ខែកញ្ញា 4, 2011 
ដោយ ប៉ែន បូណា
ថ្ងៃ អាទិត្យ 04 កញ្ញា 2011
RFI
ស្តាប់សេចក្តីរាយការណ៍របស់ ប៉ែន បូណា ពីភ្នំពេញ (02:22)
ស្ថានភាពសុខភាពរបស់លោក វ៉ាន់ ណាតអតីតអ្នកទោសគុកទួលស្លែងក្នុងសម័យខ្មែរក្រហម កំពុងស្ថិតក្នុងក្តីអស់សង្ឃឹម។ ភរិយារបស់លោក វ៉ាន់ ណាត អះអាងថា ស្វាមីរបស់អ្នកស្រីកំពុងស្ថិតក្នុងដំណាក់កាលចុងក្រោយបន្ទាប់ពីសន្លប់រយៈពេល១០ថ្ងៃមិនទាន់ដឹងខ្លួន។ ស្ថានភាពនេះ បានធ្វើឲ្យគ្រួសារលោក វ៉ាន់ ណាត មិនអស់ចិត្ត ដ្បិតជនរងគ្រោះក្នុងគុកទួលស្លែងរូបនេះ មិនទាន់បានទទួលយុត្តិធម៌នៅឡើយ។ សាលាក្តីខ្មែរក្រហមគ្រោងប្រកាសសាលដីកាស្ថាពររបស់អង្គជំនុំជម្រះតុលាការកំពូលស្តីពីករណីឌុចនៅដំណាច់ឆ្នាំ២០១១នេះ។
ស្ថាន ភាព សុខភាព លោក វ៉ាន់ ណាត អតីត អ្នក ទោស គុគ ទួលស្លែង ក្នុង សម័យ ខ្មែរក្រហម កំពុង ស្ថិត ក្នុង ក្តី អស់សង្ឃឹម ។ (RFI/Chheang Bopha)
លោក វ៉ាន់ ណាត ទំនងជាមិនអាចរង់ចាំទទួលយុត្តិធម៌ពីសលាក្តីខ្មែរក្រហមបានទេ នេះបើយោងតាមអ្នកស្រី គិត អេង ភរិយាលោកវ៉ាន់ ណាត ដែលបានប្រាប់វិទ្យុបារាំងអន្តរជាតិនៅថ្ងៃអាទិត្យនេះ។ អ្នកស្រី មានប្រសាសន៍ដោយអស់សង្ឃឹមថា ស្វាមីរបស់គាត់កំពុងស្ថិតក្នុងដំណាក់កាលចុងក្រោយហើយ។
លោក វ៉ាន់ ណាត អតីតអ្នកទោសគុកទួលស្លែង អាយុ ៦៦ ឆ្នាំ បានធ្លាក់ខ្លួនឈឺជាទម្ងន់កាលពីយប់ថ្ងៃទី២៦សីហា ហើយត្រូវបានក្រុមគ្រួសារដឹកបញ្ជូនទៅសង្គ្រោះបន្ទាន់នៅមន្ទីរពេទ្យឯកជនមួយកន្លែងក្នុងទីក្រុងភ្នំពេញក្នុងអាការៈសន្លប់បាត់ស្មារតី។ ការទទួលរងទារុណកម្មធ្ងន់ធ្ងរកាលពីក្នុងសម័យខ្មែរក្រហម បានធ្វើឲ្យលោក វ៉ាន់ ណាត មានសុខភាពទ្រុឌទ្រោមយ៉ាងខ្លាំង គឺទ្រុឌទ្រោមជាងអតីតមេដឹកនាំខ្មែរក្រហមដែលមានវ័យចាស់ជាងគាត់។
ក្នុងរយៈពេលសម្រាកព្យាបាលជំងឺនេះ គ្រួសាររបស់លោកត្រូវចំណាយប្រាក់ជាមធ្យមពី៣០០ទៅ៤០០ដុល្លារក្នុងមួយថ្ងៃ។ បើយោងតាមអ្នកស្រី គិត អេង នៅពេលមានការវះកាត់ គាត់ត្រូវចំណាយដល់ទៅជិត ១០០០ដុល្លារក្នុងមួយថ្ងៃ។ អ្នកស្រី កំពុងអំពាវនាវរកសប្បុរសជនជួយឧបត្ថម្ភគ្រួសារគាត់។ អភិបាលរាជធានីភ្នំពេញ លោក កែប ជុតិមា បានឧបត្ថម្ភថវិកា ១០០០ដុល្លារដល់គ្រួសារលោក វ៉ាន់ ណាត។ យ៉ាងណាក៏ដោយ ប្រាក់នេះនៅមិនទាន់គ្រប់គ្រាន់ទេ។
លោក វ៉ាន់ ណាត គឺជាសាក្សីរស់យ៉ាងសំខាន់កាលពីក្នុងសវនាការកាត់ទោសឌុចកន្លងទៅ។លោកបានបង្ហាញខ្លួនចំពោះមុខអង្គសវនាការកាលពីថ្ងៃទី២៩ ខែមិថុនា ឆ្នាំ២០០៩ ដើម្បីឆ្លើយបំភ្លឺតុលាការក្នុងនាមជាសាក្សីទាក់ទងនឹងឧក្រិដ្ឋកម្ម និងការកាប់សម្លាប់នៅគុកទួលស្លែងក្រោមការគ្រប់គ្រងរបស់កាំង ហ្គេចអ៊ាវ ហៅឌុច។
ឌុច ត្រូវបានតុលាការផ្តន្ទាទោសឲ្យជាប់ពន្ធនាគារ ៣៥ឆ្នាំ ប៉ុន្តែក្រោយការទូទាត់ និងការបន្ធូរបន្ថយខ្លះ ទោសរបស់ឌុចនៅសល់តែ១៩ឆ្នាំទៀតប៉ុណ្ណោះ។ ទោសនេះ ត្រូវបានជនរងគ្រោះប្តឹងជំទាស់ទៅអង្គជំនុំជម្រះតុលាការកំពូល។ ប៉ុន្តែ រហូតមកទល់ពេលនេះ សាលដីកាស្ថាពរនៅតែមិនទាន់ចេញនៅឡើយ។ ក្រោយពីមានការរិះគន់ពីភាពយឺតយ៉ាវ សាលាក្តីខ្មែរក្រហមបានប្រកាសឲ្យដឹងកាលពីប៉ុន្មានថ្ងៃមុននេះថា សាលដីកាផ្តន្ទាទោសឌុចនឹងចេញនៅមុនដំណាច់ឆ្នាំ២០១១នេះ។ ប៉ុន្តែ លោក វ៉ាន់ ណាត ទំនងជាមិនអាចរង់ចាំយុត្តិធម៌បានឡើយ៕
Camnews 
No comments yet... Be the first to leave a reply!