ខែកញ្ញា 4, 2011 
ដោយ : រតនា
ថ្ងៃទី 3 កញ្ញា 2011
CEN
សម្តេចក្រុមព្រះ នរោត្តម រណឬទ្ធិ និងអ្នកម្ខាង អ៊ុក ផល្លា ក្រោយពីចេញពីកិច្ចប្រជុំគណៈកម្មនាយកគណបក្សនរោត្តម រណឬទ្ធិ កាលពីថ្ងៃទី៣កញ្ញា ឆ្នាំ២០១១៕
ភ្នំពេញ: សម្តេចក្រុមព្រះ នរោត្តម រណឬទ្ធិ បានមានបន្ទូលបញ្ជាក់ជាថ្មីម្តងទៀត នៅថ្ងៃទី៣ ខែកញ្ញា ឆ្នាំ២០១១ថា ព្រះអង្គមិនយាងវិលត្រឡប់ទៅដឹកនាំហ្វ៊ុនស៊ិនប៉ិចឡើងវិញឡើយ។ ព្រះអង្គក៏បានប្រកាសថា នៅពេលនេះ គណបក្សរាជានិយមមានតែមួយទេ គឺគណបក្សនរោត្តមរណឬទ្ធិ ដែលព្រះអង្គ កំពុងដឹកនាំសព្វថ្ងៃ។
សម្តេចក្រុមព្រះ នរោត្តម រណឬទ្ធិ បានមានព្រះបន្ទូលថា “ខ្ញុំសុំជម្រាបជាឧឡារិកថា ខ្ញុំមិនវិលត្រឡប់ទៅដឹកនាំគណបក្សហ្វ៊ុនស៊ិនប៉ិចវិញទេ។ ខ្ញុំមានជំនឿថា អ្នករាជានិយមពិតប្រាកដ មុខតែយល់ច្បាស់អំពីគោលជំហររបស់ខ្ញុំ ក្នុងការមិនវិលត្រឡប់ ហើយមកតាមខ្ញុំ នៅក្នុងក្របខណ្ឌគណបក្សរាជានិយម គឺគណបក្សនរោត្តមរណឬទ្ធិ”។
សម្តេចក្រុមព្រះ នរោត្តមរណឬទ្ធិ បញ្ជាក់ជំហរជាថ្មីថា ព្រះអង្គមិនវិលទៅហ៊្វុនស៊ិនប៉ិចវិញទេ៕
សម្តេចក្រុមព្រះក៏បានបញ្ជាក់ថា ដោយសារតែមូលហេតុលោក ញឹក ប៊ុនឆៃ និងក្រុមរបស់គាត់ ធ្វើបក្សប្រហារ ទម្លាក់ព្រះអង្គពីប្រធានហ្វ៊ុនស៊ិនប៉ិច កាលពីថ្ងៃទី១៨តុលា ឆ្នាំ២០០៦ ហើយអ្វីដែលធ្វើឲ្យសម្តេចក្រុមព្រះ ឈឺចាប់ខ្លាំងជាងគេនោះ គឺយកចលនារំដោះជាតិរបស់សម្តេចឪយើង យកទៅកម្ទេចចោលអស់។ ជាងនេះទៀតសម្តេចក្រុមព្រះ បានអះអាងថា ព្រះអង្គពុំមានជំនឿថា លោកញឹកប៊ុនឆៃ និងគណបក្សហ្វ៊ុនស៊ិនប៉ិច ជាគណបក្សរាជានិយម និងសីហនុនិយមតទៅទៀតទេ។
ក៏ប៉ុន្តែចំពោះព្រះបន្ទូលខាងលើនេះ លោក ញឹក ប៊ុនឆៃ ប្រធានប្រតិបត្តិគណបក្សហ្វ៊ុនស៊ិនប៉ិច បានបញ្ជាក់ប្រាប់ CEN ថា ការវិល ឬមិនវិល មកដឹកនាំគណបក្សហ្វ៊ុនស៊ិនប៉ិច គឺជាសិទ្ធិរបស់ព្រះអង្គ។ លោកក៏បដិសេធផងដែរថា លោកពុំ ដែលបានពឹងពាក់ឧកញ៉ាណាមួយ ធ្វើជាមេអណ្តើក សម្រាប់ការរួបរួមជាមួយសម្តេចក្រុមព្រះវិញទេ។
លោក ញឹក ប៊ុនឆៃ ក៏បានបញ្ជាក់ថា មកដល់ពេលនេះ ទ្វាររបស់គណបក្សហ្វ៊ុនស៊ិនប៉ិច នៅតែបើកចំហរ ចាំទទួលសម្តេចក្រុមព្រះ បើសិនព្រះអង្គ ចង់វិលវិញពេលណាក៏បាន។ បើព្រះអង្គវិលវិញ នោះព្រះអង្គនឹងបានធ្វើជាប្រធានគណបក្សហ្វ៊ុនស៊ិនប៉ិច ដូចពីមុនអីចឹង បន្ទាប់ពីរួមគ្នាឡើងវិញ ដែលជាគោលការណ៍ដើម៕
Camnews 
No comments yet... Be the first to leave a reply!