សៅរ៍ 10 កញ្ញា 2011
ទស្សនាវដ្តីសារព័ត៌មានសេរី
ប្រធានអាជ្ញាធរប្រេងកាតកម្ពុជាបានថ្លែងកាលពីថ្ងៃម្សិលមិញថា រដ្ឋាភិបាលប្រទេសកម្ពុជា និងថៃ គ្រោងនឹងពិភាក្សាគ្នាឡើងវិញអំពីការធ្វើអាជីវកម្មប្រេង និងឧស្ម័នក្នុងដែនសមុទ្រត្រួតស៊ីគ្នា ក្រោយពីវាបានជាប់គាំងអស់រយៈពេល១០ឆ្នាំមកហើយនោះ។
លោក សុខ អាន រដ្ឋមន្រ្តីទីស្តីការគណៈរដ្ឋមន្រ្តី និងជាប្រធានអាជ្ញាធរប្រេងកាតកម្ពុជា បានថ្លែងក្រោយពីវិលត្រឡប់ពីកិច្ចប្រជុំ ICAPP នៅប្រទេសចិនថា កម្ពុជា និងថៃបានចុះ MOU ជាមួយគ្នាតាំងពីឆ្នាំ២០០១មក ហើយមកដល់ពេលនេះមិនទាន់បានអនុវត្តន៍ការអភិវឌ្ឍន៍រួមគ្នា នៃការធ្វើអាជីវកម្មប្រេង និងឧស្ម័ននៅតំបន់សមុទ្រត្រួតស៊ីគ្នាបាននៅឡើយ។ ដូច្នេះអាចនឹងមានការចរចាជាចំហររវាងគណៈកម្មាធិការនៃប្រទេសទាំងពីរ ដើម្បីធ្វើការអភិវឌ្ឍន៍រួមគ្នា។
ជាមួយគ្នានេះដែរលោក សុខ អាន ក៏បានឲ្យដឹងផងដែរថា ពេលនេះកម្ពុជាក៏កំពុងតែរៀបចំសេចក្តីព្រៀងច្បាប់ស្តីពីការគ្រប់គ្រងរ៉ែប្រេងកាត និងឧស្ម័នផងដែរ ប៉ុន្តែលោកមិនអាចបញ្ជាក់បានទេថា ច្បាប់នេះនឹងអាចត្រូវអនុម័តនៅពេលណា ខណៈមានការរំពឹងថា ប្រទេសកម្ពុជាអាចនឹងទទួលបានដំណក់ប្រេងដំបូងនៅចុងឆ្នាំ២០១២នោះ។
គួរបញ្ជាក់ថា ប្រទេសកម្ពុជា និងថៃ បានចុះអនុស្សារណៈយោគយល់គ្នា (MOU) ស្តីពីការអភិវឌ្ឍន៍តំបន់សមុទ្រត្រួតស៊ីគ្នាដែលសំបូរដោយរ៉ែប្រេងនេះ តាំងតែពីឆ្នាំ២០០១មកម្ល៉េះ។ ហើយ MOU នេះ ត្រូវបានប្រទេសទាំងពីរអនុវត្តន៍ស្ទើរតែទាំងស្រុងនៅក្នុងអាណត្តិរបស់លោក ថាក់ស៊ីន ជានាយករដ្ឋមន្រ្តីថៃ មុនពេលលោកត្រូវគេធ្វើរដ្ឋប្រហារទម្លាក់ពីអំណាច។ តាមការស្រាវជ្រាវរបស់ក្រុមហ៊ុនមួយឈ្មោះ CLC Asia បានធ្វើការប៉ាន់ប្រមាណថា រ៉ែប្រេងដែលស្ថិតនៅក្នុងតំបន់សមុទ្រត្រួតស៊ីគ្នារវាងកម្ពុជា និងថៃ អាចមានរហូតទៅដល់១១សែនកោដគូប៕
No comments yet... Be the first to leave a reply!