុន សែន ដែលជានាយករដ្ឋមន្ត្រីមុខដដែលៗអស់រយៈពេលជិត ២ទសវត្សមកនេះ គេឃើញរដ្ឋមន្ត្រី នៃក្រសួងសំខាន់ៗជាច្រើនរូបទៀត ដែលមានមុខដដែល មិនផ្លាស់ប្ដូរចេញសោះ ទោះជាការដឹកនាំរបស់ពួកគេមិនឃើញមានការរីកចម្រើនដ៏គួរឲ្យកត់សម្គាល់សម្រាប់ប្រជាជាតិក៏ដោយ។
អ្នកសង្កេតស្ថានការណ៍កម្ពុជា បន្តថា ដរាបណាមន្ត្រីធំៗទាំងនេះមានស្វាមីភក្ដិចំពោះលោកនាយករដ្ឋមន្ត្រី ហ៊ុន សែន និងផ្ដល់ផលប្រយោជន៍ជូនគណបក្សកាន់អំណាចនោះ វាជាការស្រេច គឺគេអាចរក្សាមុខតំណែងរបស់គេបានយូរ។
ក្រុមមេដឹកនាំនៃបណ្ដាប្រទេសដែលកាន់អំណាចយូរឆ្នាំក្នុងពិភពលោក ដូចជានៅប្រទេសអេហ្សីប (Egypt) ទុយណេស៊ី (Tunisia) យេមែន (Yemen) និងប្រទេសលីប៊ីយ៉ា (Libya) សុទ្ធតែត្រូវបានកម្លាំងមហាជនធ្វើការបះបោរទម្លាក់ ដោយសារតែពលរដ្ឋទាំងនោះមិនអាចទ្រាំរស់នៅតទៅទៀតក្នុងវប្បធម៌ផ្ដាច់ការ ប្រពៃណីនៃអំពើពុករលួយ បក្សពួក គ្រួសារនិយម និងភាពអយុត្តិធម៌ដ៏រ៉ាំ រៃនោះ៕
Camnews 
កុំភ័យអី ហ៊ុន សែន គាត់មិននៅធ្វើនាយករដ្ឋមន្រ្តីជាអមតៈនោះទេ ឥឡូវនេះ “ទំពាំង” ជាច្រើនកំពុងតែត្រូវបានបណ្ដុះឲ្យរីកលូតលាស់ស្នងពីឬស្សីចាស់ៗទាំងនេះ ហើយ “ទំពាំង” ទាំងនោះកំពុងលេចមុខជាបណ្ដើរៗ ហើយកំពុងព្យាយាមកសាងប្រជាប្រិយភាពទាំងក្នុងជួរយោធា និង ប្រជាជន ។ សូមបញ្ជាក់ថា បណ្ដា “អនាគត” មេដឹកនាំខ្មែរជំនាន់ក្រោយនេះ គឺជាក្រុមបញ្ញវ័ន្តដែលបញ្ចប់ការសិក្សាមកពីសហរដ្ឋអាមេរិក អង់គ្លេស បារាំង រុស្ស៊ី ជប៉ុន ចិន ហើយមានភាពប៉ិនប្រសប់ទាំងផ្នែកវិទ្យាសាស្រ្តសេដ្ឋកិច្ច វិទ្យាសាស្រ្តនយោបាយ ក៍ដូចជាយោធា ។ ខ្ញុំមិនបាច់បញ្ចេញឈ្មោះទេ ជឿថាអស់លោកវាគ្មិនទាំងអស់ ប្រាកដជាស្គាល់ហើយ ។ ស្ដាយណាស់ ខ្ញុំជាមនុស្សតូចទាបធម្មតា មិនបានមានឈ្មោះក្នុង “បញ្ជី” នឹងគេ 😦
បេក្ខភាពនាយករដ្ឋមន្រ្តី នៅតែមនុស្សដដែល «ឆ្កឹង» យូរអង្វែងមិនសូវ ជាល្អមើល ទេ។ យូរៗទៅ ដូចជាតាលាន់មាត់ និងរស់ជាតិសាំញុំា មិនប្រែប្រួលទៅណា ប្រៀបដូចពាក់ អាវមិនដែលឃើញដោះ។ បងៗ អុំៗ ដែលខំរៀន ឡើងទំពែកក្បាល ក៏អត់មានពេលណា សាកល្បងចំណេះដឹងអ្វីទាំងអស់។ គណបក្សប្រជាជនក៏ដោ យចុះ ឲ្យតែមានអ្នកជំនួសថ្មី ប្រហែលជាគ្រាន់បើបន្តិច។
ម្យ៉ាងវិញទៀត លោកចាស់ហើយ គួរណាកុំសូវប្រើមនុស្សចាស់ ទុកឲ្យលោកលំហែរ កាយសប្បាយចិត្ត លេងល្បែងកូនគោល ដែលអាចសាកសមបំផុត។
I know whom you said. That is General Hun Manet. He is our future leader. He is well educated and polite.
នាគរាជអើយ! វាសនាមើលមិនឃើញទេ ថ្ងៃនេះយើងតូចទាប តែថ្ងៃក្រោយយើង
អាចរីកចម្រើនបានដូចគេ ដូចឯងដែរ។ សំខាន់យើងខិតខំប្រឹងពង្រឹងសមត្ថភាព
របស់យើងឲ្យកាន់តែខ្លាំង ឱកាសគង់នឹងរត់រកមិនខាន។
បើគេយល់ថាលោក ហ៊ុន សែន នៅតែអាចទទួលបានប្រជាប្រិយភាពពីប្រជាជន
នោះគេប្រាកដជាគាំទ្របេក្ខភាពគាត់ជានាយករដ្ឋមន្រ្តីសម្រាប់អាណត្តិក្រោយៗ
មិនខាន។ មិនខុសពីបក្សប្រឆាំងដែលទើបធ្វើសមាជផ្តល់សិទ្ធិឲ្យលោកប្រធាន
បានបន្តធ្វើជាប្រធានបក្សប្រឆាំង៣ឆ្នាំទៅមុខទៀតអីចឹងដែរ។ នេះជាផ្ទៃក្នុងគ្រួសារ
បក្សនីមួយៗតែប៉ុន្នោះ! យើងទាំងអស់គ្នាចាំតែបំពេញកាតព្វកិច្ចក្នុងឆ្នាំ ២០១២ និង
ថ្ងៃ ២៨ ខែកក្កដា ឆ្នាំ២០១៣ ខាងមុខទៅ ជាការស្រេច។
ដល់ពេលនោះយើងនឹងឮកាន់តែច្រើនឡើងៗ ពាក្យស្លោកដែលគេស្រែកថា
“ប្តូរចេញទៅបងប្អូន!!! ត្រូវធ្វើការផ្លាស់ប្តូរ!!! ខ្ញុំសូមអង្វរ….!! ។ល។” ហើយនិង
ពាក្យ “…នាំមកនូវសន្តិភាព ….និងការអភិវឌ្ឍន៏ ។ល។”
គេចង់និយាយថា បើយើងអួតអាងថាប្រទេសយើងប្រកាន់លឹទ្ធិប្រជាធឹបតេយ្យ វាលុះត្រាតែមានការ ផ្ដូរអំណាច ការក្រាញនៅកាន់អំណាចតែម្នាក់ឯង គេហៅថារបបផ្ដាច់ការ ព្រោះយើងប្រើអំពើហឹង្សា បង្ក្រាប បំភ័យ សម្លាប់ មិនឲ្យមានអ្នកណាហ៊ានប្រជែងយកដំណែង ដូច្នេះសូមលោកផៃ ស៊ីផាន កុំអួតថា មានតែហ៊ុន សែនទេដែលសក្ដិសមនឹងដំណែងនេះ តាមពិតផ្ទុយទៅវិញ គឺមកពីពួកអ្នក ឯងរាល់គ្នា ខ្លាចហ៊ុន សែនសម្លាប់ទៅវិញទេ ទើបបានជាសុខចិត្តសម្ងំនៅស្ងៀម ឲ្យហ៊ុន សែន ធ្វើផ្គរធ្វើភ្លៀងតែម្នាក់ឯងអស់មួយជីវិតយ៉ាងដូច្នេះ ។តែចាំមើលឲ្យតែដល់ពេលហ៊ុន សែនអស់ អំណាច នោះផៃ ស៊ីផាននឹងជេរហ៊ុន សែនថាក្បត់ជាតិ ថាពុករលួយជាងយើងទៅទៀត។
វាមិនដែលអាណាអមតះទេនៅលើលោកនេះ។កុំទៅបារម្ភច្រើនពេក។
អ្នកណាេធ្វីធំ េធ្វីទៅ ខ្ញុំនៅែតជាអ្នកចំការដែដល Who Cares!!!