ខែកញ្ញា 13, 2011 
ដោយ : រតនា
ថ្ងៃទី 13 កញ្ញា 2011
CEN
ភ្នំពេញ: គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប. គ្រោងនឹងរៀបចំការបោះឆ្នោតជ្រើសរើសសមាជិកក្រុមប្រឹក្សាខណ្ឌពោធិ៍សែនជ័យ នៅខែធ្នូ ឆ្នាំ២០១១។ សមាជិកក្រុមប្រឹក្សាខណ្ឌថ្មី របស់រាជធានីភ្នំពេញ មានចំនួន ១៩ រូប។
លោក ឃ្លោក ប៊ុតឌី សមាជិក គ.ជ.ប. បានមានប្រសាសន៍នៅក្នុងសន្និសីទកាសែត កាលពីព្រឹកថ្ងៃទី១៣ ខែកញ្ញា ឆ្នាំ២០១១ថា សមាសភាពក្នុងការប្រកួតប្រជែង សម្រាប់ការបោះឆ្នោតជ្រើសរើសក្រុមប្រឹក្សាខណ្ឌពោធិ៍សែនជ័យ នាពេលខាងមុខនេះ គឺមានបេក្ខជនចំនួន ៨៩ រូប មកពីគណបក្សនយោបាយ ដែលមានសមាជិករបស់ខ្លួន ជាសមាជិកក្រុមប្រឹក្សាសង្កាត់ចំនួន ១៣ ដែលទើបតែត្រូវបានដាក់បញ្ចូលក្នុងខណ្ឌពោធិ៍សែនជ័យ កាលពីពេលថ្មីៗនេះ។
សមាជិកក្រុមប្រឹក្សាសង្កាត់ទាំង ១៣ នោះ ជាអ្នកបោះឆ្នោតជ្រើសតាំងសមាជិកក្រុមប្រឹក្សាខណ្ឌពោធិ៍សែនជ័យ ដែលមានចំនួន ១៩ រូប។
លោក ឃ្លោក ប៊ុតឌី បានមានប្រសាសន៍បន្តថា ការបោះឆ្នោតជ្រើសរើសក្រុមប្រឹក្សាខណ្ឌពោធិ៍សែនជ័យនោះ ជាការបោះឆ្នោតអសកល។ គឺអ្នកដែលមានសិទ្ធិចូលរួមបោះឆ្នោតនោះ ជាសមាជិកក្រុមប្រឹក្សាសង្កាត់ទាំងចំនួន ១៣សង្កាត់។
ឯលោក ទេព នីថា អគ្គលេខាធិការ គ.ជ.ប. បានបញ្ជាក់ដែរថា សមាជិកក្រុមប្រឹក្សាសង្កាត់ទាំង១៣ ដែលមានសិទ្ធិចូលរួមបោះឆ្នោត ជ្រើសរើសក្រុមប្រឹក្សាខណ្ឌពោធិ៍សែនជ័យ គឺគណបក្សនយោបាយ ពុំអាចសុំប្តូរសមាសភាពបានទេនាពេលនេះ លុះត្រាតែបុគ្គលនោះ ទទួលមរណភាព ទើបគណបក្សសាម៉ី មានសិទ្ធិដាក់អ្នកថ្មី មកជំនួស នៅពេលការបោះឆ្នោតជិតមកដល់។
សូមបញ្ជាក់ថា រាជរដ្ឋាភិបាលបានបង្កើតខណ្ឌពោធិ៍សែនជ័យមួយបន្ថែមទៀតបន្ទាប់ពីសម្រេចកាត់ឃុំមួយចំនួន នៅក្នុងខេត្តកណ្តាល ចូលមកក្នុងទឹកដីរាជធានីភ្នំពេញ កាលពីពេលថ្មីៗនេះ។
ខណ្ឌពោធិ៍សែនជ័យ មានសង្កាត់ចំនួន ១៣ រួមមាន៖ សង្កាត់ត្រពាំងក្រសាំង, សង្កាត់គោករកា, សង្កាត់ភ្លើងឆេះរទេះ, សង្កាត់ចោមចៅ, សង្កាត់កាកាប, សង្កាត់សំរោងក្រោម, សង្កាត់ក្រាំងធ្នង់, សង្កាត់បឹងធំ, សង្កាត់កំបូល, សង្កាត់កន្ទោក, សង្កាត់ឪឡោក, សង្កាត់ពន្សាំង និងសង្កាត់ស្នោ។
សូមរម្លឹកថា ការបោះឆ្នោតជ្រើសតាំងសមាជិកក្រុមប្រឹក្សារាជធានីខេត្ត ក្រុងស្រុកខណ្ឌ អាណត្តិទី១ ត្រូវបានធ្វើឡើង កាលពីថ្ងៃទី១៩មីនា ឆ្នាំ២០០៩។ ការបោះឆ្នោតនោះ ធ្វើឡើងជាអសកល ដោយមានតែសមាជិកក្រុមប្រឹក្សាឃុំសង្កាត់ ក្នុងតំណែងប៉ុណ្ណោះ ជាអ្នកបោះឆ្នោត។ ពោលគឺក្រុមប្រឹក្សារាជធានីខេត្ត ក្រុងស្រុកខណ្ឌ អាណត្តិទី១ ដែលមានរយៈពេល ៥ ឆ្នាំ មានសមាសភាព មកពីគណបក្សប្រជាជនកម្ពុជា គណបក្សសមរង្ស៊ី គណបក្សហ្វ៊ុនស៊ិនប៉ិច និងគណបក្សនរោត្តម រណឫទ្ធិ ៕
Camnews 
No comments yet... Be the first to leave a reply!