ដោយ : សូផុន
ថ្ងៃទី 9 កញ្ញា 2011
CEN
បន្ទាយមានជ័យ: ពលរដ្ឋរាប់សិបនាក់ ប្រដាប់ដោយកាំបិតពូថៅ និងចប មកពីភូមិពន្សាយខាងត្បូង ឃុំស្រុកស្វាយចេក បានព័ទ្ធមន្ត្រីសាលាខេត្តស្រុក ឃុំ និងមន្ត្រីជំនាញរដ្ឋបាលព្រៃឈើ ជំនាញសុរិយោដី នៃខេត្តបន្ទាយមានជ័យ និងស្រុកស្វាយចេក នៅចំណុចអូរកៀប ភូមិពន្សាយ ឃុំស្រុកស្វាយចេក កាលពីរសៀលថ្ងៃទី៨កញ្ញា ឆ្នាំ២០១១ ។
សកម្មភាពរបស់ប្រជាពលរដ្ឋទាំងនោះ ដើម្បីរារាំងដាច់ខាតមិនឲ្យមន្ត្រីជំនាញគ្រប់គ្រង និងត្រួតដីព្រៃឈើរបស់រដ្ឋាភិបាល ដែលសេសសល់នៅតំបន់ស្ថានីយព្រៃឈើតាបែន ក្នុងស្រុកស្វាយចេកនោះឡើយ។
តំណាងពលរដ្ឋខ្លះ បានគម្រាមកំហែង និងព្រមានមន្ត្រីអាជ្ញាធរ កុំឲ្យចុះទៅកាន់ទឹកដីរបស់ប្រជាសហគមន៍ ព្រោះបើអាជ្ញាធរចុះទៅពិនិត្យទីតាំងដីព្រៃឈើទាំងនោះ គឺ សព្វថ្ងៃ បានក្លាយជាដីចម្ការ ឬស្រែ របស់ប្រជាពលរដ្ឋអស់ហើយ។
ប្រជាពលរដ្ឋព្រមាន មិនទទួលខុសត្រូវរាល់សន្តិសុខ ឬសុវត្ថិភាពដល់មន្ត្រី ឬអ្នកណា ដែលចុះទៅដល់ដីព្រៃតាបែន ដើម្បីដកហូតដីធ្លីពីប្រជាពលរដ្ឋនោះឡើយ។
ក្រុមប្រជាពលរដ្ឋ ដែលបានតវ៉ាជំទាស់ទាំងនោះ បានរារាំងមន្ត្រី និងអាជ្ញាធរសមត្ថកិច្ច ៣លើកមកហើយ កុំឲ្យគ្រប់គ្រងដីព្រៃឈើ ដែលជាគម្រោងបង្កើតស្ថានីយ៍ផ្សព្វផ្សាយ និងស្តារព្រៃឈើតាបែន នៅតំបន់១ ដែលមានផ្ទៃដី ១.៨៥០ ហិកតា និងតំបន់មួយទៀត មានទំហំ ៥.២៤៦ ហិកតា ស្ថិតក្រោមការគ្រប់គ្រងរបស់រដ្ឋបាលព្រៃឈើ ដែលមានទីតាំងស្ថិតនៅឃុំតាបែន និងឃុំស្លក្រាម។
មន្ត្រីរដ្ឋបាលព្រៃឈើ និងអាជ្ញាធរដែនដីខេត្តស្រុក ឃុំ អះអាងថា ដីនោះជាដីគម្របព្រៃឈើ ក្នុងផែនទីឆ្នាំ២០០២ ឬជាដីព្រៃឈើទុកអចិន្ត្រៃយ៍របស់រដ្ឋ និងត្រូវបានដីកាតុលាការខេត្តបន្ទាយមានជ័យ ក្នុងនាមអនុគណៈកម្មាធិការខេត្ត ទប់ស្កាត់ បង្ក្រាបអំពើឈូសឆាយទន្ទ្រានរានហ៊ុមព័ទ្ធដីព្រៃឈើរដ្ឋ យកកម្មសិទ្ធិឯកជន ដោយខុសច្បាប់ បានសម្រេចដកហូត ក្នុងឆ្នាំ២០០៥ ។
ក៏ប៉ុន្តែប្រជាពលរដ្ឋបានស្នើថា បើដកហូតដីព្រៃឈើតំបន់នោះ ត្រូវធ្វើឲ្យស្មើភាព គឺដកទាំងដីទំហំធំ និងតូច ដែលជាដីរបស់អ្នកធំ និងអ្នកមានផង។
ទោះយ៉ាងណាមន្ត្រីចម្រុះ ដែលចុះទៅទីតាំងដីព្រៃឈើរដ្ឋលើកនេះ ក៏ដូចលើកមុន បានជួបប្រជុំជាមួយពលរដ្ឋម្តងទៀត នៅសាលាស្រុកស្វាយចេក ហើយអះអាងថា មន្ត្រីចុះសិក្សា និងរកផលប៉ះពាល់ពីអ្នកកាន់កាប់ពិតប្រាកដ និងបានធ្វើស្រែចម្ការជាក់ស្តែង ដែលជារបស់ប្រជាពលរដ្ឋផ្ទាល់ខ្លួន ដោយពុំមែមជាដីរបស់មន្ត្រី ឬឈ្មួញ ដើម្បីកាត់ឆ្វៀលចេញចូល តាមយុទ្ធសាស្ត្រ និងនយោបាយរបស់រដ្ឋាភិបាល។
យ៉ាងណាក៏ដោយ ការចុះវាស់វែងដីព្រៃរបស់រដ្ឋ នៅតំបន់ព្រៃឈើតាបែន ក្នុងស្រុកស្វាយចេក កាលពីថ្ងៃទី៨កញ្ញា ឆ្នាំ២០១១ មិនអាចធ្វើទៅបានទេ ដោយសារតែប្រជាពលរដ្ឋរារាំង៕
—————-
សុវណ្ណភូមិដីខ្មែរត្រូវតែគង់វង្ស
១-កម្ពុជាមានងារជាសុវណ្ណភូមិ សម្បូរទៅព្រមសម្បត្តិធម្មជាតិ
មានត្បូងក្នុងដី ព្រៃឈើព្រោងព្រាត រីមច្ឆាទៀតពេញបឹងទន្លេ ។
២- ជាតិរ៉ែប្រេងឆៅកប់ជ្រៅក្នុងដី មានសព្វអ្វីៗនៅលើដីខ្មែរ
អញ្ចឹងហើយទើបបរទេសនៅក្បែរ រុកគួនគ្មានល្ហែឱ្យខ្មែរឈឺចាប់ ។
៣- ភពសុវណ្ណភូមិគឺល្អអញ្ចឹង ទើបខ្មាំងសងខាងដណ្តើមកាន់កាប់
ទាំងពីរមិនល្អ យើងក៏ដឹងស្រាប់! មេរដ្ឋចំណាប់ទើបថែខ្ជាប់ខ្ជួន ។
៤- សុវណ្ណភូមិដីធំខ្មែរចាំមិនភ្លេច ឥឡូវរឹលរេចដោយសៀមនិងយួន
ដីខ្មែរបាត់បង់ពីព្រោះមេខ្លួន លង់លុះលោភលន់លាភយសអំណាច ។
៥- សុវណ្ណភូមិដីខ្មែរកាន់តែសាបសូន្យ ព្រោះតែពួកយួនចូលមកប្រសាច
សូមអស់ខេមរាតាំងចិត្តអង់អាច ការពារកុំខ្លាចដេញជនឈ្លានពាន ។
៦- បើយើងមិនក្រោកនៅពេលនេះទេ យើងលែងជាខ្មែរពូជធ្លាប់តែហ៊ាន
បាត់ទៅណាហើយវិចារណញ្ញាណ? ទឹកចិត្តក្លាហានពូជខ្មែរអង្គរ!
៧- សុវណ្ណភូមិដីកេរ ខ្មែរអើយកុំស្ងៀម! កុំឱ្យយួន-សៀមគំរាមបន្ត
យើងជាតិមួយដែរត្រូវតែក្រោកឈរ មាតុភូមិបវរត្រូវតែគង់វង្ស ។