ដោយ លាង ដឺលុច
ថ្ងៃ អង្គារ 13 កញ្ញា 2011
RFI
ស្តាប់សេចក្តីរាយការណ៍របស់ លាង ដឺលុច ពីទីក្រុងភ្នំពេញ (01:34)
ចាប់ពីថ្ងៃទី១៥កញ្ញារហូតដល់ចុងខែកញ្ញាតែម្តងទឹកទន្លេមេគង្គ នឹងឡើងខ្លាំង បង្កអោយមានទឹកជំនន់នៅតាមតំបន់វាលទំនាប។ ក្រសួងធនធានទឹកបានប្រកាសជូនដំណឹងដល់សាធារណជនអោយដឹងថា ជំនន់ទន្លេមេគង្គនឹងកើតមានឡើងដោយសារប្រព័ន្ធសម្ពាធទាប និងជ្រលងសម្ពាធទាបដែលកំពុងបង្កអោយមានភ្លៀងធ្លាក់នៅក្នុងតំបន់ អាងទន្លេមេគង្គលើ។
caption id=”attachment_58807″ align=”aligncenter” width=”600″ caption=”ទឹកជំនន់បង្កដោយភ្លៀងខ្លាំង នៅខេត្តសៀមរាប (©RFI)”][/caption]
ប្រជាកសិករដែលរស់នៅតាមដងទន្លេមេគង្គ ទន្លេសាប ទន្លេបាសាក់ និងតំបន់លិចទឹក គួរពន្យារការដាំដុះមួយរយៈ ពោលគឺចាប់ពីពេលនេះរហូតដល់ចុងខែកញ្ញាតែម្តង ដើម្បីចៀសវាងការខូចខាត ឬការខាតបង់ផ្សេងៗដោយទឹកជំនន់។ នេះជាការជូនដំណឹងរបស់ក្រសួងធនធានទឹក និងឧតុនិយមនៅថ្ងៃអង្គារទី១៣កញ្ញានេះ។
ក្រសួងធនធានទឹកបានធ្វើសេចក្តីជូនដំណឹងមួយផ្សព្វផ្សាយអំពីការហក់ឡើងនៃទឹកទន្លេមេគង្គចាប់ពីថ្ងៃទី១៥កញ្ញារហូតដល់ចុងខែកញ្ញា។ ក្រសួងធនធានទឹកប្រាប់អោយដឹងថា ទឹកក្នុងអាងទន្លេមេគង្គឡើងខ្ពស់ គឺបណ្តាលមកពីប្រព័ន្ធសម្ពាធទាបដែលកំពុងបង្កើនឥទ្ធិពលនៅលើអាងទន្លេមេគង្គលើ ក្នុងប្រទេសឡាវ និងប្រទេសថៃ។ ជាងនេះទៀតកម្ពុជាក៏កំពុងបន្តទទួលឥទ្ធិពលនៃជ្រលងសម្ពាធទាបផងដែរ។ក្រសួងធនធានទឹកបន្តថា កត្តាទាំងនេះនឹងធ្វើអោយមានភ្លៀងធ្លាក់ជាបន្តបន្ទាប់ក្នុងអាងទន្លេមេគង្គលើរបស់ប្រទេសថៃ និងប្រទេសឡាវ និងទាំងក្នុងប្រទេសកម្ពុជាពិសេសតំបន់ភ្នំ តំបន់ខ្ពង់រាបខាងជើង និងតំបន់ខ្ពង់រាបឦសាន។
សេចក្តីជូនដំណឹងរបស់ក្រសួងធនធានទឹកបានបញ្ជាក់ថាបើទោះជាទឹកទន្លេមេគង្គក្នុងប្រទេសកម្ពុជានៅខេត្តស្ទឹងត្រែង ខេត្តក្រចេះ និងខេត្តកំពង់ចាមបានស្រកចុះបន្តិចក្តី ប៉ុន្តែបើតាមការព្យាករណ៍ ទឹកទន្លេមេគង្គនឹងចាប់ផ្តើមកើនឡើងវិញ ចាប់ពីថ្ងៃទី១៥ រហូតដល់ដំណាច់ខែកញ្ញា។ ស្ថានភាពនេះក៏នឹងធ្វើអោយកំពស់ទឹកនៅទន្លេមេគង្គក្រោម ទន្លេបាសាក់ ទន្លេសាប បឹងទន្លេសាប កើនឡើង ហើយហូរចូលទៅតាមព្រែក និងធ្វើអោយលិចតំបន់ទំនាប៕
No comments yet... Be the first to leave a reply!