ខែកញ្ញា 13, 2011 
ដោយ : CEN
ថ្ងៃទី 13 កញ្ញា 2011
ភ្នំពេញ: យ៉ាងហោចណាស់មានខេត្តបាត់ដំបង សៀមរាប ព្រះវិហារ ស្ទឹងត្រែង ក្រចេះ និងកំពង់ធំ បានលិចលង់ ដោយសារទឹកភ្លៀង នៅប៉ុន្មានថ្ងៃនេះ ស្របពេលដែលទឹកទន្លេមេគង្គ នៅពេញប្រៀបមាត់ច្រាំងនៅឡើយ។ ក្នុងនោះគិតមកដល់ថ្ងៃទី១៣កញ្ញា ឆ្នាំ២០១១ ទឹកភ្លៀងនៅតែជន់លិចទីខេត្តទាំង៥នោះ ព្រមទាំងលិចផ្ទះ និងផ្លូវ ដោយកន្លែងខ្លះ មិនអាចធ្វើដំណើរឆ្លងកាត់បានទេ។
នៅទីរួមខេត្តសៀមរាប និងបណ្តាខេត្ត៤ ផ្សេងទៀត បានជន់លិចដោយសារទឹកភ្លៀង ចាប់តាំងពីថ្ងៃទី១១កញ្ញា ឆ្នាំ២០១១។ មកដល់ថ្ងៃទី១៣កញ្ញា ឆ្នាំ២០១១ ទោះបីភ្លៀងបានរាំងវិញហើយក៏ដោយ តែមេឃ នៅតែមានពពកខ្មៅស្រទុំ ខណៈដែលក្រសួងធនធានទឹក បានជូនដំណឹងពីព្យុះភ្លៀងបន្តកើតឡើងនៅប៉ុន្មានថ្ងៃខាងមុខនេះ។
សេចក្តីជូនដំណឹងរបស់ក្រសួងធនធានទឹក និងឧតុនិយម នៅថ្ងៃទី១៣កញ្ញា ឆ្នាំ២០១១ បង្ហាញថា ប្រព័ន្ធសំពាធទាប ដែលបានកើតឡើងតាំងពីថ្ងៃទី៨ ខែកញ្ញា រហូតមកដល់បច្ចុប្បន្ននេះ កំពុងបង្កើនឥទ្ធិពលទៅលើអាងទន្លេមេគង្គលើនៅក្នុងប្រទេសឡាវ និងថៃ។ ជាមួយគ្នានេះ ប្រទេសកម្ពុជា នឹងមានភ្លៀងធ្លាក់ជាបន្តបន្ទាប់ ទាំងអាងទន្លេមេគង្គលើ និងទាំងក្នុងប្រទេសកម្ពុជា ពិសេសតំបន់ភ្នំ ខ្ពង់រាប ភាគខាងជើង និងតំបន់ខ្ពង់ រាបភាគឦសាន។
សេចក្តីជូនដំណឹង ក៏បានគូសបញ្ជាក់ថា មកដល់ថ្ងៃទី១៣កញ្ញា ឆ្នាំ២០១១ ទោះបីជាទឹកទន្លេមេគង្គក្នុងប្រទេសកម្ពុជា នៅខេត្តស្ទឹងត្រែង ក្រចេះ និងខេត្តកំពង់ចាម បានស្រកចុះបន្តិចក្ដី តែតាមការព្យាករណ៍បានបង្ហាញថា ទឹកទន្លេមេគង្គនឹងចាប់កើនឡើងវិញ ចាប់ពីថ្ងៃទី១៥ រហូតដល់ដំណាច់ខែកញ្ញា ឆ្នាំ២០១១។ ស្ថានភាពនេះ ក៏នឹងធ្វើឲ្យកំពស់ទឹកនៅទន្លេមេគង្គក្រោម ទន្លេបាសាក់ ទន្លេសាប បឹងទន្លេសាប កើនឡើង ហើយហូរចូលទៅតាមព្រែក និងធ្វើឲ្យលិចតំបន់ទំនាបនានា។
អាស្រ័យដូចបានជម្រាបជូន ខាងលើ សូមអាជ្ញាធរដែនដី និងប្រជាពលរដ្ឋដែលរស់នៅតាមដងទន្លេមេគង្គទាំងអស់ជ្រាបជាព័ត៌មាន ជាពិសេសបងប្អូនប្រជាកសិករ ដែលប្រកបរបរកសិកម្មនៅតំបន់ទំនាបតាមដងទន្លេមេគង្គ ទន្លេសាប ទន្លេបាសាក់ និងតំបន់លិចទឹកនានា គួរពន្យារការដាំដុះមួយរយៈ (ចាប់ពេលនេះ រហូតដល់ចុងខែកញ្ញា ឆ្នាំ២០១១) ដើម្បីចៀសវាងនូវការខូចខាតផ្សេងៗដោយទឹកជំនន់៕
Camnews 
No comments yet... Be the first to leave a reply!