ដោយ កែវ និមល
2011-09-13
វិទ្យុអាស៊ីសេរី
ក្រសួងធនធានទឹក និងឧតុនិយមបានប្រកាសថា ខេត្តដែលមានទីតាំងនៅជាប់មាត់ទន្លេមេគង្គ ក្នុងប្រទេសកម្ពុជា ត្រូវមានការប្រុងប្រយ័ត្ន ពីព្រោះប្រទេសកម្ពុជាកំពុងទទួលរងសម្ពាធទាប។
ក្រសួងធនធានទឹក និងឧតុនិយមបានជូនដំណឹងដល់កសិករដែលរស់នៅ និងប្រកបរបបកសិកម្មតាមតំបន់វាលទំនាប តាមដងទន្លេមេគង្គ និងទន្លេផ្សេងទៀត ក្នុងប្រទេសកម្ពុជា ឲ្យពន្យារការដាំដុះមួយរយៈ ចាប់ពីថ្ងៃទី១៥ កញ្ញា ទៅដល់ដាច់ខែ ដើម្បីចៀសវាងការខូចខាតដំណាំ ដោយសារទឹកជំនន់។
សេចក្ដីជូនដំណឹងរបស់ក្រសួងធនធានទឹក និងឧតុនិយម ចេញផ្សាយថ្ងៃទី១៣ កញ្ញា បានប្រកាសថា ប្រទេសកម្ពុជាកំពុងរងឥទ្ធិពលប្រព័ន្ធសម្ពាធទាប ដែលកើតឡើងកាលពីថ្ងៃទី៨ កញ្ញា កន្លងមក នៅលើអាងទន្លេមេគង្គក្នុងប្រទេសថៃ និងឡាវ និងមួយទៀតរងឥទ្ធិពលពីជ្រលងសម្ពាធទាប។ កត្តាទាំងនេះបានធ្វើឲ្យមានភ្លៀងធ្លាក់ជាបន្តបន្ទាប់ ទាំងក្នុងអាងទន្លេមេគង្គលើ នៅប្រទេសថៃ និងឡាវ និងក្នុងប្រទេសកម្ពុជា ពិសេសតំបន់ភ្នំ តំបន់ខ្ពង់រាបភាគខាងជើង និងភាគឦសាន។
ក្រសួងបានព្យាករណ៍ថា ទោះបីទឹកទន្លេមេគង្គនៅខេត្តស្ទឹងត្រែង ក្រចេះ និងកំពង់ចាម បច្ចុប្បន្នបានស្រកបន្តិចក្ដី តែទឹកទន្លេអាចឡើងវិញចាប់ពីថ្ងៃទី១៥ កញ្ញា រហូតដល់ដំណាច់ខែកញ្ញា ឆ្នាំ២០១១។ ដូច្នេះទឹកឡើងនោះ អាចហូរចូលព្រែក និងលិចតំបន់ទំនាបនានា។
លោក ឡូយ សូផាត ជាអភិបាលខេត្តស្ទឹងត្រែង។ លោកបានមានប្រសាសន៍ថា នៅពេលនេះ ស្ថានភាពទឹកទន្លេនៅខេត្តស្ទឹងត្រែងមិនទាន់មានបញ្ហាគួរឲ្យព្រួយបារម្ភទេ ៖ “ប៉ុន្តែឥឡូវវាស្រកហើយ។ អត់អីទេ”។
លោក ហេង រត្ន័ម៉ូនីដា ប្រធានមន្ទីរធនធានទឹក និងឧតុនិយមខេត្តក្រចេះវិញ បានឲ្យដឹងថា ទឹកទន្លេមេគង្គនៅចំណុចខេត្តក្រចេះ នៅថ្ងៃទី១៣ កញ្ញានេះ មានកម្ពស់ ២១ម៉ែត្រ៥៥ ស្រកជាងថ្ងៃទី១២ កញ្ញា កន្លងទៅ ៖ “ស្ថានភាពទឹកនៅក្រចេះឥឡូវល្អឡើងវិញហើយ។ ស្រកហើយអាកាសធាតុល្អទៀត។ បើកថ្ងៃល្អហ្មង“។
កម្រិតកម្ពស់ទឹកប្រកាសអាសន្ននៅខេត្តក្រចេះ គឺមានកម្ពស់ ២២ម៉ែត្រ។
ចំណែកលោក ប៉ាង ប៉េង ប្រធានមន្ទីរធនធានទឹក និងឧតុនិយមខេត្តស្ទឹងត្រែង បានឲ្យដឹងថា នៅថ្ងៃទី១៣ កញ្ញា កម្រិតទឹកទន្លេមេគង្គនៅខេត្តស្ទឹងត្រែងមានកម្ពស់ ៩ម៉ែត្រ៨០ គឺមិនទាន់ដល់កម្រិតប្រកាសអាសន្ននៅឡើយទេ។ កម្រិតកម្ពស់ទឹកប្រកាសអាសន្ននៅខេត្តស្ទឹងត្រែងគឺ ១០ម៉ែត្រ៧០។
កាលពីថ្ងៃទី១២ កញ្ញា កន្លងទៅ លោកនាយករដ្ឋមន្ត្រី ហ៊ុន សែន បានអំពាវនាវឲ្យគ្រប់ស្ថាប័នយកចិត្តទុកដាក់ជួយប្រជាពលរដ្ឋក្នុងតំបន់មានទឹកជំនន់ ជាពិសេសត្រូវមានក្រុមគ្រូពេទ្យជួយប្រជាពលរដ្ឋដែលអាចកើតជំងឺផ្សេងៗ បណ្ដាលមកពីទឹកជំនន់៕
No comments yet... Be the first to leave a reply!